![](https://ilchi.info/wp-content/uploads/2020/06/6-1-300x300.jpg)
[dropcap]П[/dropcap]андемиялущал талай бувксса медициналул зузалтрал цалчинмур кьюкьлувуминнавух ур Дюкъуллал шяравасса Салманнул арс Гьарун Султановгу.
ПатIимат Рамазанова
Ва Дагъусттаннал паччахIлугърал медициналул университетрал педиатриялул факультетрал 4-мур курс къуртал буллай ур. Зий ур МахIачкъалаллал шагьрулул цалчинмур азарханалий реанимациялуву. Яла захIматмур кIанттай, хIасил.
ХIакиннал пиша язи бугьаврил хIакъираву укун буслай ур Гьарун: «Инсаннал оьрмулияр кьиматрайсса цичIар дакъар дунияллий. Медицина инсаннал цIуллу-сагъшиврул къаралданийсса касму дур, цурдагу уздансса, инсантурал оьрмурду ххассал буллалисса.
Вай гьантрай Гьарун Султановлул суратру дуссар шагьрулул кIичIирттавусса плакатирттай лархъун. Ва «Барчаллагь, хIакин!» тIисса социал проектрал гьамин Гьаруннул сурат язи дугьаву хаварбакъулийсса иш бакъар. ХIисавравун лавсун бур ва, студентну унува, даву ххуйну кIулсса профессионал акъагу, буниялагу дакI цIимисса цIимилул чув ушивугу.
На касмулул ялун ххибавияв, медицина му магьирлугъри куну. Циван чирча, жулмур пишалувугур магьирлугъ аьркинсса, инсан, хъин увну, ччаннай ацIан уваншиврул, хIакиннал магьиршиву аьркинссар.
Нагу пикри бувссия пиша яла бугьлагьийни, нава ххишалану учIи лякъинсса, ттуятува хайр бикIан кунмасса пиша бур куну».
Буниялагу, тIайлану тIайла авцIуну ур Гьарун медициналувун. МахIачкъалаллал цалчинмур азарханалийн студентътал-волонтёртал аьркинсса хавар баяйхтува, ва анавар увккун ур цува аьркиннийн, цаятува хайр бикIансса кIанттай зун. Реанимациялуву яла захIматми лахIзарду цукунми бия тIисса суалданухьхьун жаваб дуллай, Гьарун ур, «медициналул кашилияр, бюхъу-тяхъалияр бивкIу ххув хьуну, къашайшала ххассал уван къавхьусса чIумал, мунал гъан-маччаминнал иттаввагу урган къахъанахъисса иш бикIай, буниялагу захIматну бикIай ялун бивсса бала бухIан хIарачат буллалисса инсантурал дакI хьунмур бусан, минначIа ацIан, щавулий ка дихьин» тIий.
Июнь зурул 6-нний ванал хъатIи бикIан аьркинссия. Гьаруннул жалин, Ккуллал шяравасса Абуязидлул ва Рита Мурачуевхъал душ Жамилагу, ванащал архIал дуклай бур, цалчинмур курсирайва кIул хьуну бур, гьай-гьай. Баласса пандемия сававну, вайннан хъатIи махънийн бутан багьну бур.
Пасатсса вирусрал рахIму къабувну, инсантал бивкIулул ххяппурттаща ххассал буван къавхьусса ишру оьрмулухун итталу личIанссар тIий ур. Азарханалул къашайшалт кьамул бувай отделениялий дежурствалий усса чIумал, яла дакIний ливчIмур иширая укун буслай ур: «Оьрмулул 35-40 шинавусса адамина, газрал угар сававну, кIулшилия лавгун ия, гацIана реаниматологтурал бригада бучIан бувну, кIулшилийн учIан увну, барокамералувун хIадур увссия. Та адаминащал танал дугьарасса нинугу дуркIуна азарханалийн. На танил чIарав щяивкIра, бусав арснал оьрмулун утти нигьачIин дакъашиву, бувчIин буллан ивкIра, дакI паракьат дуваншиврул, барокамера цирив. Та, лачакрал мурцIних макьгу лихьлай, кьурчIину аьтIий бия. Бугьарасса ванин утти цичIав шайссар тIий, аьтIунсса иш бакъар, мааьтIра тIий ура. Танил, ца пашманну бугу-бурувгун, увкунни: «Цукун къааьтIува, ттул арс, ва ца арс акъасса, ттул цучIав акъассархха, ванацIагу шавай ливчIунна», — куну. ДакIний бур, оьнкьарах къурхъ дарцIуну, ттунма ссихI биял къахъанай бивкIсса мутта. Укун цIими къахъананшиврул, хIакин кьянкьа-кьурчIи хьун аьркинссар тIисса хавардугу нахIакьссар. Къашайссар инсаннаща уку- укун пашмансса иширттайн хIадурну икIан. Та яла дакI кьянкьама хIакиннащагума. Сисин, сасан къашайсса ишри».
Вай гьантрай Гьарун Султановлул суратру дуссар шагьрулул кIичIирттавусса плакатирттай лархъун. Ва «Барчаллагь, хIакин!» тIисса социал проектрал гьамин Гьаруннул сурат язи дугьаву хаварбакъулийсса иш бакъар. ХIисавравун лавсун бур ва, студентну унува, даву ххуйну кIулсса профессионал акъагу, буниялагу дакI цIимисса цIимилул чув ушивугу. Июнь зурул 6-нний ванал хъатIи бикIан аьркинссия. Гьаруннул жалин, Ккуллал шяравасса Абуязидлул ва Рита Мурачуевхъал душ Жамилагу, ванащал архIал дуклай бур, цалчинмур курсирайва кIул хьуну бур, гьай-гьай. Баласса пандемия сававну, вайннан хъатIи махънийн бутан багьну бур. Ин ша Аллагь, ччаврилгу гихунмайгу яхI буванссар укунсса ишираву ссавурданий. Дурхха дунияллий ччаврияргу, нигьлияргу, цалвамур оьрмулияргу хьхьичIунсса затру. Инсантал ххассал буллан ччишиву ялтту дуккаву – ва духьунссар инсаннал бюхттулсса адавгу, жува танан бивщусса яла лахъмур кьиматгу. Хъун махъ бакъар, буниялагу, мяйжаннугу бюхттулшиврий дуцин дувансса тIул-тIабиаьтрал заллу ур Салманнул арс Гьарун Султановгу. Вирусрал къашавайсса махъа-махъсса инсан азарханалия гьаннин зунтIиссара ва азарханалий, тIий ур Гьарун. Ва калималуву узданшиву ва чувшиву дур. Ва дачIрасса калима дакъар, ваниву дур Гьаруннул хасиятрал лишан. Уттизаманнул виричунал лишан, гьаннайсса. Уруччиннав, Гьарун, ина Аллагьу Тааьланалгу! БацIаннав ина ххассал бувсса къашайшалтрал бувцирив зукьлу-дуаьртту!