Языковая экспедиция: обучение родному языку через игры и ролевые приключения» тIисса проектрал лагрулий МахIачкъалаллал А.Аджиевлул цIанийсса 29-мур школалий хьунни 12 дарсирай (кIулшивурттал программалул цалчинмур модуль) лавхьхьумунил хIасиллу дуллалисса дуклаки оьрчIал аттестация. 

ДакIнийн бутан, Дагъусттаннал бакIчинал грант дурххусса проектрал мурад бур ялун нанисса никиран тIуркIурдайну ва ттизаманнул интерактивный форматирттайну ниттил маз лахьхьин баву, оьрчIал дянив ниттил мазрал сий гьаз даву. Аттестациялул лагрулий оьрчIал кIулшивуртту ххал дурссар дакIнийхтуну ва чичрулийну. Ва чIумул мутталий агьамми лексикалул ва грамматикалул конструкцияртту лахьхьаврицIун, оьрчIан ишла хьунни маз тIуркIурдайну, командарттал квестирдайну ва творчествалул давурттайну.

Вай гьарзат хIадур дурну дуссар оьрчIан гъира бутансса, маз итххяххан бансса куццуй. КIицI лаган, оьрчIан, мяйжаннугу, гъира бур маз лахьхьин, хIарачат бунни контрольный даврийнгу ххуйну хIадур хьун. ОьрчIаву чIявуми, сайки циняв, бувагу маз къакIулсса бушиву хIисавравун лавсун, контрольный даврил хIасиллу оьккисса къархьунни. Аьмну хIисав дурну – 80% кIулшивурттал ккаккан бунни. Ванийнугу чIалай бур тIайласса методикалий зий бушиву ва оьрчIру гъира буну бушиву.

Ва кьинисса жул мероприятиялий гьуртту хьунни Дагъусттаннал халкьуннал мазру ва культура ядаврил фондрал вакилталгу. Вайннал ихтилат бунни учительтуращал ва дуклаки оьрчIащал, кIицI лавгунни дуккаврил даву гьарица чулуха аьркинсса куццуй дачин дурну душиву, маз лахьлахьиний тIуркIурду ишла баву чIявусса миллатру бусса регионнай ниттил маз лахьхьин баврил методикалувусса цIушиннану хьушиву. Ва сипта тIайлабацIусса душиву чIалай бия оьрчIавусса гьавасрайн бувнугу. Проектрал гьурттучитал барчаллагьрай бур дуккаврил процесс лавайсса даражалий сакин бан кабакьу бувсса «Триммиата» тIисса мусил ттучандалул хъуниминнайн. КIицI лаган, Дагъусттаннал Халкьуннал Мажлисрал депутатътуралгу хIукму бунни «Языковая экспедиция» проектрал гьурттучитуран кабакьу бан. Властьрал чулухагу, бизнесрал вакилтурал чулухагу укунсса къулагъас даврил буслай бур ниттил мазру ябаврил масъалалул агьамшиву каши думи­ннангу бувчIлай бушиву. Цалчинмур модульданул хIасиллайн бувну, проектрал гьурттучитурал ххал бантIиссар гихуннай ци даххана дан дурив, цукунсса цIушиннарду ххи дан дурив. ЦIанасса чIумал хIадур дуллай буссар кIилчIинмур модуль. Ва хъиннура авадансса, яргсса хьунссар тIисса умуд бур, цанчирча программалуву ххи хьуссар цIусса темарду.
ДакIнийхтуну барчаллагьрай буру ва ххуллий жула чIарав бацIлацIиминнайн: педагогтурайн, нитти-буттайн, дуклаки оьрчIайн, спонсортурайн, депутатътурал корпусрайн, гьай-гьай, Республикалул бакI дургьуминнайнгу жуйнна дурсса вихшалалухлу ва маз ябаврил ххуллий дузал дурсса шартIирдахлу.

Андриана Аьбдуллаева