Сентябрьданул 25-28-нний МахIачкъалалив хьунтIиссар «Открытый Дагестан» Аьрасатнал туристический форум ва халкьуннал художествалул сянатирттал Дунияллул халкьуннал дянивсса «Хранители традиций» цIанилусса фестиваль. Вайннуя бувсунни «Дагъусттан» РИА-лий хьусса пресс-конференциялий Дагъусттан Республикалул туризмалул ва халкьуннал художествалул касмурдал министрнал хъиривмур Анна Безруковал, культуралул министрнал хъиривмур Марита МухIадовал ва «Открытый Дагестан» форумрал продюсер Мария Богдановал.
Форумрал сакиншинначину хъанахъиссар Дагъусттан Республикалул Туризмалул ва халкьуннал художествалул промыслырдал министерство.
Форум даврил мурадругу укунссар: туризмалул даву, ва ххуллий дуллалимунил даража лавай баву, ваницIун бавхIусса пишакарсса площадка хIасул баву, Дагъусттан Республикалулгу, цайми регионналгу ва ххуллийсса гуж-кьудрат, потенциал майшан чаву ва хьхьичIунмай баву.
«Открытый Дагестан» форумрай ва «Хранители традиций» фестивальданий гьуртту хьун жулла республикалийн бучIантIиссар Аьрасатнал цинявппагу субъектирдаясса, Белоруссиянавасса ва Къиргъизттаннаясса хъамал.
Фестивальданул шадлугъирттал агьамми майданну хIисаврай язи бувгьуну бур Сулайман Стальскийл бульвар, ваницIухсса Пушкиннул кIичIираваллил бутIа. Мунийн бувну, сентябрьданул 15-нния 30-ннийн бияннин автомобиллан лавкьуну бур Пушкиннул цIанийсса кIичIиравалу.
Фестивальданул программа дур хъинну авадансса: Дагъусттаннал халкьуннал художествалул сянатирттал, Аьрасатнал регионнаясса, мукунма чил билаятирттаясса усттартурал каруннил дурмунил выставка, халкьуннал канил пишардал ва тIуркIурдал мастер-классру, халкьуннал дукрардал ва хIачIиярттал дегустация, миллатирттал яннарду ва ттизаманнул дизайнертурал яннарду ккаккан даву, концертру, киносеансру…
Фестивальданул цалчинсса кьини, сентябрьданул 25-нний, Р. ХIамзатовлул цIанийсса Национальный библиотекалий хьунтIиссар «Как развить интерес к народным промыслам? Народные промыслы и креативные индустрии» цIанилусса дискуссиялул панель ва «Стратегические направления развития народных художественных промыслов в современных экономических условиях» цIанилусса пленар сессия. КIюрххил ссят 11 хьуну тIиртIуну, щаллусса кьини Пушкиннул цIанийсса кIичIираву ковчеграл пурмалий бувсса павильондалуву ва С. Стальскийл цIанийсса бульварданий дикIантIиссар халкьуннал художествардал сянатирттал выставка. Шикку дикIантIиссар хасну ва иширан куну язи дургьусса ляличIисса затру, ччинаща вай машан ласунгу бюхъантIиссар. Шиккува бикIантIиссар мастер-классру, этнографиялул квест, халкьуннал тIуркIурду. Вай цимурца фестивальданул хъиривми гьантрайгу дикIантIиссар.
Ссят 15:00 хьуну Яруссаннал театрданул хьхьичIсса сахIналий хьунтIиссар республикалул халкьуннал культуралул фестиваль.
«Открытый Дагестан» форум тIитIлатIисса шадлугъ хьунтIиссар ссят 18:00 хьуну Яруссаннал театрданул хьхьичIсса сахIналий. Республикалул творчествалул пишакарсса коллективирттал ккаккан дувантIиссар концерт (ссят 18:30 – ссят 19:30 хьуннин). Вания махъ ца ссятрайсса концерт ккаккан дувантIиссар Дагъусттан Республикалул халкьуннал артистка Кристина Рамазановал. Хъирив ккаккан дувантIиссар «Кубачинский браслет» тIисса совет фильм.
Фестивальданул кIилчинмур кьини, сентябрьданул 26-нний, хьунтIиссар дизайнертурал янна ккаккан даву ва цаймигу шадлугъру. Тамашачитурал хьхьичIун буккантIиссар машгьурсса кавер-группа «Luxury Band».
Фестивальданул шамилчинсса кьини, сентябрьданул 27-нний, дяхтта хьунтIиссар семинар, ккуркки стол журалул личIи-личIисса батIавуртту. С. Стальскийл цIанийсса бульварданий тIурча хьунтIиссар лезгинкалул Ухссавнил Ккавкказуллал фестиваль (ссят 10:00 – 12:00 хьуннин ва ссят 15:00 – 17:00 хьуннин). Шикку мюрщисса ва чIавасса къавтIалтрал ккаккан бувантIиссар лезгинка къавтIаврил личIи-личIисса журарду: яруссаннал, лазгиял, чачаннал, гуржиял ва м.ц. Яла (ссят 18:00 – 19:00) хьунтIиссар 300-нния ливчусса инсантал гьурттусса аьмсса къавтIаву-лезгинка, цувгу духхантIисса Аьрасатнал Рекордирттал Луттиравун. Фестивальданий гьуртту хьунтIиссар цIа дурксса къавтIаврил «Лезгинка» ансамбльгу. Вай цимурцаннул ахирну хьунтIиссар гала-концерт (ссят 19:00 – 20:00). Вания махъ ккаккан дувантIиссар «Сказание о храбром Хочбаре» фильм.
ХьунтIиссар гьаваллал шатрал (воздушные змеи) фестивальгу. Бульварданиява хьхьирил ялувсса ссавнийн итабакьинтIисса шатрай оьрчIал ва искусствалул ишккаккултрал дихьлантIиссар жулла культуралул кодрацIун даркьусса суратру. Вай ва чIявусса цаймигу затру бувсунни ва кьини вай шадлугъирттал сакиншинначитурал. Оьвчаву дунни жяматрайн вай шадлугъирттайн хъуни кьуцурттащал, кIусса гьивурдащал къабукIлан. Мукунна къадагъа дикIантIиссар фестиваль наниссаксса хIаллай шиккун велосипедирттай, самокатирттай, ва журалул цаймигу затирттай бучIаврий, бигьалаглагиминнахун бахчилай, вайннуй ссур буллалаврий.
Бадрижамал Аьлиева
