Дагъусттан лайкь хьунни ххуллурдал хозяйствалуву ца яла лараймур наградалун «Мусил ккуручайлун». Ва нигьачIаву дакъасса, ххуйсса ххуллурду буваврил хIасиллу хIисавравун ларсун дуллусса лишанни. Хъирив лавну ххал бивгьуссар ххуйсса ххуллурду баврил национал проект цукун бартдиргьуну дуссарив, давуртту чIумуй дурссарив, дагьайкун дурссарив, проектран итадаркьусса арцу аьркиннийн тIайлану харж дурну дуссарив.
Гьашину республика вай федерал арцу сантирай харж даврил хIасиллаву хьхьичI ххуттай дур, аьмну махъсса шиннардий кIа кIицI ларгсса проект бартдигьаврил тагьар ххал диргьуну, хьхьичIунну дур. Так ца гьашину «Нигь дакъасса ххуйсса ххуллурду» проектрал лагрулий 45, 2 километралул манзилданийсса ххуллурду бувнугу, цIубуккангу бувну бур. МуницIухва, транспортралмур иш хьхьичIунмай бавриха зузисса паччахIлугърал программалул лагрулий 45, 5 километра ххуллул ва 5 ламу бувну бур, 397, 2 километрагу, 13 ламугу бакьин бувну бур. АрхIала най дур хъунисса цаймигу давуртту: МахIачкъалалив, Дарбантлив ва Хасавюртлив къабувххунма агьали ххилансса ххуллурду, МахIачкъалаллал хьхьирил портрачIансса ххуллурду буллай бур.
– Ва ларайсса наградалуву ххуллурдаха зий захIмат буллалисса гьарцагу зузалал бутIа буссар, региондалул Минтрасрал ва хасну каялувчи Жамбулат Салавовлул хIарачатри. Амма вай давуртту дюхъан дуван къашайссия федерал кумаг къабивкIссания, Аьрасатнал вице-премьер Марат Хуснулиннул, транспортрал министр Роман Старовойтлул ва Ххуллурдал федерал агентсвалул хъунама Роман Новиковлул кабакьаву дакъассания. Ххуллурду шагьрурдал ва шяраваллал дахIавур, азарханардачIан, школардачIан ххуллурдаллу буцлацисса, вай ххуй баврийну аьмну ххуй хъанахъиссар шяраваллил хозяйствалул, промышленностьрал ва туризмалул тагьар, гихунмайгу жува вава даражалий, бюхъулий зунмур буллантIиссару, агьали рязи буванну. Инсантуращал гъалгъа тIутIисса чIумал, чIявуну ххуллурдал хIакъиравусса масъалартту гьаз бувай, ва зурул ахирданий хьунтIисса «тIайланнасса эфирданийнгу» чIявусса суаллу бувкIун бур ххуллурдацIун бавхIусса, Дагъусттаннал агьалигу, хъамалгу къулайсса ххуллурдая рязину личIавриха зунтIиссару, – увкунни Дагъусттаннал бакIчи Сергей Меликовлул ва ларайсса наградалущал ххуллурдаха зузими барча буллай.
ПатIимат Рамазанова
