Октябрьданул 7-нний Дагъусттаннал Шяраваллил хозяйствалул ва бакIлахърулул министерствалий хьунни АПК-лул оперштабрал заседание. Ва дачин дурну ия министрнал цалчинма хъиривчу Шарип Шарипов.

ВКС-лул низамрай ваний гьуртту хьунни муниципалитетирттал бакIчитурал хъиривчутал ва районнал АПК-лул управлениярттал органнал калувчитал.

Заседаниялий районнал вакилтурал бувсунни ссуттил хъуру дугьаврил давурттая. Пландалий республикалий ссуттил хъуру дугьан ккаккан бувну бур 92,5 азарда гектарданий. Аьрщи гъай куну дур 62,8 азарда гектарданий, дургьуну дур 2,6 азарда гектар хъуруннал. Хъузалт гьаннарал дузалну бур 50 процентрал, шяраваллил хозяйствалул техникалул – 90 процентрал.

Шарип Шариповлул муниципалитетирттал вакилтурахь тавакъю бунни официальну тасттикь буван, циксса ссуттил хъуру ва циксса лагрурдай дугьантIиссарив. Мукунсса информация аьркинссар харжлугъирттал бутIа лахъансса субсидияртту ласайми кIулну бикIаншиврул. ПаччахIлугърал чулухасса кумаг хъузалтран баншиврул, цIанава хIадур хъанай бур республикалул даражалий.
Ппиринжрал бакIлахъру лакьаву цукун най дуссарив бувсунни Къизлардал ва Тарумовкаллал районнал вакилтурал. Дагъусттаннай аьмну гьашину ппиринж лакьин тIий бур 14,2 азарда гектардания, уттинин лавкьун бур 1,3 гектардания 5,3 азарда тонна кIяла къалмул. Ппиринжрал хъуру лакьлай бур 85 комбайн.

Мероприятиялий гьурттучитурал мукунма ххал бивгьунни ФГИС «Зерно», «Семеноводство» ва «ЕФГИС ЗСН» тIисса паччахIлугърал информациярттал системарттавун сведенияртту ласаврил масъалагу.
Заседаниялий гьуртту хьуминнал мукунма ххал бивгьунни хозяйстварттавусса мелиорациялул проектру бартдигьаврил ва цаймигу масъалартту.