ДР-лул Журналистътурал союзран 60 шин
хъанахъисса юбилейран хасну
Ххуллункьини ДГУ-лул конференц-залдануву Дагъусттаннал журналистурал союзран 60 шин хъанахъисса юбилейран хасну « Миллатирттал прессалул Дагъусттаннал халкьуннал культура ва мазру буруччавриву бугьлагьисса кIану» тIисса элмийсса батIаву хьуна .
Конференция бачин бувну ия ДГУ-лул ректор Муртязали Рабаданов. Ваний гьурттушинна дуруна республикалул СМИ-рдал каялувчитурал, зузалтрал, министерстварттал ва ведомстварттал пишакартурал, жяматийсса ишккаккултрал, ДР-лул Халкьуннал Мажлисрал депутатътурал, вузирдал преподавательтурал ва студентътурал. БатIаврил дайдихьулий Муртазяли Рабадановлул циняв барчагу бувну, кIицI лавгуна Дагъусттаннал миллатирттал культурагу, мазругу, тарихгу буруччавриву хъунмур бияла миллатирттал прессалухь бушиву.
Залму АьбдурахIманова
«Ттул пикрилий, чIявумиллатру яхъанахъисса Дагъусттаннай миллатирттал пресса багьайсса даражалий, лахъмур шачIанттуй ва миллатирттал мазру буруччавриву хъунмур хъар ларсун бачин аьркинссар», -куна ванал
ДР-лул Журналистътурал союзрал председатель, «ХIакъикьат» кказитрал хъунама редактор Аьли Камаловлул цаламур ихтилатравугу чIурчIав дуруна хIакьинусса кьини миллатирттал прессалул хьхьичIух баруну дарцIусса дайшишрурдай, прессалул хъинми чIунну махъ къалирчIшиврийнсса умудирттай ва уттизаманнул тIалавшиннардацIун бавхIусса «цIуцIи кIанттурду» ца чулийн буккан бансса чараннай.
«Шиная шинайн арх дуцлай дур жула ялун нанисса жагьилмур ник миллатирттал аьдат-эбадатирттаягу, культуралия ва ниттил мазраягу. Процесс най бур жухьвагу къацIувххуну. Вай дуцинну лув личIлайнугу, дагъусттанлувтал оьтту-ттурчIавува дагъусттанлувталнува личIантIиссар. Миллатирттал мазру буруччавриву, ттул пикрилий, паччахIлугърал мазрацIун ниттил маз бачин бавугу, лув багьан къабивтун му гьаз бавривугу ца тIайла бацIансса ххуллу-ххану чIалай бур»,-кIицI бувна ванал.
Республикалул районнал кказитирттацIун бавхIуну, Аь.Камаловлул чIурчIав дуруна, хаснува шяраваллил кIанттурдай ялапар хъанахъисса халкьуннал чIу хIукуматрайн биян баймур хъар районнал прессалий душиву.
«Шяраваллил кIанттурдайсса редакциярттал зузалт оьрмулул 70 шиннардиха ливчусса халкь бунугу, вай хъанахъиссар миллатрал мазгу, культурагу, аьдатругу дуруччавриха зузисса халкь. Жул мурадгу, республикалул этно СМИ-луцIун, районнал прессагу буруччавур»,-кIицI бувна ванал.
Аьли АхIмадовичлул чIурчIав мукунна дуруна ца цамургу иширай. Дагъусттаннал экономикалуха зузисса, республикалул маэшатрал даражалул ялув бакIцIуцIаву дуллалимигу миллатирттал мазурдийсса кказит-журналлая ятну бавцIуну бушиврия ва цала хъуслил реклама оьрус мазрай буккаймур прессалийн дуллуну гьашиву дуллай бушиврий.
«Мисалдаран, республикалул кьатIув, билаятрал цайми регионнай цIа ларгун дур Дагъусттаннаясса цаппара хъуслил, дуки-хIачIиялул. Миннуйн цIана учай «брэнд» куну. Цалнияр цал туризмалул ишругу ххуйну най бухьувкун, агьулданунгу бусрав хьуну дур этнокультуралуцIун, этностильдануцIун дархIуми хъус-матахI. Ва заманнай жула чIявусса дагъусттанлувталгу ватандалул кьатIув зий-занай, ялапар хъанай бур. Циванни ишбажаранчитуран ниттил мазрайсса кказит-журналлайхчIин цалла хъуслия къабуслан? Ниттил мазрайхчIин агьалинахь, жяматрахь цала итадакьлакьимур машгьур къадуллан?»,-тIий ия Аь. Камалов.
Миллатирттал мазру лахьхьавриву хIакьину дуллалисса давурттая ва ДГУ-лул филологиялул факультетрайсса дагъусттаннал миллатирттал отделениялий хIакьинусса кьини ци тагьар дуссарив шикку бувсуна мазурдил кафедралул хъунама, филологиялул элмурдал доктор Муса БахIаммадовлул.
«ДГУ-лул дагъусттаннал мазурдил отделениялий хIакьинусса кьини 6 миллатрал мазурдил пишакартал хIадур буллай буссар. Амма дуссар, цаппара шиннардил хьхьичI ишлану ва щуруй диркIсса, 11 миллатрал мазрал пишакартал хIадур бансса циняр шартIру. Студентътал къабукIлай тIий цаппара лакьин багьунни. Буми группардавугу шиная шинайн чан хъанай бур. Мисалдаран, гьашину жучIа ва отделениялийн дуклан увкIунни 161 студент»,-кIицI бувна ванал.
Миллатирттал мазру ва ниттил мазрайсса кказит-журналлу буруччаврил цIаний дан багьлагьисса давурттаясса ихтилатру мукунма бувна ДГУНХ-рал президент, академик ХIамид Бучаевлул, жяматийсса ишккакку Денга Халидовлул, Зикрулла Илиясовлул, «Дагестанская правда» кказитрал хъунмур редактор Бурлият Токбулатовал, «Дагъусттан» басмаханалул хъунама УмархIусман ХIажиевлул, ДР-лул культуралул министрнал хъиривчу Марита МухIадовал ва ДР-лул кIулшивуртту дулаврил министрнал хъиривчу Ширали Аьлиевлул.
Конференциялул ахирданий гьурттучитурахь бувккуна миллатирттал СМИ буруччавриву дан аьркинсса давуртту кIицI дурсса ДР-лул Журналистътурал союзрал цIаниясса хIукуматрайнсса оьвчаврил чагъар. Аь.Камаловлул кIицI бувна, хIукуматрайн чагъар тIайла буккан хьхьичIгу гьарца гьурттучинал чагъарданул хIакъираву ххи бансса пикрирду ва маслихIатругу хIисавравун ласунтIишиву.