Ноябрьданул шамилчинмур алхIаткьини Щалагу дунияллий кIицI лагай ДТП-ву оьрмурдацIа хьуми дакIнийн бичайсса кьини. Ва кьинилун хас дурсса мероприятияртту хьунни ЦIуссалакрал райондалул школардайгу. Шикку гьуртту хьунни Госавтоинспекциялул вакилталгу. Мероприятиярттал мурад бия ДТП-ву оьрмурдацIа хьуми дакIнийн бичаву, дуклаки оьрчIахь ххуллул низамрал тIалавшиннардая бусаву. ОьрчIахь бувсунни ДТП-ву жанну дуллуми дакIнийн бичайсса кьинилул тарихрая, тикрал дунни бахьттагьалтрансса ва пассажиртурансса ххуллул низамрал тIалавшиннарду.
Ихтилат хьунни Щалагу Аьрасатнаву ххуллурдай мюхчаншиву дузал даву мурадрай дуллалисса давурттая, кIицI ларгунни гьарицагу аьрххи-ххуллийн увксса инсаннал цалагу, цаманалгу оьрмулухсса жаваблувшиву.
ХьхьичIунсса кIану бувгьунни
ЦIуссалакрал райондалиясса тарбиячинал кIилчинмур кIану бувгьунни «Аьрасатнал тарбиячитал» тIисса Щалагу Аьрасатнал IX-мур конкурсрай. Конкурсрал агьаммур мурад бия тарбиячитурал, кIулшивуртту дулайсса идарарттал педагогтурал ва каялувчитурал инновациялул опыт кIул бувну, муния бусаву, мукунма ва ххуллий хьхьичIунну зузисса тарбиячитал ялун личин баву. ЦIуминалийсса Чапаево шяравусса «Солнышко» тIисса оьрчIал багърал тарбиячи Мариян Сайпуттиновал, «Лучший воспитатель» номинациялуву гьуртту хьуну, кIилчинмур кIану бувгьунни.
Район хьхьичIунминнувух дур
Ноябрьданул 17-нний Дагъусттаннал бакIчи Сергей Меликовлул дунни республикалул призыврал комиссиялул заседание. Видеосвязьрал журалий заседаниелий гьуртту хьунни ЦIуссалакрал райондалул бакIчи МаматIи ХIамзатовгу. Октябрь зуруйсса план щаллу хьунни. Аьралуннаву къуллугъ бан тIайла бувккунни 800-нния ливчусса жагьилтал. Ноябрьданий дурсса хIасиллайн бувну, ЦIуссалакрал район призыв щаллу даврил чулуха хьхьичIунминнувух кIицI ларгунни.
Контрактниктуран дуллунни арцу
ЦIуссалакрал райондалул бакIчи МаматIи ХIамзатовлул хIукмулийну, «Каспий» тIисса хушрайсса батальондалуву къуллугъ буллан бувкIсса райондалиясса контрактниктуран дуллунни ттурш-ттуршазарда къуруш. Вай арцу райондалул каялувчинал сипталий администрациялул резерврал фондрава дуллунни. ХIакьинусса кьини «Каспий» батальондалуву къуллугъ бан ЦIуссалакрал райондалия 6 инсан увкIун ур.
ДакIнийн бутан, Дагъусттаннай сакин дурну дуссар хушрай контракт чирчуну бувкIминнаясса «Каспий» батальон. Шиву бур республикалул личIи-личIисса районнаясса ва шагьрурдаясса, мукунма чIаххуврайсса регионнаясса контрактниктал. Контракт чичин бюхъайссар 6 зуруя 1 шинайн бияннин. Вайннал харж 195 азарунниха ливчусса буссар. Му бакъассагу, Сергей Меликовлул хIукмулийну, дулайссар ЕДВ –125 азарда къуруш. Батальондалувуминнал оьрчIру садикирттайн, вузирдавун хьхьичIва-хьхьичI кьамул байссар. Дуссар контрактниктуран цаймигу куклушиннарду.
КIицI лаган, хушрайсса батальондалувун кьамул буллалиний хIисаврайн ласайссар аьралий ва укунмасса пишарду. Миннуйн бувну булайссар контрактникнан цания ца къуллугъ.
А.Аьбдуллаева
