Ноябрьданул 15-нний 100 шин хьунтIиссия хьхьичIунсса аьлимчу, изобретатель, цIуллушиву дуруччаврил пагьму бусса сакиншинначи, хIакин-практик, хирург, травматолог-ортопед Аьбдуев Багъдан Жабраиллул арснан. Ванал бигьа бакъасса оьрмулул ххуллу цала даврийн дакI тIайлану къуллугъ баврил эбратри.
Увссар ва Гъумук, 1948-ку шинал къуртал бувссар Дагъусттаннал медициналул институт, зун гьан увссар Къабардин-Балкьарнавун, тикку Терская тIисса райондалул азарханалий зий ивкIссар хирургну, яла арулла шинай зий ивкIссар Тырныаузрай комбинатрал медсанчастьрал хъунама хIакинну. Ванал хIарачатрайну бувссар стационар корпус. УвчIуну ивкIссар Тырныаузрал шагьрулул советрал депутатну. 1960-ку шинал Нальчикрайн ивзссар, тикку хIасул бувссар цалчинсса травматологиялул-ортопедиялул отделение. 1974-ку шинайнин ваний каялушиву дуллайгу ивкIссар. Республикалул штатрай акъасса хъунама травматолог хIисаврай, ванал лавайсса даражалийн гьаз дурссар травматологиялул-ортопедиялул даву. Яла ванал оьрмулул кьадар бавхIуссар Краснодардал крайрацIун, тиккугу цува ххаллилсса хIакингу, каялувчигу ушиву ккаккан бувссар. Шинайсса зий ивкIссар Краснодардал шагьрулул Цалчинмур азарханалул травматологиялул-ортопедиялул отделениялул хъунаману, хIасул бувссар шагьрулул Травматологиялул центр. Кьура шинал мутталий Краснодардал штатрай акъасса хъунама травматологну зий ивкIссар, пенсиялийн укканнин. Ванал хъунмасса бутIа ххи бувссар тIайлабацIу буну агьали хъин буллалаврил ххуллийсса давриву. Бухликкурал ттаркI гъаргъсса, ниттил лякьлувава ччаннал мушакъатсса инсантал хъин бувансса цIусса кьяйдартту дуккан дурссар. Ванал хIадур бувссар ххаллилсса хIакинтал, диркIссар чIун, Краснодардай травматологиялул-ортопедиялул мукьра отделениялул хъунимину ванал учениктал зий бивкIсса. Вай учениктурава кIиннал дурурччуну дур медициналул элмурдал кандидатътал хьунсса диссертацияртту.
ЧIярусса шиннардийсса захIматрахлу Багъдан Аьбдуевлул лайкь дурссар «РСФСР-данул лайкь хьусса хIакин», «СССР-данул цIуллушиву дуруччаврил отличник» тIисса цIарду.
Багъдан Аьбдуевлул кIива оьрчI тарбия бувссар. Арснал Владимирдул буттал пиша язи бувгьуссар, ортопед-травматологри, медициналул элмурдал кандидатри, чIярусса шиннардий каялувшиву дуллай ивкIссар Краснодардал областьрал муххал ххуллул азарханалул ортопедиялул отделениялий, мукуна зий ивкIссар Ухссавнил Ккавкказуллал муххал ххуллул Краснодардал отделениялул хъунама травматологну. Ва СКЖД-лул медициналул идарарттай цалчин суставру баххана бувсса (эндопротезирование) операциярду бувмари. Гьамин, ва хьхьичIуншиврухлу лайкь хьуссар Аьрасатнал цIуллушиву дуруччаврил министрнал ХIурматрал грамоталун. ХIакьинусса кьини зий уссар Ортопедиялул ва травматологиялул централ институтрал экспертну. Душ Земфира чIярусса шиннардий зий буссия учительтурал магьиршиву ларай дайсса Краснодардал институтрал доцентну, кафедралул хъунмурну. Просвещениялул отличникри цуппагу. Багъданнул арснал душ Роза зий буссар Краснодардал крайрал оьрчIал азарханалий хирург-офтальмоногну. Арснал оьрчI Багъдангу – Краснодардал МТС-лул регионнал дянивсса центрданул хъунама инженерну.
Багъдан Аьбдуев дунияллия лавгссар 2009-ку шинал июльданул 25-нний, увччунугу уссар Краснодардай. Ванал даву магьирну гихуннай дачин дурну буссар ваначIа кIулшивуртту куртIгу, цIакьгу дуван тIайлабацIу хьусса, ванаяту чIявусса затру лавхьхьусса учениктал- хIакинтал.
Кьурбанисмяил
Сулайманов
Таржума П. Рамазановал
