Уттигъанну мукьцIал лавхъунни Юсуплул арс ХIасанов Гьарун жуятува личIи хьуну.

Гьарун увну ур Ккуллал шяраву 1934-кусса шинал Юсуплул ва Къизакьурваннул къушлий. Ппу Юсуп хъунмасса хIаллай зий ивкIссар Ккуллал шяраваллил советрал председательну.
Хъун дяъвилул шиннардий нитти-буттан оьрчIру ччаннай бацIан баннин хъунмасса захIмат бишин багьайсса бивкIссар. Ниттил Къизакьурваннул, колхозраву захIмат буллай, цицIухва кумагран оьрчIру ва душругу зузи бувну, ичIаллил хозяйствагу дачин дурну, оьрчIаяту захIмат ххирасса инсантал хьун бувссар.
АпатI хьуну, ппугу ччяни ялату лавгун, хъунмур хъар ниттийн дагьшиву чIалай, Гьаруннун оьрчIнийва кIул хьуссар захIматрал кьадру. Школалий дуклай унува, ва зий ивкIссар почта бачIуну махъми уссур-ссу хъуни бан, дуккин бан бюхъаншиврул. Гьаруннул цалва бусласаврийн бувну, дяъви нанисса шиннардий, ххарисса чагъар лавсун увкIсса чIумал, кани-кIунттихьхьунгу ци-дунугу дуллуну, цувагу ххира-ххуй айсса ивкIун ур. Амма фронтраясса аьсивсса чагъар бувкIсса базилухь, чагъар булун сикъаслайгу ивкIун, яла, буллусса чIумал, заллухъруннащал цувагу аьтIун икIайсса ивкIун ур.
1953-кусса шинал, ЧIяйннал дянивмур даражалул школа бувккуну махъ, цаймигу урчIа-ацIа райондалиясса оьрчIащал, учительтал биял къахъанай буну, Гьарун Хасаврайсса педучилищалувун дуклан лавгун ивкIссар. Ми 10 класс бувккусса буну тIий, ца шинайсса дарс дишаврил кьяйдардугу лахьхьин дурну, учительталну зун махъунмай Ккуллал райондалийн гьан бувну бивкIссар. Вай ххару чичлачимагу та ппурттуву гава училищалуву дуклай ивкIссар. Группалуву Гьарун хьхьичIун лавчусса, лидер зумунусса хасиятрал оьрчIну икIайва.
ЦIу бутIуй Гьарун зий ивкIссар СунбатIуллал школалий. Ца кьини, дарсирай унува, СунбатIлив леххаву дуркIссар, шяраваллил лув машиналул авария хьуну дур тIисса. Леххаврий наниминнавух левчуну увкIсса Гьарун ивссар ивкIуну тинай ивхьусса цала буттал ялун. Советрал председательсса ппу депутатътуращал Ваччав райсоветрал сессиялийн нанисса ххуллий хьуну диркIун му захIматсса авария.
Муния мукьах Гьарун зий ивкIссар Ккуллал школалий. Къуртал бувссар Дагъусттаннал университетрал филологиялул факультет.Яла зий ивкIссар Ккуллал райкомрай, «Илчи» кказитрал кIирагу райондалул корреспондентну, партиялул ва профсоюзрал давурттай, шяраваллил хозяйствалул управлениялий.
Махъсса 15 шинал мутталий зий уссия Дагъусттаннал радио-комитетрай.
Ванал канила бувкссар «Оьрмулухун дакI жагьилнура», «Дусшиврул ламурду», «ЯхIлувтал», «Оьрму лажин кIялану» тIисса луттирду.
Гьаруннул хIалал дурссар «ДР-лул культуралул лайкь хьусса зузала» тIисса цIагу.
Юсуплул арс Гьарун ХIас­ановлул уздансса цIа мудангу личIантIиссар ванащал зий бивкIминнал, ва кIулну бивкIминнал дакIурдиву чаннасса аьпалул ххуттай. Цал бунагьирттал аьпа баннав!

ХIусайн Давыдов,
ш. ЧIурттащи