Вай гьантрай ЦIуссалакрал райондалийсса ЦIуссалакрал шяравасса Къантуллаевхъал кулпат ххув хьунни «Семья года» тIисса щалагу Аьрасатнал X-мур конкурсрай.
Ва хъанай дур щалвагу билаятрай эбратрансса, нахIу-хIалимсса, куннал кув бувгьусса кулпатру цачIун буллалисса, хъуннасса агьамшиву дусса проект. Укунсса кулпатирттал сияхIрай жула миллатраясса кулпат бушиву буниялагу пахру бан лайкьсса иш бур.
Аьрасатнал 89 региондалиясса кулпатру гьуртту хьусса конкурсрай цалчинсса кIану бувгьунни Шайху ва Ульяна Къантуллаевхъал кулпатрал. Вай ххув хьунни «Многодетная семья» номинациялий. Шайхул ва Ульянал цинявннан эбратну, захIматрал кьадру буну, куннаха куннал аякьа дуну тарбия буллай бур мукьа арс ва ца душ. Шайху ур хасъсса аьралий операциялул гьурттучи.
Ххув хьуминнан наградартту ва бахшишру дуллалисса мажлис хьунни Москавлив «Россия» тIисса Миллатрал центрданул къатраву. Шикку гьуртту хьунни Къантуллаевхъал кулпатгу. ХьхьичIунсса кIанттурду бувгьусса кулпатирттан бахшишру дуллунни АьФ-лул ПаччахIлугърал Думалул председательнал хъиривмур, «Семья года» тIисса щалагу Аьрасатнал конкурсрал комитетрал член Анна Кузнецовал.
Конкурсрал сакиншинначитурал Къантуллаевхъал кулпат, аэропортрай хьунагу бавкьуну, гостиницалуву цинярда шартIирдал дузал бунни. Москавлив шанма гьантлул мутталий вайннан бунни жура-журасса экскурсияртту, бувцунни театрданийн, дунни оьрчIру бялахъан бансса программа. ОьрчIан пишкаш бунни цIа кусса футболкартту ва конструкторду. Гьурттучитуран хас дурсса концерт ккаккан дунни Аьрасатнал эстрадалул балайчитурал: Валериял, Стас Пьехал, Александр Маршаллул, Илона Броневицкаял ва цайминнал.
Къантуллаевхъал кулпат ххувшаврищал барча буллай, чIа тIий буру цIакьсса цIуллушиву, гихунмайгу хъунисса тIайлабацIуртту.
Имара Саидова
