Дагъусттаннал халкьуннал шаэр МахIаммад АхIмадовлул 70 шинал юбилейран хас дурсса мероприятие хьунни Оьруснал театрдануву.
Бусравсса хъамаллуравух бия Дагъусттан Республикалул ХIукуматрал председательнал хъиривчу Муслим Телякавов, Дагъусттаннал цалчинма президент МухIу Аьлиев, республикалул экс-бакIчи Рамазан АьбдуллатIипов, Аьрасатнал Чичултрал союзрал жаваблувсса секретарьнал хъиривчу Нина Попова. Дурккуна Аьрасатнал президентнал администрациялул каялувчинал хъиривма МахIаммадссалам МахIаммадовлул телеграммагу. Махъру лавхъцириннал бувсуна шаэрнал билаятрал ва Дагъусттаннал литература хьхьичIуннай шавриву хъунмасса бутIа бивхьушиву, мунал пасихIсса ва куртIсса шеърирду буттал улклухсса ччаврил вибувцIусса бушиву. ЦIанихсса балайчитурал, вайннавух МахIаммадтIагьир Синдикьовлул, Ххадижат Жамалуттиновал, увкуна шаэрнал мукъурттийсса балайрду. Дагъусттаннал халкьуннал артистка Лариса ХIажиевалгу шаэрнал мукъурттий тамашачитал хIайран банну увкуна балай яру мазрай.
ДакIнин бутанну, шаэр, таржумачи, критик ва публицист МахIаммад АхIмадов сайки кьунниха лирчусса шиннардий Дагъусттаннал Чичултрал союзрай каялувшиву дуллай ивкIшиву. Зий ивкIссар Аьрасатнал Чичултрал союзрал секретарьнугу, Поэзиялул театрданул худрукнугу. Ванал луттирду, чил мазурдийн таржума бувну, бувкссар кьатIаллил билаятирттайгу.
«Буттан цува хъинсса инсанну дакIний ливчIун ччай бия, мяйжаннугу «хъинсса давурттал председатель» угу ия », – увкунни ванал арснал, «Литературалул Дагъусттан» ва «ЧIавалачин» журналлал хъунама редактор, шаэр, публицист, издатель Мурад АхIмадовлул.
Бусан ливчIунни, хьхьичI кьини Дагъусттаннал паччахIлугърал университетрал ректоратравугу хьушиву МахIаммад АхIмадовлул творчествалун хас дурсса Профессортурал клубрал заседание ва ванийгу гьуртту хьушиву клубрал сопредседательтал Рамазан АьбдуллатIипов ва ректор Муртазааьли Рабаданов, мукунма профессор Людмила Авшалумова, Яруссаннал театрданул директор МахIаммад Бисавалиев, цаймигу аьлимтал, чичулт.
Хъирив кьини тIурча, шаэр лявхъу миналий, Гъуниннал райондалийгу, лахъа-хъунну кIицI ларгунни МахIаммад АхIмадовлул юбилей. Ваний гьуртту хьунни райондалул бакIчи Расул ХIусайнов ва Дагъусттаннал чичултрал делегация.
ПатIимат Рамазанова
