Элмулул ххуллийсса ахттаршиннарду хьхьичIуннай дуллай
Октябрьданул 27-28-нний Москавлив Патрис Лумумбал цIанийсса Аьрасатнал халкьуннал дусшиврул университетрал инженертурал академиялуву хьунни «Технологии промышленного и гражданского строительства – 2026 « (ТПГС-2026) тIисса цIанилусса щалагу Аьрасатнал элмийсса конференция. Шикку гьуртту хьунни Аьрасатнавасса ва чил билаятирттаясса аьлимтал, преподавательтал, строительствалул отраслилул пишакартал ва ахттарчитал. Конференциялул сакиншинначитуравух бия МахIачкъалаллал Системарттал технологиялул институт.
Конференциялул ляличIишивугу хьунни мунил даву дунияллул халкьуннал даражалийсса душиву. Элмийсса программалуву докладру бунни Аьрасатнал, Китайнал, Непаллал, Ираннал, Йеменнал, Сириянал, Иорданиянал, Иракьнал, Эфиопиянал, Руандынал ва цаймигу билаятирттал аьлимтурал. Цинявппагу гьурттучитурал бия аьмсса мурадру: ттизаманнул строительствалул кьяйдарду, цIуну итадаркьусса материаллу ахттар даврил, цIакьсса ва хъунмасса хIаллай дияйсса конструкцияртту даврил, инженертурал давриву цифралул технологияртту ишла даврил чулухунмайсса масъалартту хъирив лавну ахттар баву. Гьурттучитурал дунни ахттаршиннардал хIасиллу ва кIицI лавгунни гихунмай цачIуну зунсса ххуллу-чаранну.

Элмийсса даву лайкьсса даражалий дан хъунмасса бутIа бивхьунни машгьурсса аьлимтурал: РУДН-лул Инженер академиялул строительствалул технологиялул ва конструкциярттал материаллал кафедралул заведующий, Cакиншиндарал ва программалул комитетрал председатель Языев Сердардул, Cакиншиндарал комитетрал элмийсса секретарь, РУДН-лул доцент Окольникова Галинал, РУДН-лул профессор Клюев Сергейл, Дальневосточный Федерал университетрал профессор Федюк Романнул, Дагъусттаннал паччахIлугърал технический университетрал профессор ХIажишалапов ХIажимахIаммадлул.
Республикалун буниялагу хъуннасса агьамшиву дусса ишну ккалли хъанай бур Дагъусттаннал Системарттал технологиярттал институт лавайсса даражалул конференциялул давривух гьуртту шаву. Ванил каялучину ур жула лаккучу ЦIуликъяниятусса КьурбанмахIаммадов Алескер.
КIицI лавгсса куццуй, Системарттал технологиярттал институт конференциялул сакиншинначитуравасса ца хъанай бур. Дунияллул халкьуннал дянивсса элмийсса мероприятие хIадур давривух гьуртту шаврийну тасттикь хъанай бур, университетирттал ва ахттаршиннардал центрдащал хIала-гьурттуну зий, республикалул элмийсса ва кIулшиву дулаврил даву хьхьичIуннай дансса хIарачат буллай бушиву.
Институтрал хьхьичI бивхьусса агьамсса масъаларттавасса бур жагьилсса ахттарчитурал чIарав бацIаву, миннан элмийсса проектру дузрайн дуккан дувансса шартIру хIасул даву, маслихIатру ккаккаву ва ми цайми билаятирттал коллегахъащал хIала-гьуртту баву.
Системарттал технологиярттал институтрал чулуха конференциялул элмийсса программалуву гьуртту хьунни Орлов Евгений, ва мукуна хъанай ур Миллатрал ахттаршиннардал Москавуллал паччахIлугърал строительный университетрал (НИУ МГСУ) доцент. Конференциялий ванал ккаккан дунни 2010 шиная 2026 шинайн бияннинсса Москавуллал областьрайсса Старая Купавна тIисса шагьрулийсса недвижимостьрал багьри хIасул шаврин хас дурсса ахттаршинна.
Конференциялий чялишсса гьурттушинна дунни Региондалул нефтегазовый колледжрал. Ванил директорну ур Ахъушиял райондалийсса ЦIуликъяннал шяравасса Алишер КьурбанмахIаммадов.

Ванал каялувшиндарайсса колледжрал хъуннасса къулагъасрайн лавсун бур пишакартал хIадур баву ва элмийсса кIулшивуртту дулаву мурадрайсса дахIавуртту цIакь дуллалисса масъалартту. Колледжрал преподавательтурал мудангу чялишсса гьурттушинна дуллай бур конференциярттай, опыт кIибачIаву ва кIулшиву дулаврил даву хьхьичIуннай даву мурадрайсса мероприятирттай.
ТПГС-2026 конференциялий колледжрал чулухасса элмийсса доклад бунни Дадашев Мездеклул. Ванал доклад бия хасъсса системардал кумаграйну Приобский мяъдандалул скважинартту дуккаврил ва скважинарттал строительство анаварсса мутталий къуртал даврил масъаларттан хас бувсса.
Укунсса мероприятиярттай гьуртту шаврия хъунмасса мюнпат хъанахъиссар кIулшиву дулаврил даву магьир даврин. Му бакъассагу, хъунмасса кумаг хъанахъиссар ттизаманнул элмулуву ва техникалуву хьусса хьхьичIуннайшивурттащал жагьилсса пишакартал кIул бан ва кIулшиву дулаврил процесс производствалул отраслирдал тIалавшиннардащал цачIун буллан.
Дагъусттаннал аьлимтурал ва педагогтурал аьпа буручлай
Системардал технологиярттал институтрал элмийсса ва кIулшиву дулаврил тарих бавхIуну бур институтрал даву хьхьичIуннай давриву хъунмасса бутIа бивхьусса инсантурацIун. Миннавасса ур хьхьичIунсса аьлимчу, лавайсса организатор, преподаватель, хъунмур оьрму Дагъусттаннал кIулшиву дулаврил системалун хас бувсса КьурбанмахIаммадов Кьурбан ДинмахIаммадович. 2024 шинал майрал 17-18-нний МахIачкъалалив Региондалул нефтегазовый колледжраву ларгссар «Современные исследования и открытия. Научные чтения» тIисса цIанилусса Кьурбан ДинмахIаммадовичлул 70 шин шаврин хас дурсса элмийсса-практикалул конференция.

Системардал технологиярттал институтрал ва колледжрал элмийсса ва кIулшиву дулаврил сипталийнусса конференция даврил мурад, кIулшиву дулаврил ххуллий аьлимчунал бивхьусса захIматран кьимат бищаву ва жагьилсса ахттарчитал, пишакартал ва педагогтал цачIун баву хъанахъиссар.
Укунсса мяъна-мурадрай дуллалисса мероприятиярттал вузрал элмийсса аьдатру ирсирай дачин даву ва учительтурал, насихIатчитурал чулухунмайсса хIурмат-кьимат баву хъанахъиссар. Кьурбан ДинмахIаммадовичлул цIа абад даву мурадрайсса конференция даву ва Системарттал технологиярттал институтрал ТПГС-2026 конференциялий гьурттушинна даврил тасттикь буллалиссар республикалул элмийсса хIала-гьурттушиву хьхьичIуннай дансса хIарачат баврин.
Жагьилсса ахттарчитурансса ххуллу-чаранну
ЦIанасса заманнай элму хьхьичIуннай шавриву хъунмасса бияла бур, жагьилсса пишакартал личIи-личIисса направлениярттай университетирттащал, ахттаршиннардал институтирттащал, кIулшиву дулаврил идарарттащал хIала-гьурттуну зий бушиврийн бувну. Элму ахттар дуллалисса жагьилсса пишакартурал дунияллул халкьуннал даражалийсса конференциярттай гьурттушинна даврийну, цала проектирдая бусан ва опыт бусса пишакартурал насихIатру ласун, ттизаманнул ахттаршиннардал кьяйдардащал кIул хьун, цIусса проектру ххал дигьлансса партнертал лякъинсса сант ххишала хъанай дур.
Системарттал технологиярттал институт хIарачат буллай бур жагьилсса пишакартурансса ххуллурду тIитIлан, Региондалул нефтегазовый колледж цIакь дуллай бур пишакаршиврул ларайсса кIулшивуртту дулаврил ва ми инженертурал практикалуву ишла даврил дахIавуртту.

Конференция эбратну хьунни Дагъусттаннал элмийсса ва кIулшиву дулаврил идарартту Аьрасатнал ва дунияллул халкьуннал даражалийсса опыт кIи бачIлачIисса хьхьичIунсса идарарттал давривух хIала буххавринсса.
Яла агьаммур, республикалул вакилтурал конференциялий докладру баву бакъассагу, хъунисса элмийсса конференцияртту сакин давривух гьуртту шаву хьунни.
Конференциялия гьарта-гьарзану буккин бюхъайссар: https:/tpgs26.ru конференциялул сайтрай ва Системарттал технологиярттал сайтрай: https// proist.ru ва «Системарттал технологиярттал» журналданий.