Апрельданул 8-нний Дагъусттаннал бакIчи Сергей Меликовлул дунни актуалсса масъаларттал хIакъиравусса батIаву.
Муний ххал бивгьунни укунсса масъалартту: МахIачкъалалив Гапцахская кIичIираву чIявуквартирартту бусса къатраву газ пIякь учаврил биян бувсса зараллу бухлаган баву, Дагъусттаннай бувгьусса мурхьру ябаву, «Национальная система пространственных данных» тIисса паччахIлугърал программа бартдигьаву, ТКО-лунсса контейнерду ва контейнердал площадкартту щаллу баву, жяматийсса транспорт лядуккан даву ва МахIачкъалалив машинарттал чIутIру (пробкарду) бухлаган баву ва цаймигу.

ЦIу лещан даву

Аьрасатнал МЧС-рал Да­гъусттаннайсса хъунмур управлениялул хъунама Муслим Давришбековлул бусаврийну, Лаващиял райондалий цIу лещан дуллай бур ларчIун диркIсса циняв кIанттурдай.
Ахъушиял райондалий цIу ларчIун дур 300 кв.метралий. Гумбетуллал ва Хунзахъиял районнай цIу лещан дурну дур гара кьини (апрельданул 8-нний).
Самолетру ишла дуван бюхълай бакъасса бур гужсса марч сававну.
Сергей Меликовлул вацI­рацIух цIу лачIлачIисса муниципалитетирттал бакIчитурайн тапшур бунни нюжмардул ахирданийнин ЧС духлаган даврил комиссиярттаву сакин буван зузи группарду, тагьарданул ялув бацIаву дулланшиврул. Ванал тапшур бунни агьалинан бувчIин баврил даву гужлан дуван.

Инсантурал
лабизавурттах
властьрал органнал къулагъас даву

Мартрай Дагъусттаннал ЦУР-данул соцсетирттаву сияхIрайн ларсун дур 6 азарунниха лирчусса инсантурал лабизавуртту. Миннух властьрал органнал цукунсса къулагъас дуллай буссарив бувсунни ДР-лул БакIчинал ва ХIукуматрал Администрациялул каялувчинал хъиривчу, ДР-лул БакIчинал Информациялул политикалул ва прессалул къуллугърал управлениялул хъунама Рашид Акавовлул.
Яла чIяруми лабизавуртту дия чани лещан баврил, ххуллурду бакьин баврил ва дяркъусса щин дакъашиврул хIакъираву.
Яла чялав багьми (резо­нан­сные) темарду дия МахIач­къалалив Гапцахская кучалий газ пIякь учаву ва цаппара районнай вацIрацIух цIу лачIаву.
Тапшур бунни ччясса мутталий бухлаган буван бивсса зараллу ва кумаг буван зараллу бивминнан.
«Шагьрурдал ва районнал ялапарлувтурал республикалул ва федерал властьрал органнайн лабизавуртту чичлачаврил бусласиссар муниципал властирдал цала давуртту бакIуйн дуккан дуллай бакъашиву. КIанттул властьрал органнал аьркинссар ччясса мутталий дузал буллан инсантурал масъалартту, миннащал аьчухну гъалгъа тIун», – увкунни региондалул бакIчинал.

МахIачкъалалив чIяву­квартирартту бусса къатраву газ пIякь учаврил биян бувсса зараллу бухлаган баврил хIакъираву бувсунни МахIачкъалаллал мэр Юсуп Умавовлул. Ванал тIимунийну, шагьрулул администрациялул кьамул бувну бур зараллу бивминная 200 аьрза. Миннул мурад бур арцуйнусса кумаг баву. Къатри дакьин даврил давуртту дуллай бусса бур строительствалул компанияртту ва ихIсандалул фондру.
Республикалул клиникалул азарханалул ожогирттал отделениялий ливчIун бур зараллу бивминнавасса ца хъамитайпа. Умуд бусса бур гагу хъин хьуншиврийн.
ЦIанасса ппурттуву гай къатравун цIуницIа буллуну бур чани ва щин, газ уттигу къабуллуну бур. ХьхьичIва гай къатравун газ бувцуну бивкIун бур ихтияр душиврул хIакъиравусса документру бакъана, цIана мунил хъирив лаллай бур.

Дагъусттаннай
бувгьусса мурхьру ябаврил хIакъираву

Дагъусттаннал вице-премьер Нариман АьбдулмутIалимовлул бусаврийну, шяраваллал ва шагьрурдал лагма дузал буван аьркинну бусса бур вацIлул ва паркрал зонарду.
Дарбантуллал, МахIач­къа­лаллал ва Хасавюртуллал лагма мукунсса зонарду дузал баву мурадрай ккаккан дурну дур вацIлул фондрал 924 гектар аьрщарал личIи дуван.
Талатаву дачин дурну дур бувгьусса мурхьру закондалий бакъа кьукьлакьисса иширттащал. 2024-2025 шиннардий официальну сияхIрайн лавсун бур 167 мурхь кьатI бувсса 32 иш. Миннуйну биян бувну бур 1 млн ва 885 азарда къурушрансса зарал. Материаллу дуллуну дур ихтиярду дуруччай органнахьхьун.
Региондалул бакIчинал тIи­мунийну, шагьрурду щюллишиврул балжан баврил давуртту дачин дурну дусса дур цIусса строительствалул проектирдал лагрулийгу. Ванал уттигу цал дакIнин бувтунни, царагу стройка дайдишин къадитан аьркинну бушиву, агарда ганил проектрай мурхьру бугьан ккаккан бувну бакъахьурча.

Дагъусттаннал Хъус-хъин­шиврул министерствалул каялувчи Заур Эминовлул бувсунни региондалий «Национальная система пространственных данных» тIисса паччахIлугърал программа бартдигьаврил хIа­къираву. Ванал тIимунийну, захIматсса масъалану личIлай бур сукку къатIисса хъуслил (недвижимость) Цасса паччахIлугърал реестрданувун шагьрурдал ва шяраваллал дазурдал хIакъиравусса сведенияртту лахъан баву. Му масъалалун хасну захIматсса тагьар дусса муниципалитетирттащал дачин дурну дур гьурттусса давуртту.

Республикалул жяматий­сса транспортрал лябуккулул хIакъиравусса конференциялул хIасиллайну кьамул був­­сса хIукмурдая бувсунни региондалул транспортрал министр Жамбулат Салавовлул. Ванал тIимунийну, пландалий бусса бур машан ласун уттигу 97 автобус. ЦIусса автобусру зузи буллан ккаккан бувну бур цIусса дуккаврил шин дайдишиннин.

Ххал бивгьунни мукунма МахIачкъалалив ххуллурдал чIутIру (пробкарду) бухлаган баврил масъала. Ваниха зий бур Дагъусттаннал Транспортрал министерство, МахIачкъалаллал администрация ва Дагъусттаннал Госавтоинспекция.