Октябрьданул 24-25-нний Москавлив И.М.Сеченовлул цIанийсса Медициналул университетраву хьунни Михаил Сапиннун 100 шин шаврин хас дурсса «Анатом, ученый, педагог» тIисса цIанилусса Дунияллул халкьуннал дянивсса элмийсса методикалул конференция.
Шикку гьуртту хьунни морфологиялул ахттаршиннардаха зузисса цIанихсса аьлимтал, Аьрасатнал ва чил билаятирттал вузирдал преподавательтал, жагьилсса аьлимтал ва цаймигу.
Дагъусттаннал чулуха конференциялий гьуртту хьунни Дагъусттаннал паччахIлугърал медициналул университетрал анатомиялул кафедралул заведующий, медициналул элмурдал доктор, профессор Сабина ХIусайнова, анатомиялул кафедралул ассистент Ирайганат ХIадисова. Конференциялий Дагъусттаннал медуниверситетрал пишакартурал гьурттушинна даврил исват буллай бур, университетрал анатомиялул школа лавайсса даражалул бушиву ва профессионал сообществардал дянивгу лайкьсса кIану бугьлай бушиву.
Конференциялул даврил лагрулий хьунни анатомиялул ва гистологиялул тарихрая, цIанасса заманнул ахттаршиннардайн чул бивщуну кIулшиву дулаврия ва морфологиялул аралуву жагьилсса пишакартурал хьун дурсса хьхьичIуннайшивурттая бусласисса секциярттал давуртту. Шикку личIиссара къулагъасрайн лавсун бия кIулшиву дулаврил ва дарсру дишаврил опыт кIибачIаврил масъалартту.
Сабина ХIусайновал доклад бия «Медицинская служба Дагестана: испытания и достижения в годы Великой Отечественной войны» тIисса темалун хас бувсса, та ппурттувусса Дагъусттаннал хIакинтурал медициналул ххуллий дурсса хьхьичIуннайшивурттая бусласисса.
ХIакьинусса кьинигу, Дагъусттаннай бакъассагу, Ухссавнил Ккавкказнавугу анатомиялул докторский диссертация дурурччусса аьлимтал хъанай бур Сабина ХIусайнова ва ванил ппу ТIагьир Саидуллагьович. Медициналул институтраву ца яла захIматмур ва агьаммур элмулун ккаллиссар анатомиялулсса. ХIакьсса зат бур, инсаннал чурххал базурду къакIулну цурда ца азар хъин дан къахьунтIишиву. ХIакьину Сабина ХIусайновал хIарачат буллай бур цила буттал, Дагъусттаннал медакадемиялул Аьлимтурал советрал член, Дунияллул халкьуннал дянивсса информатизациялул академиялул академик, Искусствалул ва элмулул Петровский академиялул член-корреспондент (ПАНИ), Дагъусттаннал Элмурдал академиялул ва Аьрасатнал естествознаниялул академиялул член-корреспондент, Англиянал естествознаниялул королевский академиялул член ТIагьир Саидуллагьовичлул хъунмасса захIмат бивхьусса кафедралул даву лавайсса даражалий дачин дан.
Имара Саидова
