Март зурул 18-нний, «Русская весна» хьуну мяйра шинан хасну, Севастополлай Гасфорта зунттуй тIивтIунни Аллея «Россия — страна героев». Укун буслай бур «Вести Севастополя».
Чарттай чирчуну дур Украиннаву виртталну ливтIуминнал цIарду. Бувгьуну бур цIуну хьусса вирттавран цIа кусса мурхьругу.
Аьрасатнал Виричу НурмахIаммад ХIажимахIаммадовлул суратращалсса хъунмасса тIабиаьтрал чару хасну тийх бишин лавсун бур Дагъусттаннал Муфтиятрал ва «Инсан» фондрал чулуха Донбассрал агьалинан гуманитар кумагращал бувкIсса фуралий. Чару ликкан буллалиминнавух ивкIун ур Виричунал ппу Энгельс ХIажимахIаммадовгу. Ва Севастополлайн лавгун ур «Ночные волки» байкертурал клубрал хъунама Александр Залдостановлул оьвкуну. Энгельслул барчаллагь увкунни Аьрасатнал Президент Владимир Путиннухь арснал чувшиврун бивщусса лавайсса кьиматрахлу.
«Хъунмасса барчаллагь жула верховный главнокомандующийнан, ттул арснал чувшиврун бивщусса лавайсса кьиматрахлу. Аьрасатнал агьали цар, жула держава цIакьссар. Жува аьркинссару, цачIун хьуну, хьхьичIунмай бачин, жува дарусса ссавнилу ялапар хъананшиврул, нацистътурацIа марцI букканшиврул», – увкунни Энгельс ХIажимахIаммадовлул.
Вирттавран хас дурну дия мукунна автопробег «Русская весна». Сапун-зунттуя автомашинарттал ва мотоциклетирттал колонна – Севастополлаясса ва Симферополлаясса 2014-ку шинал «Русская весналул» гьурттучиталгу хIаласса хъуннасса кьюкьа, шагьрулул хъуни кIичIирттавух дурккун, гьаз хьуну дур «Ночные волки» мотоклубрал база бивхьусса Гасфорта зунттуйн.
