Сентябрьданул 25-нний Муса Маннаровлул цIанийсса Гъумучиял школалий лавайсса даражалий хьунни ххаллилсса учитель, гьунар бусса шаэр ва композитор Шагьимардан Акниевлул цIа абад дуллалисса шадлугърал мажлис.
Шикку гьуртту хьун бувкIун бия миллатрал патриотътал, райондалул администрациялул вакилтал, Шагьимарданнул учениктал, гъан-маччами. Шагьимардан Акниевлул оьрмулул ва захIматрал ххуллия бусласисса ихтилат бунни Лакрал райондалул бакIчинал хъиривчу Абубакар Къюннуевлул. Цала учитель дакIнин утлатисса ихтилатру бунни Дагъусттаннал Жяматийсса палаталул председательнал хъиривчу Сапарбаг Аьбдуллаевлул, жяматийсса ишккакку Шалласу Шалласуевлул, Дагъусттаннал Музыкантътурал союзрал правлениялул председатель Хан Башировлул, Шагьимарданнул ученик ва ванал хордануву балай тIий ивкIсса Мурад Оьмаровлул ва м.ц. Шагьимардан Акниевлул 100 шинал хьхьичI чивчуну бивкIсса шеъри бувккунни ванал маччадуш ва ученица Надежда МахIаммадовал.
Школалул лажин чIирай ларчIсса мармарчарил ула тIитIин вихшала дунни душнийн Аьзизайн, маччадушнийн Надеждайн ва душнил оьрчIайн Маликлуйн.
Аьзизал дакIнийхтуну барчаллагь увкунни ва даву дузрайн дуккан дан цила чIарав бавцIуминнахь, ка-кумаг бувминнахь, цила буттал цIа абад дансса, ванал творчество цIу дуккан дансса сипталий бувккун, ва даврил дайдихьу дурсса «Ябуванну жулва миллат» группалувасса Валида ХIусайновахь, Басира Щамхаловахь, Башарат Оьмаровахь, Надежда МахIаммадовахь, ула лачIун кабакьу бувсса буттал учениктал Мурад Оьмаровлухь ва Багьауттин МахIаммадовлухь, мажлисрайнсса хIадуршинна дуллай захIмат бивхьусса Гъумучиял школалул директор Соня ХIусайновнахь ва учительтурал коллективрахь, буттая ххаллилсса передача дурсса Карина Далиевахь, мероприятиялий гьуртту хьун МахIачкъалалия бувкIсса бусравсса хъамаллурахь.
Мариян Дандамаевал цIанийсса Гъумучиял искусствардал школалул оьрчIал увкунни ччянива машгьур хьусса Шагьимарданнул мукъурттийсса ва макьаннайсса балайрду. Бувккунни шеърирду, ккаккан дунни авурсса къавтIавуртту.
Хьурттал школалул учительница, Шагьимарданнул ученица ва хордануву балай тIий бивкIсса Аьйшат Бариевал, ххирасса учитель дакIнин утлатисса ихтилатгу бувну, щаллу бунни ванал мукъурттийсса ва макьандалийсса балай.
Мероприятие къуртал хьуну махъ школалул столовайлуву тIивтIуну бия ссупра.
Шикку Шагьимарданнуя, ванал творчествалия бусласисса ихтилатру бунни «Илчи» кказитрал хъунама редактор Руслан Къардашовлул, Соня ХIусайновнал, Амсаруллагь Къажлаевлул. ЛяличIисса гьунарданул заллу Шагьимардан Акниевлуя бусланмур бухлаглай бакъая.
Шагьимардан Акниев увну ур 1914-ку шинал Ухссавнил Турциянавусса Ардагон тIисса шагьрулий. Та чIумал ванал ппу Къазахъилав дарс дихьлай ивкIун ур Стамбуллал университетраву. Шагьимарданнун 7 шин хьусса чIумал бувкIун бур вайннал кулпат Лаккуйн. Гъумучиял школалий 7 классгу бувккуну, Шагьимардан увххун ур дуклан шиккувасса педучилищалувун. Къуртал бувну махъ зий ивкIун ур ГьунчIукьатIрал, Ххутрал, Кьубиял, Гъумучиял школардай, 30-ку шиннардий – педучилищалуву.
Ванал цIа халкьуннаву машгьур хьуссар гьунар бусса композитор ва шаэр хIисаврай. МухIуттин Чариновлул мукъурттийсса лакрал гимнрал макьан Шагьимарданнул чирчуну дур. Ванал макьаннай балайрду чайсса бивкIун бур машгьурсса артистал Мариян Дандамаевал, Изумруд ЖахIпаровал, ХIанипа Дибировлул ва м.ц. 1938-1968-ку шиннардий ванал хордануву гьуртту хьуну бур кIиазаруннийн бивсса инсантал. Дагъусттаннал зунттал районнай хьхьичIра-хьхьичIсса художествалул самодеятельностьрал кружок ванал сакин дурну дур. Шагьимардан Акниев лакрал цалчинсса композитор хъанай ур. 1957-ку шинал бувксса «Деятели музыкального искусства Дагестана» тIисса луттирай машгьурсса композитортурал цIардавух ваналссагу дуссар. Ухссавнил Ккавкказуллал самодеятельный композитортураву Шагьимарданнул цIа хьхьичIра-хьхьичI дагьссар Хъунмасса совет энциклопедиялувун. 1980-ку шинал итабавкьуну бур «Лелуххантрал ва оьрчIал балай» тIисса Шагьимарданнул шеърирдал жуж. Буссар ванал оьрчIансса магьригу. Авадансса дур Шагьимарданнул творчество. Миллатрал культуралул даража гьаз бан ванал бивхьусса захIматран багьа бищун къашайссар.
Шагьимардан Акниев дакIний уссар лакку мазрал хьхьичIунсса учитель хIисаврайгу. Ва дарс дихьлай ивкIун ур 63 шинай. Цала бусса оьрмулий ва ивкIун ур оьрчIаву лакку мазрахсса ччаву тарбия дуллай, мунил аваданшиву, пасихIшиву ккаккан дуллай. Ванал бивкIссар цала сакин бувсса лакку мазрал грамматика.
Вай гьармуницIун Шагьимардан цIакьсса багъманчигу ивкIун ур. Ванал ххяххан къадайсса ахънилсса- ахъулсса къадиркIун дур.
Укун гьарица чулухасса гьунар бусса инсантал нажагьсса ляхъай дунияллийн. Шагьимарданнул творчество миллатрал культуралул ххазиналун ккаллиссар.
Андриана Аьбдуллаева
