Ва зурул 31-нний Лакрал театрдануву хьунтIиссар Дагъусттаннал лайкь хьусса артистка Зинаида Чавтараевал бенефис.
Зинаида Чавтараева бур жагьилсса, оьрмулух къабурувгун, так ца Лакрал театрданул бакъасса, щалагу республикалул театрал магьирлугъраву ца хьхьичIунсса ххуттайсса актриса.
Жагьилсса актрисал гьунар аьч буллалиссагу, тамашачитурал дакIру ясир данссагу, театрал магьирлугърал оьрмулувунсса ххуллу цIурттал бакьинссагу хьуну дур ацIния мяйра шин бартларгун-къаларгун, театрданувун бувкIун, цалчинна-цалчинсса творчествалул даврин ккаллисса «Ччаву ва макь» спектакльдануву дургьусса Гъумучиял ПатIиматлул роль (режиссер, Аьрасатнал лайкь хьусса артист Аслан МахIаммадов).
Гьамин, ва рольданухлу актриса лайкь хьуссар 2020 шинал «Воспетые Дагестан» тIисса Дагъусттаннал миллатирттал театрдал дянивсса фестивальданий «За лучшую женскую роль» дипломран.
АцIния ххюра-ряхра шинал мутталий репертуардануву бур, хIакьинугу тIалавнува бур тамашачитуран, мякь къалиххансса бур бюхханну Зинаидал ккалаккисса Гъумучиял ПатIиматлул шеърирду.
Яргсса ва дакIний личIансса дур ацIния мяйра шинал манзилданий сахIналий ванил ккаккан дурсса цумур-цагу сипат.
Зинаидахь дарс дирхьусса учительтурал хьуннав, архIал дуклай бивкIминнал хьуннав дакIнин бутай, ванил ххуйну балай учайсса бивкIшиву школалул мероприятиярттай ва актриса хьунсса хиялгу чIивинияцIава бивкIшиву.
МахIачкъалаллал музыкалул училищалуву дуклай бунува, театрданун балай учайсса актриса аьркинну бур тIисса баян баву ххал хьуну бувкIун бур. Ххуйсса чIу-такьва, балай учаврил гьунар бушивруцIун, лакку мазгу марцIну кIулну бушиву хIисав шайхту каялувчитурал Зинаида ххарину кьамул бувну бур. Найдунура агьаммур рольгу дуллуну дур В. Эфендиевлул «Мурадирал щаращи» тIисса спектакльдануву. Экзаменну хьусса ва рольдания махъ куннил хъирив кув цаннияр ца тIайлабацIусса рольлу.
ХIакьину Зинаида Чавтараевал репертуардануву дакъар тамашачитурал асардай къалирчIсса роль царагу. ЛичIи-личIисса жанрардал ва хасиятирттал духьурчагу, цумур сипат ласурчагу – яргсса, классикалулсса хьуннав, миллатрал драматургиялулсса хьуннав: Шекспирдул героиняхъул Джульетта, Офелия, Катарина («Ромео и Джульетта», «Гамлет», «Тарс мютIи баву»); Адела Ф. Г. Лоркал «Бернарда Альбал къатта»; Сона А. Церетелил «Ханума»; Анжелика Ж. Мольердул «Кьякьлухун ивхьусса лас»; Марья Антоновна Н. Гогольлул «Ревизор»; Жалин Ф. Г. Лоркал «Оьсса кьадар»; Лариса А. Островскийл «Сунчи» Алиман Ч. Айтматовлул «Ниттил хъу»; Бэла М. Лермонтовлул «Герой нащего времени».
У. Шекспирдул «Тарс мютIи баву» спектакльданувасса Катаринал рольданул тIурча, Зинаида ххишала бакъа машгьургу, ххирагу бунни тамашачитуран.
Зинаида Чавтараева гьурттусса спектакльлу яргсса ишну хьуссар республикалул, Аьрасатнал ва дунияллул халкьуннал дянивсса лагрулул фестивальлай, цил творчествалун билаятрал хьхьичIунсса театрал критиктурал лавайсса кьиматран кIицI лавгсса. Цила творчествалул ххуллий Зинаида Чавтараева уттинин цимилвагу лайкь хьунни «За лучшую женскую роль» бахшишран: «Гъумучиял ПатIимат» спектакльдануву ПатIиматлул рольданухлу «Воспевшие Дагестан» фестивальданий (режиссер Аьрасатнал лайкь хьусса артист Аслан МахIаммадов); У. Шекспирдул «Тарс мютIи баву» спектакльдануву Катаринал рольданухлу (режиссер Ухссавнил АьсатIиннал ва Къабардин-Балкьарнал Республикарттал халкьуннал артист Гиви Валиев) дунияллул халкьуннал дянивсса миллатирттал театрдал фестивальданий; А. Островскийл «Бесприданница» спектакльдануву Ларисал рольданухлу «Горячее сердце» тIисса дунияллул халкьуннал дянивсса оьруснал классикалул фестивальданий (режиссер Аслан МахIаммадов); Ч. Айтматовлул «Ниттил хъу» спектакльдануву Алиманнул рольданухлу «Южная сцена» дунияллул халкьуннал дянивсса театрал фестивальданий (режиссер Гиви Валиев).
Хъунмасса тIайлабацIу хьуссар тIиссара Лакрал театрданун Зинаида Чавтараева кунма гьайбат ххуйсса, гьунар ххисса, цила даву ххирасса, ссаяргу лакку маз цила багьайкун кIулсса, жагьилсса актриса бакIрайн багьаву. Цил дакIнийхтунусса захIматрал агьамсса кIану бугьлагьиссар Лакрал театрданул цIа бюхттул дан, Дагъусттаннал театрал магьирлугъ авадангу, хьхьичIуннайгу дан.
Актрисал бенефис унгу-унгусса байранну хьунтIиссар ванил творчество ххираминнан. Ва хьхьуну тамашачитураща бюхъантIиссар цал ххишала ккаккан актрисал язими рольлавасса бутIри, ванил даврил уртакьтурал балайрду.
Бухьхьияра зунма ххирасса актрисал кьини хъун дуван!
