Вай гьантрай Дагъусттаннай ларчIсса гужсса гъараллал чIявусса зараллу биян бунни. Дагъусттаннал бакIчи Сергей Меликовлул тапшур бувну, властьрал органну зий дур хьусса иширттал ялув.
Мунил хIакъираву Ситуационный центрданий хьунни властьрал органнал каялувчитал, луртаннал дузалшиннарал организацияртту, районнал бакIчитал ва МЧС-рал вакилтал гьурттусса Штабрал заседание. Шагьрурдайсса ва районнайсса тагьар ххал диргьуну махъ премьер-министр ивунни МахIачкъалаливсса яла зарал бивми объектирдайн.
Аьбдулмуслим Аьбдулмуслимовлул, хIасул хьусса тагьаргу кIицI ларгун, къатравун щин ххярххун, инсантуран хьусса зараллал хIакъи-хIисав дан аьркиншиву бувсунни.
ЗахIматсса тагьар хIасул хьунни гъараллу лачIлачIисса гьантрай МахIачкъалалив, Каспийскалий, Избербашлив, Дагестанские Огнилив, Дарбантлив ва Къаякантуллал райондалий. Зувинния ливчусса коммунал къуллугъирттал бригадартту, 124-нния ливчусса пишакартал ва 45 техника зий дия МахIачкъалалив гъараллал зараллу биян бувсса кIанттурдай.
Чани левшсса кIанттурдай зий бия 60-нния ливчусса «Дагэнерго»-лул бригадартту. Дарбантлив марцI дунни гъарал щинал канализацияртту. Избербашлив коммунал къуллугърал итххярхсса щинацIа марцI дунни 30 хIаят.
Щин ялтту ларгсса кIанттурдайн бивунни
Премьер-министр Аьбдулмуслим Аьбдулмуслимов ивунни «Приморская» подстанциялийн. ЧIярусса гъараллал ванил лагма-ялттусса кIичIиртту, «Пальмира» микрорайон хIалану, щинавун дюкьан дурну дур.
Шиккусса тагьар ххал дан мукунма бувкIунни Дагъусттаннал МЧС-рал бакIчи Нариман КазимахIаммадов, МЧС-рал Агьаммур управлениялул каялувчи Муслим Девришбагов, промышленностьрал министр Низам Халилов, «Россети Северный Кавказ» — «Дагэнерго» ПАО-лул филиалданул директорнан кIанайсса МахIаммад Шяпиев.
Черкес-Озень нех марцI дунни
Дагъусттаннал бакIчи Сергей Меликовлул тапшур бувну, премьер-министр Аьбдулмуслим Аьбдулмуслимов ивунни ларчIсса гъараллу сававну щин ялтту ларгсса Черкес -Озень неххайн. Ванащал бия МахIачкъалаллал мэриялул каялувчитал, ТIабиаьтрал луртаннал ва экологиялул, Промышленностьрал ва машлул, МЧС-рал министртал. Неххайхсса ламурдачIа цачIун дартIсса пластикрал шушрал щинал ххуллу бавщуну, ялтту ларгсса щинал лагма-ялттусса кIанттурду бюкьан бувну бур. Зарал бивну бур МахIачкъалаллал Ленинский райондалийсса Речная кIичIираваллин.
КIицI лаган, 2022-2024-ку шиннардий нех марцI дурну диркIун тIий, неххал зумарду ласун къадурну дур. Дагъусттаннал тIабиаьтрал луртаннал ва экологиялул министр Ратмир Расуловлул бусласимунийн бувну, лирмур дакьин дан ва щин цIуницIакул ялтту къалагансса чаран лякъаву мурадрай шикку зузи дурну дур 12 техника.
Андриана Аьбдуллаева
