Октябрьданул 5-нний Ахттиял райондалий Хрюг тIисса шяраву хьунни пресс-конференция. Ва хас дурну дия «С наукой в села» тIисса фестивальданул лагрулийсса «Мобильные университетские смены» цIанилусса просветительшиврул проект къуртал шаврин.

Хрюг шяраву цIуну бувсcа «Люминари» просвещениялул центрданувун бавтIун бия дуккаврил, элмулул ва властьрал органнал вакилтал. Пресс-конференциялий гьуртту хьунни ДГУ-рал ректор Муртазяли Рабаданов, элмулул ва техникалул программарттал дирекциялул каялувчи Алина Павлова, Ахттиял райондалул Депутатътурал собраниялул председатель ХIажимурад Парпачев, Проектрал сакиншиндарал комитетрал ва республикалул муниципал сакиншиннардал вакилтал.
БатIаврий махъ лавхъунни Муртазяли Рабадановлул.
– Сергей Аьлимовичлул увкусса куццуй, ттизаманнул дуклаки оьрчIру аьркинссар зун лабораториярттаву, миннаща бюхъаван аьркинссар цачIу зун жагьилсса аьлимтуращал. Мукунсса наставничествалул кумаграйну бюхъантIий бур республикалий «школа-вуз-наука» тIисса дуккаврил ххуллу буван ва элмулул ва технологиярттал лябуккулунсса пишакартал хIадур буван.
Жунна ва проект хъанай дур Дагъусттаннал ялун бучIантIимунивунсса агьамсса инвестицияну. Жу хъинну пикри бувну язи дургьуссар «элмулул десантрал» формат. Жул ният дия кIулшивручIансса ххуллу гьарца оьрчIан тIивтIуну бикIан аьркиншиву тасттикь баву, зунттал шяравуманан, ягу хъуншагьрулийманан личIи бакъа. Дуклаки оьрчIал наноматериал цалла дуварча, ягу программалул код чичирча, – ганал дакI дацIлацIиссар: «Ттуща бюхълай бур!». Вана ва дакI дацIаву жул даврил хъунмур хIасилли, – увкунни Муртазяли Рабадановлул.
Гьурттучитуран личIинува гъира бизан бунни Алина Павловал ихтилатрал. Ванил бувсунни ацIрахъул шиннардий лядуклай диркIсса элмулул ва технологиярттал агьамми сиптардал хIакъираву. ХIакьину Аьрасатнал гьарца ялапарлувнаща бюхълай бур элмийсса сообществалул бутIану хьун, га шагьрулий ялапар хъанай ухьурчагу, зунттал шяраву ухьурчагу, – увкунни Павловал. Ванил бусаврийну, ччиманаща бюхълай бур гьуртту хьун элмийсса волонтерствалул программалувух ва билаятрал хьхьичIунми лабораториярттавунсса экскурсиярттая тIайла хьуну, цала познаватель маршрутру дузал даврийн ва специализированный конкурсирдай гьуртту шаврийн бияннин.
Мероприятиялул лагрулий дурунни Дагъусттаннал личIи-личIисса районнай хьусса мобил сменарттал давурттал хIасиллу. ЛичIинурасса къулагъас дурунни проектрал иширайнусса хIасиллах – республикалул 15 райондалиясса 400-ннаха ливчусса дуклаки оьрчIру гьуртту хьуну бур физикалул, химиялул, робототехникалул, IT- ва биотехнологиярттал, БПЛА проектирдал давурттавух.
Проектрал каялувчи, ДГУ-рал СМУ-лул председатель Жамиля ХIамидовал бувсунни проект дузал даврил давурттая: «Мобил университетир­ттал смена» проектрал пикри-зикри хIасул шаврил дайдихьу укунсса хьуна: жун чIалай бия пагьму-гьунар бусса жагьилтал гьарца кIанай бушиву, амма миннал хияллу бартлагансса шартIру гьарца кIанай дакъашивугу кIулсса зат бия. Жун ккавккунни районнай чIявусса пагьму бусса оьрчIаща бюхълай бакъашиву ттизаманнул оборудование ишла дуллан ва хьхьичIунсса аьлимтурал дарсирдах вичIи дихьлан. БакIрай ва дия укуннасса сипта, яла АьФ-лул Элмулул ва лаваймур даражалул дуккаврил министерствалул кумаграйну вания хьуссар хъуннасса проект. Жу чан-чанну тIий салкьи дарду программа, гьарца райондалул ляличIишивурттугу хIисаврайн ласлай, дуклаки оьрчIан гъира бутансса форматругу личIи дуллай.
Ахттиял райондалул Ду­ккаврил управлениялул вакилтурал бувсунни кIанттул школардал гьанулий элмийсса кружокру дузал даврил планнал хIакъираву ва ДГУ-рал зузалтращал хIала-гьурттуну пагьму бусса, итххявхсса оьрчIан кумагрансса программартту сакин даврия.
«Мобильные университетские смены» тIисса проект бартдигьлай бур АьФ-лул Элмулул ва лаваймур даражалул дуккаврил министерствалул кумаграйну «Десятилетия науки и технологий» ва «Наука рядом» сиптардал лагрулий.
Ахттиял райондалул хьхьичIунсса опыт ишла бансса пикри бур Дагъусттаннал цаймигу муниципалитетирттайгу, СКФО-лул регионнайгу.

ХIасан Аьдилов