Ноябрьданул 10-нний Дагъусттаннал шяраваллил хозяйствалул министр Шамил Рамазанов гьуртту хьунни «Региональные аспекты адаптации агропромышленного комплекса к условиям изменяющегося климата» тIисса дунияллул халкьуннал дянивсса элмулул ва практикалул конференциялий.

МахIачкъалаливсса ДР-лул Национал библиотекалий хьусса мероприятиялий гьуртту хьунни Аьрасатнал 21 региондалиясса ва Азирбижаннал, Авгъаннал, Беларусьнал, Къиргъизсттаннал билаятирттал вакилтал.
Шамил Рамазановлул бавтIминнахь барча кунни лаваймур даражалул преподавательтурал кьини. Ванал бувсмунийну, АПК анаварну даххана хъанахъисса климатрал тагьардануцIун дакьай даврил масъалартту хIакьинусса кьини хъанай бур ДР-лун хъинну агьаммину. Региондалул хъунмур бутIа бур щинал кьянатсса зоналий, микку дур муданна къурагьшиву, дишайсса щин диял хъанай дакъар, ми ишру сававну миккусса лухччив авлахърайн кIура даллай дур.
«Жула агропромышленностьрал комплекс кьянкьану лябуклакаву ва республика дукиялул щаллу даву хъарну дур шяраваллил хозяйствалуву элмулийн чул бивщусса цIушиннарду мюнпатну ишла даврийн. Мивунна духлай дур щин дишай системартту цIу дуккан даву, къурагьшиврийн аьдатсса ххяххиярттал журарду ва луртанну ядайсса технологияртту ишла даву», – увкунни министрнал.
Шамил Рамазановлул бувсунни дакI дарцIуну ушиву конференция хьунтIий бушиврий опыт бахханаххи баврил, цIусса пикри-зикрирду хIасул шаврил ва иширайнусса маслихIатру хIадур баврил площадкану, миннуя кумаг хьуншиврий Дагъусттанналгу, Аьрасатнал цайми регионналгу, шикку гьуртту хъанахъисса билаятиртталгу АПК климатрацIун даркьуну дикIан.
Конференция сакин бувну бур ДР-лул Элмулул аграрий центрданул. Муний гьуртту хьунни ДР-лул ФАНЦ-лул директорнал кIанайма Нариман Ниъматуллаев, РАН-далул шяраваллил хозяйстварттал элмурдал отделениялул секретарьнал хъиривчу Алексей Завалин, Дагъусттаннал аграрий университетрал ректорнал кIанайма ШагьрахIим Кутаев, Федерал агроэкологиялул Элмийсса центрданул зузала Елена Калмыкова, Россельхозцентрданул ва Россельхознадзорданул вакилтал ва цаймигу.