Дагъусттаннал БакIчи Сергей Меликовлул каялувшиврий хьунни ДР-лул Ччуччиялул ва энергетикалул комплексрал (ТЭК) цаппара идарарттал цачIусса зузи группалул батIаву.
Муний гьуртту хьунни «Газпром межрегионгаз» ООО-лул гендиректор Сергей Густов, «Россетти Северный Кавказ» ПАО-лул гендиректор Роман Левченко. Ххал бигьлай бия республикалун чара бакъа дузал буван аьркинсса масъалартту: Дагъусттаннал шяраваллу газрал дузал даврил проектру ччяни бартдигьаврил, электросетирдал комплекс вихшала дишинну зузи баврил ва цаймигу миннуцIунсса масъалартту. ЛичIину ххал бивгьунни электросетирдал хозяйство ялун дучIансса кIинтнил чIумуйн хIадур даврил масъала.
Дагъусттаннал БакIчинал тIимунийну, республикалул 11 райондалийн газ бувцуну бакъар, цамур цавагу региондалий мукунсса тагьар дакъар. Къааьркинссар мунил жаваблувшиву ца блокрал цамур блокрай дихьлан, аьркинссар мюнпатсса чаранну лякъин.
Сергей Меликовлул бувсунни мукунма мукунсса чаранну хIадур буллай бушиву.
«АьФ-лул Президентнал цаппара тапшурлугъру дурунни республикалул циняв шяраваллавун газ буцаврил проектру ччясса мутталий бартдигьин аьркиншиврул хIакъираву. Мунияту жунна аьркинссар давуртту анавар дуккан дуван», – кунни республикалул каялувчинал.
Ххал бигьлагьисса масъалалул хIакъираву махъ лавхъунни ДР-лул энергетикалул ва тарифирттал министр Ризван Мурадовлул. Мунал тIимунийну, 2020-ку шинал «Газпром» ПАО-лул цIакь дурну дур республикалул шяраваллу 2021-2025 шиннардий газрал дузал даврил программа. Ми давурттан харж дантIий дур 13,1 млрд къурушру. Газ буцин тIий бур 202 шяравусса 41 азарва къатлувун.
ХIакьинусса кьини 1720 заявка дур газ буцаврил хIакъираву, чирчуну дур 112 кьутIи, 74 къатлувун итабавкьуну бур газ.
Сергей Густовлул бувсунни газораспределитель сетирдал инвентаризация дуллай бушиву, ми дакьин дуллай бушиву ва заллухъру бакъасса сетьру сияхIрайн ласлай бушиву.
«Газпром межрегионгаз Махачкала» ООО-лул гендиректор Александр Давыдовлул тIимунийну, 2025-ку шинайннин строительствалул ва монтажрал давуртту бартдигьин тIий дур 23 райондалий, миннувух дур Ккуллал, Лакрал ва Рутуллал районнугу.
Роман Левченкол бувсунни Дагъусттаннай электросетирдал комплекс вихшала дишинну зузаврил программа щурунтIий душиврул хIакъираву. Миккун харж дантIий дур 35 млрд къуруширттал.
БатIаврий ихтилат хьунни мукунма гьашину кIинтнил чIумуйн уттива хIадур хъанай бушиврул хIакъиравугу.
