Цуксса кьурчIинугу, Ватандалул мурадру буручлай жанну дуллуминнал сияхI ялу-ялун хъунна хъанай най дур. Пашмансса хавар бивунни вай гьантрай ЦIуссалакрал жяматрал ялун. Украиннал аьрщарай нанисса хасъсса аьралий операциялий чувшиврий жан дуллунни Камалуттиннул арс Икран Икрамовлул. ХIайп, дязаннив бяливчIунни къучагънал оьрму.

Увну ур Икран 1994 шинал ЦIуссалакрал шяраву. Вайннал кулпатраву  бур шанма оьрчI – Икран хъуна-хъунама ва кIива ссу.
Икран школалий дуклакисса чIумала, инсаншиву дусса, дакI аьчухсса, дустурал чIарав ацIан хIадурсса ушиврийн бувну, ххирасса ивкIун ур архIал дуклакиминнан ва учительтуран. ИчIувагу ва хъинну хьхьичIун урувгсса оьрчI ивкIун ур. Школа къуртал байхту, лавгун ур аьралуннаву къуллугъ буллан. Аьралуннаву къуллугъ бавугу хьуну дур ванан оьрмулухунсса чувшиврул дарсну. Зана хьуну махъ зий ивкIун ур ЦIуссалакрал райондалийсса ОМВД-лий.
Ватандалул мюхчаншиву дуруччаврил масъалартту гьаз хьусса ппурттуву, хIакьсса патриот ушиву исват буллай, хушрай хасъсса аьралий операциялий гьуртту хьунсса кьутIи дурну дур Икраннул.

Гьуртту хъанай ивкIун ур цалчинсса кьинилияцIа. Кьянкьа-кьурчIисса хасият дусса, цIанихсса сапер хIурмат-кьиматрай ивкIун ур командиртурал ва аьралийтурал дянивгу.

«Лакец» (позывной) дакI тIайлану аьралий бурж бартбигьлай ивкIун ур Харьковрал чулухуннайсса талатавурттаву. Шикку ва кIулну ивкIун ур нигь-ццах дакъасса ва вихшала дишин бюхъайсса аьралийчуну.

Аьралий бурж биттур буллай ккаккан дурсса къучагъшиврухлу Икран лайкь хьуну ур «За храбрость» II даражалул медальданун.
Ва ия дяъвилул иширттаву савсъсса, яхI ялтту бувксса аьралийчу.
2025 шинал июнь зурул 19-нний Харьковрал областьрай Волчанский райондалийсса Тихое поселокрай Ватандалул мурадру буручлай  оьрмулуцIа хьуну ур  къучагъсса сапер.
Имара Саидова