«Илчи» кказитрал редакциялул ва нюжмардийсса хъамалну хьу­нни хъуннасса жаваблувшиву дусса къуллугърал буржру чулийн буккан буллалисса ведомствалул вакилтал – ДР-лул экономикалул министр, ДР-лул паччахIлугърал 1-мур даражалул советник ХIажи Султанов ва ДР-лул Экономикалул министерствалучIасса Жяматийсса советрал председатель Шагьимардан Мудуев.

ХIажи Султанов увну ур 1977-ку шинал ЦIуссалакрал райондалийсса Шушиннал шяраву. ЦIуссалакрал шяраву бувккуну бур дянивмур даражалул школа. Дагъусттаннал паччахIлугърал университетрал финансирттал ва экономикалул факультетгу къуртал бувну, зий айивхьуну ур Сбербанкрал ЦIуссалакрал райондалул отделениялул хъунама экономистну. Мунияр махъ ца­ппара шиннардий зий ивкIун ур ЦIуссалакрал райондалул азарханалул хъунама хIакиннал экономикалул масъаларттал­сса буллалисса хъиривчуну. 2001-2006-ку шиннардий зий ивкIун ур Дагъусттаннал Финансирттал управлениялул министерствалул ЦIуссалакрал райондалий­сса каялувчину.
Ва опытгу бучIи лявкъуну бур ванан. 2006-ку шинал «Дагъусттаннал правда» кказитрай баян бувну бивкIсса ДР-лул Президентнал Контрольданул ва финансирттал управлениялул бюджетрал ва финансирттал отделданул хъунама язи угьлагьисса конкурсрай гьуртту хьунсса документругу буллуну, махъунай цала даврийн нанисса чIумал, гава ссят ДР-лул президент МухIу Аьлиевлул администрациялия занахьу тIий оьвкуну бур ванайн.
КIива гьантта буллуну, гьан увну ур цалла даву цайминнайн тапшур дан. Мичча хьуну дур ванал жаваблувсса къуллугърай зунсса дайдихьу.
Хъунма хIал къавхьуну, укунмасса конкурс баян бувну, ХIажи Султанов ивтун ур ДР-лул Президентнал Контрольданул ва финансирттал управлениялул хъунаманал хъиривчуну. 2013 -2014-ку шиннардий ивтун ур ДР-лул бакIчинал ва ХIукуматрал Администрациялул управлениялул экспертизарду ва проектру давриха зузисса управлениялул хъунаману. 2014-ку шинал ХIажи Султановлуйн вихшала бувну бур ДР-лул экономикалул министрнал хъиривчунал къуллугъ. 2019-ку шинал ивтун ур ДР-лул экономикалул министрну.
2020-ку шинал ХIажи Руслановичлуйн тапшур бувну бур рес­публикалул экономикалул ца яла агьаммур бутIану хъанахъисса, лакрал халкь ЦIуссалакрал райондалийн бизан баврил ва Аухуллал район цIу дуккан даврил масъаларттаха зузисса управлениялул къуллугърай каялувшиву дуван.
2023-ку шинал цIунилгу ивтун ур ДР-лул экономикалул министрну. ХIакьину ванал каялувшиву дуллалисса министерство зий бур яла цIюрувкьуми масъа­ларттаха. Ванайн хъар хъанай дур республикалул экономика хьхьичIуннай шаврил ва агьалинал багьу-бизу ххуй-хъин шаврил тагьар.
– Экономикалул министерство бур яла чIявуну министртал баххана хъанахъисса идара. Ца шинал шикку мукьа министр аххана хьуссия. ХьхьичIавагу ва министерствалий хъунмасса хIаллай лак бикIайссия министрталну зий. Шикку зий бивкIсса цинявппагу лак цала даврил бурж лажин кIялану биттур буллали­сса бикIайва. Гьай-гьай, цIана давугу захIмат хьуну дур, аьмсса цифровизациялуцIун, электрон журалул документру ишла баврицIун дархIусса, хъунисса тIалавшиннарду дур. ХIажи Русланович жуна чIалачIисса, цинявннал итталусса инсан ур. Къуллугърал буржру бартбигьаву бакъассагу, дуллайна ур ведомствалул даврия бусласисса пресс-конференцияртту. Мугу агьалинащалсса дахIаву хъанахъиссар.
ХIажи Руслановичлул лагма, ванан кьамулсса куццуй къуццу тIий, Экономикалул минис­терствалуцIунсса Жяматийсса советрал даву дачин дурну ура нагу, – тIий ур Шагьимардан Мудуев.
Шиккува кIицI лаган, географиялул элмурдал доктор, профессор, ДР-лул лайкь хьусса экономист Шагьимардан Мудуев 20-хъул шиннардий Дагъусттаннал Экономикалул министерствалул управлениялул отделданул хъунаману зий ивкIсса инсан ур. Ва сфералувусса ванал опыт хIакьинугу тIалавну бур.
– Цала-цила чIумуха лар­хьхьуну цикссагу мюнпат бу­сса давуртту дурссар ва даврий кьунния лирчусса шиннардий зий ивкIсса Аьбдуллагь ХIажиевлул, муная махъ зий бивкIсса Рапи Аьбдуразакьовичлул, Марат Сиражуттиновичлул ва цайминнал, – тIий ур ХIажи Султанов.
ХIакьину Экономикалул министерствалул хьхьичI бивхьусса масъаларттугу хъунисса лагрурдал ва ккаккан дурсса чIумуй биттур бан аьркинсса бур. Даврил хIал кIулсса пишакарнал лавайсса даражалий щаллу буллай ур цала къуллугърал бурж.
ЦIанасса чIумал республикалий иширайну зузи дурну дур 19 миллатрал проект. Миннул ахттаршиннагу дурну, Федерал центрданул хьхьичI отчетругу дуллай, зун бигьасса иш бакъахьунссар.
Министрнал кIицI лавгунни республикалун хъуннасса агьамшиву дусса зунттал щархъал форум хьунтIишиву. Зунттал райо­нну ядаву мурадрайсса программа биттур хъанай душиву исват хъанай бур шивун дагьайсса хъуни дакъасса проектру щаллу дуллалисса инсантуран хIукуматрал чулухасса кумаг бушиврийну.
– Цала ичIаллил хозяйство дусса, зузи кIантту хIасул бувсса инсантураща, чунчIав къабувккун, электрон журалий документру буллуну, вай программардавух гьуртту хьуну, хIукуматрал чулухасса субсидияртту ласун бюхъай­ссар. Ца мукунсса проект мюнпат буну дузрайн дуккан дурссар Ккуллал райондалий. ЧIявусса бикIай хозяйствалун аьркинсса техника ва оборудование машан ларсъсса, паччахIлугърал программалувух гьуртту хьун ччисса инсантал. Мукунминнан кумагран паччахIлугърал чулухасса арцу итадакьлакьиссар цимур-ца исват буллалисса хIакьсса отчетру ккаккан дурну махъ. Ттун хъинну ччива Ккуллал, Лакрал районнал агьали ми программардавух гьуртту хъанай. Умуд бур гьашинусса шиналгу гьуртту хъанахъиминнал сияхI хъунна хьун­ссар тIисса,– увкунни ХIажи Султановлул.
– Ца-кIива ша ливчIун бур, ведомствалул сипталийн бувну, Аьра­сатнал Академиялул федерал центрданул структуралий «Институт горных исследований» тIисса центр тIитIинсса. Му мурад щаллу хьуну махъ хъунма­сса умуд бур Дагъусттаннал Республика зунттал районну ахттар даврил центрну хьунссар тIисса. ХIакьинусса кьини Дагъустта­ннай кунма чялишну Аьрасатнал царагу региондалий гьаз буллай бакъар зунттал щархъурду ядаврил масъалартту, – тIий ур министр.
Лакрал ва Ккуллал районнайн газ буцаврил хIакъиравусса цIюрувкьусса масъалалия ихтилат буллай, ХIажи Султановлул кIицI лавгунни, дурну душиву экспертизагу бувсса проектно-сметный документация.
– ЧIалай бур ва хъунмасса харж бишин багьлагьисса ма­съала бушиву. Ттун кIулссаксса, Дагъусттаннал Энергетикалул министерствалул ва объект лавсун бур Газпромрал инвестициялул программалийн. Республикалул бакIчи Сергей Меликов ва Лакрал райондалул администрациялул бакIчи Юсуп МахIаммадов му масъалалул ялув хъуннасса бакI цIуцIаву дуллайнма бур, – увку­нни министрнал.
Газ буцаврил хIакъиравусса цаламур пикри бувсунни Шагьимарданнулгу:
– 1992-ку шиналва байбивхьуну буссия газификациялул масъала. Жува газ буцинсса сант кIийлла канища дуккан рирт­ссар. Тай шиннардий газ буцинсса техникалул шартIру ххал дуллай бувкIун бивкIссар Газрал элмийсса ахттаршиндарал институтрал вакилтал. Миннал проект дуллай шанма барз бувссия. Та ппурттуву миннавух нагу уссияв. Хъуниминнал тIалавшинна дия ЦIахъарату буцин аьркин­ссар тIисса. ЦIахъарав тIурча, чIирисса линия дия чIаххуврайсса МухIи тIисса шярава дурцусса. Муния пайда бакъая. Яла дур­ссия, Ссухъиящиял шяраву газрал станциягу бувну, Уручуллал шяравухчIин буцинсса проект. Утти тIурча, му масъала щаллу баврихун байча щунсса ишру чансса хъанай бакъар», – увкунни ванал.
Инвестицияр­ттал хъуни­сса проектирдая буслай, ХIажи Руслановичлул кIицI ларгунни шяраваллавун щин дуцаврин хас дурсса проектру. Лакрал райондалийсса щинал хъуни­сса бургъурдацIунсса кIира проект: Ххюлусмату – Гъумукунсса ва Щарату – Хъурхъивсса. Кку­ллалмур райондалий гьашинусса шинал Ваччиял шяраву стадион бансса проект. ЦIуссалакрал райондалийгу гьашинусса шинал Ямансу шяравусса щинал масъала дузрайн буккан бан ккаккан бувну бур.
Му бакъассагу, ЦIуссалакрал райондалий чялишну зий дур ххуллурдал ва кIичIирттал сетьру дакьин даву мурадрайсса паччахIлугърал программа.
Хьунни лакрал миллат цIусса миналийн бизан баврил программа лахъи лагаврил хIакъиравусса ихтилатгу.
– Бизан баврил программалул ахир дуссия дахьра му сакин дур­сса чIумал. Ккаккан дурсса чIумуй бан аьркинну бия школарду, оьрчIал багъру, ххуллурду. Программалул лагрулий цIуминалийн дизан дурсса цинярдагу щархъаву дурну дуссар канализациялул сетьру ва ми марцI дайсса сооруженияртту. Уттигу щалла дузал хьун дурар ххуллурдал инфраструктура. Вайгу, цаймигу финансирдацIун бавхIусса масъалартту дузал къабувссаксса, цаппара шиннардий уттигу лахъи лаганссар ва программа, – увку­нни ХIажи Руслановичлул.
Жу цIувххуссия ХIажи Султановлухь Лаккуйнгу иярав куну.
– Гьарица шинал на чара бакъа ияйссара ттула буттал шяравун. Хъинну ххирар зунттавунмайсса аьрххирду, хаснува Ккуллал райондалийн, Хъусращиял шяравун, тания тихунмай­сса, марцIсса зунчардива нани­сса нехру, жюружантту, караматсса тIабиаьт дусса кIанттурдайн иллан. Амма тIабиаьтрая неъмат ласунсса чIун тIурча, ссуссукьу­сса дикIай, – тIий ур ХIажи.
Ихтилат къуртал буллай, ХIажи Султановлул барчаллагь увкунни миллатрал «Илчи» кказитрал зузалтрахь.
– Дагъусттаннай бакъассагу, лакрал шаннагу райондалий хъанахъимуния, миллатрал багьу-бизулия, язисса арс-душваврал хьхьичIуннайшивурттая бусласисса, хъуннасса тарихрал даву дачин дурсса кказит бур жулва. ДакI ххари хъанан дикIай, республикалий хъанахъисса агьамсса мероприятиярттай «Илчи» кказитрал зузалт ххал хьусса чIумал, – увкунни ХIажи Руслановичлул.
Редакциялул чулуха жугу дакIнийхтуну чIа тIий буру къабигьасса дав­рицIунсса тIайлабацIуртту!
Имара Саидова