Аьрасатнал ПаччахIлугърал Думалул депутат Хизри Абакаров вай гьантрай ивунни Сергиев Посадрайн. Ва иширая цала Телеграм-каналданий буслай, ванал кIицI лавгунни, иеромонах, отец Анатолий цала дус ушиву, сенатор Сулайман Каримовлун ванал барчаллагь баян бувшиву ххачпараснал культуралул гьайкаллу цIу дуккан дуван бувсса кумаграхлу.

Отец Анатолийл, шагьрулул дязаннивсса Свято-Троицкая Лавралий (чиваркIуннансса монастырь) экскурсия бувну, Хизри Абакаровлухь бувсун бур та аьвзалзаманнайва хIасул хьусса кIанттул тарихрая ва рувхIанийсса кьимат бусса кIану хъанахъишиврия.
Вайва гьантрай Сулайман Каримовлул ва Хизри Абакаровлул сипталийну Дарбантливсса Пресвятая Богородицал Покровский храмран пишкаш дурну дур хасну ва храмран тIий чивчусса Сергий Радонежскийл икона. КIицI лавгсса храмрал кашиш Михаил Лобовлуйн икона тапшур дурну дур Дарбантуллул бакIчи Ханлар Пашабаголул.
Дарбантуллал православ общиналул цIаниятугу отец Михаиллул барчаллагь увкунни Сулайман Каримовлухь ва Хизри Абакаровлухь ххаллилсса пишкашрахлу ва хасну ххачпараснал диндалулгу, мукунма циняв динналгу хIурмат бушиврухлу.

ПатIимат Рамазанова