Рамона Дунайцева луглай бур ттаттайхчинсса цила гъанчувнах. Ванил ттатта, ХIажинал арс Оьмаров МахIаммад, лаккучу ивкIун ур.
Увну ур 1910-ку шинал Гъумук. 1934-ку шинал ванал бувцуну бур 1919-ку шинал Майкопрай бувсса кубаннал казачка Елена Александровна Дорохова. Рамонал ниттил бусласимунийн бувну, хъатIи бувну махъ дачIи шинай вай ялапар хъанай бивкIун бур Гъумук. Дяъвилийн гьаннин МахIаммад зий ивкIун ур МахIачкъалалив, кказитрал корреспондентну ягу фотокорреспондентну. Ванал уссурссу: Оьмар, Расул, ХIажи, Исяй ва ПатIимат. Исяй дяъви къуртал хьуну махъ Узбакисттаннай ялапар хъанай ивкIун ур. Мунащал архIал тийх бивкIун бур ПатIимат тIисса инсан (кулпат ягу ссу). Минная Ригалийн посылкарттугу дучIайсса диркIун дур. Рамонал ниттил бусласимунийн бувну, гъанчунащалсса дахIаву дурцун дур 1947-1949-ку шиннардий, ми аьпалухьхьун лавгун махъ. 1937-ку шинал май зурул 25-нний Къизлардай МахIаммадлун ва Еленан бувну бур душ. Мунин цIагу дирзун дур Белла. Амма свидетельствалий ванил бувсса кIану Моздок ккаккан бувну бур. Микку лавсъсса свидетельствалий фамилиягу Амарова тIий, гъалатIращал чирчуну дур. 1944-ку шинал МахIаммад ятIатIар бакъа акъа хьуну ур тIисса хавар баяйхту, Елена Беллащал Ригалийн бивзун бур. 1949-ку шинал кIанттул военкоматрайн ванил душнинсса пенсиялул хIакъиравусса аьрза буллуну бур. 1956-ку шинал Ригалий Беллал къуртал бувну бур Медициналул училище. Муниннин хьхьичI однокурсницал бувсун бур ванихь цуппа военкоматрай практикалийсса чIумал тиккун увкIун ивкIшиву Ригалий цала душних, Беллах, луглагисса Оьмаров МахIаммад тIисса адамина. Му чIумал Белла военкоматрая мунахьхьун дулунтIисса адресрай ялапар хъанай къабивкIун бур. 2024-ку шинал интернетраву Рамона тIайлабавцIуну бур кьюлтIшиврува дуккан дурсса НКВД-лул архиврайн. Мичча ванин кIул хьуну бур МахIаммад дяъви къуртал хьуну махъ милицанай зий ивкIшиву (бюхъай МахIачкъалалив).
Бюхъай МахIаммад Оьмаров Гъумук къаувну, цания ца лагмасса шяраваллаву увсса икIангу, цанчирча Гъумук цIухху-бусу буллай, ваная цичIав кIул бан бювхъуну бакъар.
ХIурмат бусса буккулт, ва текст лакрацIун бавхIусса бухьувкун, жула кказитрайгу бищун ччан бивкIунни, балики, вай инсантал кIулсса, вайннан маччасса цучIав уккайрив ккаккансса пикрилий.
