Совет Союзрал кIийла Виричу АхIмад-Хан Султаннул цIанийсса МахIачкъалаллал аэропортрай дунни гьашинусса шинал шанма кварталданул мутталийсса давурттал хIасиллу.
Январь зуруя байбивхьуну, цIанасса ппурттувун бияннин, аэропортрай кьамул увну ур 2 314 636 пассажир, ларгсса 2023-ку шинаяр 5,0 % ххишаласса.
Шанма кварталданул мутталий аэропортрайн ва аэропортрая дурну дур 17 499 рейс, ларгсса шинал вара чIумущал цачIу бивхьуну 2,3 % ххишаласса.
Кьамул дурну дур ва тIайла дурккун дур 3143 тонна кьайлул ва почталул, вайгу 21,9 % ххишаласса ларгсса шинал вара чIумух бурувгун.
ХIакьинусса кьини МахIачкъалаллал аэропортрая яла тIалавми рейрсру дур Москавлийн, Санкт-Петербурглийн, Сургутрайн, Екатеринбурграйн ва Къазаннайн. Дунияллул кьатIувсса билаятирттайнсса рейсирдава яла тIалавми дур Дубайлийн, Стамбуллайн, Бакуйн, Анталиянавун ва Ташкантлийн.
Пассажиртурал дянив яла тIалавми авиакомпанияртту дур «Победа», «Аэрофлот», «Уральские авиалинии», «Ред Вингс».
МахIачкъалаллал аэропортрай тIитIлайнна дур цIу-цIусса рейсру. Ванил исват буллай бур жула аэропорт Ухссавнил Ккавкказуллал Федерал Округрай яла чIявуми пассажиртал кьамул буллалисса авиапредприятиялун ккаллину бушиву.
Имара Саидова
