Гъумук цIу дуккан дуллай байбивхьунни агьалиная дартIсса ччюрк кIилчин ишла дуллансса кьяйда.
Ччюрк личIи-личIину датI­лансса къуршив бивхьуну бур хьхьичIва детсад бивкIсса кIанттай. Шикку гьарца ххуллункьини агьалинаща бюхъаван тIий бур цала дартIсса ччюрк арцух диян дуллан.

Чагъар ва кьянкьа чагъар – 50 къ./кг.
Пластик – 50 къ./кг.
Пюрун (шушри, банкарду, гъавгъсса пюрун) – 20 къ./кг.
Алюминдарал къутив – 100 къ./кг.
Арцу дуллан тIий дур найдунура.

Ва хъуннасса агьамшиву дусса сипталул ххуйсса асарду хIасул буллай бур дакIниву. Жунма дакIнийссар хьхьичIва жува цукун чялишну гьуртту хъанай бивкIссарув укунсса иширттавух.
Жула ник хъунна хьуссар тIабиаьтраха аякьалий. Жунма кIулссия гьарца шушлул кьимат – шанна дачIрасса шуша жура даххана дайссия ца лимонадрал шушлух. Чагъарду баххана бай­ссия альбомрах ягу тетрадирттах, дух хьусса, тIартIсса янналух жунна дулайссия ссихьри, шарду, муххах – арцу. ХIакьинусса тагьарданулгу жунма ккаккан буллай бур лавгмунил опыт цIунилгу ишла буллан багьлай бушиву. Ччюрк чIяру хъанай дур гьантлия гьантлийн, хаснура дукиялул ва ичIаллил техникалул къуршив. ТIабиаьт чапал шаврил буруккин хьхьичIххуттай бихьлай, райондалул администрация оьвтIий бур агьалинайн, гьарцаннан аьмсса мурадрал лагма лавгун, ччюрк ва аьркин дакъасса затру дартIун, ми кIилчингу ишла дуллан.
Ва сипталиясса хайр цуксса бикIанссарив зува пикри бувара.
Администрациялул про­граммалуцIун аьркинни агьалиналгу кабакьу бан, ттизаманнул жяматран аьркинсса экологиялул кIулшигу хIасул дулланшиврул.
Ларгсса ххуллункьини хьунни цалчинсса акция. Райондалул администрациялул бакIчинал хъиривчу Малик ХIусмановлул бусаврийн бувну, ччюрк ларсун бувкIун бур ххюцIалуннийн бивсса инсантал, хъунмурчIин, дуклаки оьрчIру.
«Жун ччай бур тарбия дан тIабиаьтрал хIурмат бусса ник. ОьрчIру чялишну гьуртту хьунни проектрай.Тапшур дурсса ччюрклих гьарца оьрчIал ляркъунни 400-500 къуруш.
Пикри буссар гьарца ххуллункьини буллан акция», – увкунни Малик ХIусмановлул.

Зулайхат Тахакьаева