АцIния кIира шинал мутталий зий ивкIун ур Ма­хIаммадхIажи Къапланов 138 тухумрал тарих батI­лай, чичлай. Ва сайки 800-нниха ливчусса инсантуращал хьунаавкьуну ур лу чичлачийни, кувний кIийл-кIийла, шам-шамийлагума.

Ларгсса нюжмардий, хамискьини, Гъумучиял школалий «Гъази-Гъумучи ва вайннал тухумру» тIисса луттирал автор Идрислул арс МахIаммадхIажи Къаплановлущалсса хьунабакьаву хьунни, ва луттирал презентация хIисаврайсса. МахIачкъалалия бусравсса краеведнал, историкнал кьини хъун дуван бувкIсса хъамаллуравух бия Халкьуннал Мажлисрал депутатътал Артур Исрапилов ва Марат Илиясов, миллатрал ца чул бищай ттарцIну авцIусса ишккакку, Аьрасатнал Чичултрал союзрал член Шалласу Шалласуев, жяматийсса хьхьичIунсса ишккаккулт МахIаммад Айдаев, Аьбиди ХIайдаев, Дагъусттаннал халкьуннал шаэр Руслан Башаев, чIярусса шиннардий Халкьуннал Мажлисрал депутатну ивкIсса Зайннуллагь Мирзоев, Мариян Илиясовал цIанийсса «Дараччи» фондрал президент Гульшан Хасаева, чичу, публицист, ДГТУ-лул кафедралул хъунмур Нажабат Абуева, «Дагестан» ГТРК-лул Лакрал редакциялул хъунмур редактор Тамара Закарьяева, «Дагестан» РГВК-лул Лакрал редакциялул миллатирттал вещаниялул редактор Карина Далиева, жяматийсса ишккакку Аслан Аьлиев ва цаймигу бусравсса инсантал, хъамал. Мероприятие дайдишин хьхьичI хъамаллурал тIутIив дирхьуна Аьпалул багъравусса аьралитурансса мемориалдануцI. Хъирив хъамаллуран школалийх экскурсия бувна. Найбунува кIицI лаганна, шагьрурдайми школардаяр ссалчIавгу лувсса бакъашиву Гъумучиял школа, ялунгума хьхьичIунсса бушиву. Школалул актовый зал, щапI куну, ша бизансса кIану бакъа бувцIуну бия. Миллатирттал лаххиялувусса дуклаки оьрчIругу, культуралул зузалтгу мажлисрал программа ярг дуван хIадурнува бия. Мероприятие дайдишиннин ккаккан дурна Мариян Дандамаевал тIутIисса лакрал гимнрахун Гъумучиял тарихраясса видеоролик.

Дайдихьу дуллалисса махъ лахълай, Лакрал районд­алул хъунама Юсуп МахIам­мадовлул кIицI лавгуна Ма­хIаммадхIажи Къапланов райондалул ва республикалул жяматийсса оьрмулул иширттавух чялишну хIала уххайсса, лакрал тарих батIаврил, ябаврил ххуллий ва цаймигу агьамсса давурттаву хъунмасса бутIа бивхьусса хъуначу ушиву, ванащалсса хьунабакьавугу, ялун нанисса ник рувхIанийну тарбия даву мурадрайсса хъанахъишиву. – Жулва миллатрава чансса къабувкссар лакрал ва Гъази-Гъумучиял цIа гьаз дурсса, ххаллилсса давуртту дурсса вакилтал. Мукунсса уздансса кьюкьлуватусса ца хъанай ур хъунасса патриот, Гъумучатусса Къапланхъал тухумравасса Идрислул арс МахIаммадхIажи. Нагу буккав ванал ацIния кIира шинал му­тталий захIмат бувну чивчусса кIивагу том, ванийн антология учирчагу, къабяйкьинссару», – увкунни Юсуп МахIаммадовлул. Ванал маслихIат бунни, Лакрал ккурандалул чулуха ва луттирал цIа рищун республикалул паччахIлугърал премиялийн. МахIаммадхIажи Къаплановлул оьрмулул ххуллия ва ванал луттирдал цийнма биян бувсса асардания балжину бувсуна школалул директор Соня Макьаевал. Ванил кIицI лавгунни, лакрал тарихрал, маданиятрал, цивилизациялул бакIщаращину хъанахъисса буттал кIанттуя щакъалиххавай, ванихсса мякьшиврул, ванил тарих аьчгу, гьазгу буван къистташиврул цува буржлувну чIалай чивчушиву МахIаммадхIажи Къаплановлул гьайкалну личIансса лу, Пушкиннул «на ттунна нара гьайкал дирхьуссар» увкусса куццуй. – Луттирал цIа дуккирча, буккултран ххан бикIанссар так Гъумучиял тухумру утта буккан буллалисса. Юх, ва бур щалагу Лакрал тарих аьч буллалисса лу. Ва бур цала мархри, миллатрал тарих, ниттил маз къакIулсса инсантал лакрая къахьуншиврул чивчусса лу, – куна Соня Макьаевал цилва аьщуйн щусса, куртIсса докладраву. Муданма кунма, бюххансса ихтилат бувна Шалласу Шалласуевлулгу. Ваналгу кIицI лавгуна, МахIаммадхIажи Къаплановлул чивчусса кIивагу лу, Гъази-Гъумучиянгу, циняв лакрангу дирхьусса гьайкалну хъанахъишиву, дакъа тIий царагу шяравалу, цавагу тухум, Гъази-Гъумучиял тухумирттавух хIала къабувхсса. – Гъази-Гъумучи – ва бакIщаращир. ХIакьину жува ва къабуруччирча, жула жува якъабарча, я жува, я жулла чувшиву, я жулва тарих цайми инсантуран къааьркинссар. ХIакьину жуйвасса бурж бур жулва маз ябаву. На ура хIакьину нава шанна шинай ккалай ивкIсса школалий. Базовая школа бикIайссия, щалва Да­гъусттаннайгу, РСФСР-данийгу цIа дурксса, цалчинсса! Ва школалиягу, Гъумучиялгу, миллатралгу бюхттулсса тарих чивчусса МахIаммадхIажи Къаплановлул оьрмулия, луттирая жухьва хIакьину дуклаки оьрчIругу буслай бур. Ва школалул цIа-кьини лахъну дуручлай бушиврул барашиннар, – увкунни ванал. Барчаллагь увкуна ласнал агьамсса даврил хъар ларсун, ялув бавц1уну бивк1сса ванал кулпат Аьбидатлухьгу. Авторнахь барчаллагь тIисса, ванал даврин лахъсса кьимат бишлашисса ихтилатру бувна мукунма Артур Исрапиловлул, МахIаммад Айдаевлул, Руслан Башаевлул, Аслан Къажлаевлул, Аьбиди ХIайдаевлул, Гульшан Хасаевал.

ЛичIинура чIурчIав дуванна, Мариян Дандамаевал цIанийсса магьирлугърал школалул оьрчIал хъиннура яргу, чаннагу дуршиврий программа. Лакку мазрай экьинанисса балайрду, назмурду, сценкарду, дакIругу, яругу буччин къахьунсса, щакъалиххавайсса дия. Мероприятие лавайсса даражалий тIайла дуккан школалул коллективрал ва райондалул культуралул къатлул зузалтрал биялсса захIмат бивхьушиву чIалай бия.

Дия цамургу ххуйшиву ва мероприятиялий – бакIрая ччаннайн дияннин ларгуна марцIсса лакку мазрай. Нажават Абуевал кIицI лавгсса куццуй, оьрус мазрайсса луттираясса презентациягума дия лакку мазрай. МахIаммадхIажи Къаплановлул райондалул адиминистрациялухь, школалул коллективрахь барчаллагь тIисса ихтилатраву кIицI лавгуна, ппухълуннал бюхттулсса тарих кIулну къуццу тIутIаврил миллат гьаз бувайсса бушиву, лакрал тарих цIакьну ябансса наслу ялун най бушиву. Юсуп МахIаммадовлул МахIаммадхIажи Къаплановлуйх бавхIуна « Лакрал райондалул бусравсса гражданин» ушиву исват буллалисса лентагу, буллуна хасъсса дипломгу.
Ттунма хIисав хьусса ца укунсса иширайгу бацIан ччива. МахIаммадхIажи Къапланов цува ур аьрщарал элму дур­ккусса сянаткар. Лакрава цаймигу бувккунни, цивппа агрономтал бухьурчагу, миллатрал бусрав-барчаллагьрай кьамул буван­сса луттирду чивчусса вакилтал: ГьунчIукьатIатусса Амин Аьбдуллаев, Хъусращиял шяравасса Чанкура КьурбанмахIаммадов, Вихьлиятусса ХIажимурад ХIу­сайнов.

МахIаммадхIажи Къаплановлул хъинну хъуннасса даву дурну дур буттал улклул тарих, багьу-бизу, тIабиаьт лахьхьин ва жунма лахьхьин буван. Укун хъунисса ва агьамсса давуртту дазу дакъа буттал аьрщарах ччаву думиннал дувайнуккар. Агрономнал аьрщарахсса ччавурив личIинура цIакьсса, куртIсса дунуккар, щиннияргу хъинну миннан кIулну тIий аьрщарал туннурдал тарг-гу, аьрщарал къюву ва ххаришивугу. Ва луттирал кьиматгу ялу-ялунни лахъ хъанантIисса, уттизаманнул никиран ва ялун наниминнан рувхIанийсса хъус-ххазиналул кIанттай бацIансса буну тIий.
ПатIимат Рамазанова