[dropcap]Ц[/dropcap]Iуминалийсса Шушиннал шяравусса школа гьануцIакул цIу буккан буллалисса давуртту дачин дурну бур «100 школа» тIисса проектрал лагрулий.
Шиккува бусан, Дагъусттаннал БакIчи Владимир Васильевлул сипталийну жула региондалий зузи дурну дуссар школарттал материально-технический базарду цIу буккан баву мурадрайсса «100 школа» тIисса проект.

Проектрал лагрулий Шушиннал шяравусса школалий дуллалисса ремонтрал давуртту дуллай бур региондалул ва райондалул бюджетирттава итадаркьусса арцух, мукунма меценатътурал ка-кумаг баврийну. ХIакьинусса кьини ва школалий проектрал ва сметалул документациялуву дан ккаккан дурсса давуртту сайки дузал шавай дур. Дакьин дуллай, цIу дуккан дуллай бур магъи, дуллай бур электричествалул ва отоплениялул давуртту, мукунма бакьин буллай бур спорт площадка, дуцлай бур гъилисса щин, кIива кабинет­раву дурну къуртал давай бур гьануцIакулсса ремонт. Проект иширайну дузрайн ду­ккан даврин ккаккан дурну дур 2 млн ва 533 390 къуруш, миннува 2 млн региондалул бюджетрава, 100 азарда къуруш райондалул бюджетрава ва 433 390 къуруш меценатътурал кумаграйну.
Вай гьантрай школалий дуллалисса давурттал ялтту уккан увкIунни ЦIуссалакрал райондалул бакIчи МахIаммад-ХIажи Айдиев, архитектор Рашидов ЦIаххи, Шушиннал шяраваллил бакIчи Камил ХIажиев ва школалул директор Шакират Абакарова.

Райондалул бакIчинал подрядчиктуращал цIухху-бусу бувну махъ, кIицI лавгунни давуртту ккаккан дурсса чIумуй дурну къуртал дантIишиву ва ду­ккаврил процессрахун дахчинсса дайшишру къадикIантIишиву. Мукунма, МахIаммад-ХIажи Айдиевлул ххал диргьунни ремонт дан ишла дуллалисса материаллу цукунсса даражалул дуссарив.
ДакIнийн бутанну, «100 школа» тIисса конкурсрал проектраву ххув хьуминнан региондалул бюджетрава итадакьлай душиву 2 млн арцул, аьмну харж дурсса арцу хIисав дурну 5% арцул райондалул бюджетравагу. Му бакъассагу, проектрал агьаммур масъала хъанай бур школалул иширттан ка-кумаг бан хIадурсса меценатътал лякъаву.

Имара Саидова