Ларгсса шинал ахирданий Самаркьаннал паччахIлугърал медициналул университетраву хьунни личIи-личIисса хIукуматирттаясса медициналул вузирдаву дуклакисса студентътурал дянивсса VI олимпиада. Ва хьунни кIира-шанна ятапрай. Студентътал ккаккан дуллай бия теориялул кIулшивуртту, практикалул бюхъу, ляхълай бия ситуациялул задачарттансса жуав, дуручлай бия элмийсса проектру.

Бусравсса хъамаличу ва эксперт хIисаврай шиккун оьвкуну бия ДГМУ-рал инсаннал анатомиялул кафедралул хъунмур, медициналул элмурдал доктор, профессор Сабина ХIусайновайн.
Олимпиадалий кIилчинсса кIану бувгьунни Дагъусттаннал медициналул университетрал лечебный факультетрал студентка Мадина Арсланкьадиевал. Дунияллул халкьуннал дянивсса олимпиадалий жула студенткал хьхьичIунсса кIану бугьаву ва хъунмасса ишри.
ДГМУ-рал декан Висампаша Ханаьлиевлул кьамул бунни цачIава вузрал цIа гьаз дурсса студентка. Хьунабакьаврий гьуртту хьунни Сабина ХIусайнова ва дунияллул халкьуннал дянивсса отделданул хъунмур Райсат Кьурбанова.
Мадина ххувшаврищал барча буллай, Висампаша Ханаьлиевлул лавайсса кьимат бивщунни ванил кIулшивурттал даражалун ва хIарачатран.
– Ва ххувшаву Мадинал хъунмасса захIматрал хIасилли, мукунна студентка олимпиадалийн хIадур бувсса инсаннал анатомиялул кафедралулгу лайкьшивур. Жун пахру буссар дунияллул даражалий жула университет лайкьну ккаккан буллалисса студентътурая. Цайми хIукуматирттащалсса дахIаву, хIала-гьурттушиву лядуккан даву жул университетрал хьхьичI ххуттайн лавсъсса масъаларттавасса цар. Жу уттиния тихунмайгу жулва студентътурал укунсса мероприятиярттай гьурттушинна даврин кабакьу буллантIиссару, – увкунни ректорнал.

Андриана Аьбдуллаева