Дунияллийсса инсантурал оьр­мурду бигьа-рахIатсса бикIан­ссия, агана баласса дяъвирду къабивкIссания.

Сайки гьарца тарихрал дуланттуву инсантурал хьхьичIун дяъвирду багьлай бур. Мукунсса хъуни баларду ливкний, инсаннал оьрмулул кьиматгума къаличIай. Ватандалунгу, халкьуннангу хъинбала буллай, цала бурж биттур буллали­сса саллатI дяъвилул цIарахьхьун бирияй, миннан дунияллул гьарташивугу, талихIгу бухлагай. Ци жура­сса замана бучIарчангу, дяъвирдуми ахир дакъасса ххуллийх найнма бур.
Совет хIукуматрал чIумал Украиннал ва Аьрасатнал дянив цашиву, хIалашиву, нахIушиву ду­ссия. Амма, ссал ва щил бияларив къакIулли, му уссурвалшиврийсса дусшиву руцари хьун дурну, дянийх хъякру дагьан дурунни.

Гьаз хъанай бавчунни цамур пикрилул инсантал, цалгу дакIурдийх биччибакъашиврул бурса бавкьусса.
Шиккува учин, цумур билаятрайсса ухьурчангу, каялувчинан хьхьичIунну дикIан аьркинни дакIнил даччин дакъашиву, тIайлашиву, цанчирча цал каялувшиндарай ялапар хъанахъинал ва махъа нанинал ялув жаваб дугьан багьлагьисса уну тIий.

БахIи куний къабахIлагьисса уну тIий, жула билаятрал бакIчинай бакъамургу бихьлай, бакIру гьаз дуллай бур Западрайсса хIукуматирттал паччахIтал. ХIакьмунийнгу тти­ликI руртун (санкциярду бихьлай), хIаранмунийн иман дирхьуну бур, укунасса инсанналвагу бусан къабучIи буллалисса щялма­хъирттал дуниял дуцIин дуллай бур. Хъинну чIярусса арцу ва дяъвилул ярагъру тIайла буклай, Украина ла-ялун буллай бур ми.

Я Аллагь, инсаннал оьшиврул ххуллийсса пикрирду кьукьин бува, байщун бува. Инсантурал ялун бивсса балардугу, бурхьничунал мукьал кьурчIишивугу, дяъвилул къювугу, ниттихъал агьигу бигьану кьамул хъанай мабитара.

Ватан оьшивруща дуруччаврил ххуллийри жула жагьилтурал цала жанну харж дуллалисса. 1941- ку шинал Гитлер ххявхсса дяъвилувугу жула саллатIналли дуниял ххассал дурсса. Я Аллагь, щалларагу аьрщарайсса инсантурал, инсаниятрал урцIуй илагьисса чаннал нур дизан дува.
Амма, къахьунмур хьуну, илданийх кьини дурксса чIумал, оьши­ву бас дан багьлагьисса чIумал, чанну къалякъай Дагъусттаннал аьрщарай жан дулун хIадурсса жагьилталгу. Дуниялгу хIайран хьун дурну, мукун жан дуллунни жула лаккуоьрчI НурмахIаммад ХIажимахIаммадовлул. Жула миллатрал дянив ми тачIаввагу чан ба­къар. Дагъусттаннайн, ЦIуссалаккуйн къачагътал ххявхсса дяъвилувугу виртталшиврий жанну дуллунни Халид Мурачуевлул ва Мутай Исяевлул.

Вайнна вайри цIанасса заманалул вирттал, дусшиву тIайласса, дакIру марцIсса, аькьлу тархъансса, яхI бусса Дагъусттаннал арсру. Вай зунттурду кунмасса чиваркI. Иш багьни, зяйтIи чарил ххяллу кунма, кьянкьасса арамтал.
Укун, дуниял оьшивруща ххассал дуллай, тархъаншиврул ва уттавашиврул ххуллий цала жанну кьурван дуллалисса вирттаврал цIарду абаднура личIантIиссар.

Булбул Оьмариева