Февральданул 28-нний Оьруснал театрдануву хьунни Дагъусттаннал Республикалул Культуралул министерствалул 2023-ку шинал дурмунил хIасиллу дуллалисса коллегия. Ваний гьуртту хъанахъисса бусравсса хъамаллуравух ия ДР-лул ХIукуматрал председательнал хъиривчув Муслим Телякавовгу. Театрданул фойераву дия Министерствалул ларгсса шинал дурсса шадлугъирттай рирщусса суратирттал выставка.
Аьрасатнал Президентнал Указ щаллу буллай, Дагъусттаннал халкьуннал шаэр Расул ХIамзатовлун 100 шин шаврицIун дархIусса шадлугъирттайну ларгсса 2023-ку шинал хIасиллу дуллалисса гьарта-гьарзасса доклад бувна ДР-лул культуралул министр Зарема Буттаевал. Цилва ихтилатраву ванил кIицI ларгуна ларгсса шинал мутталий ва иширайн бувну жулла республикалий, билаятрай ва дазул кьатIув дурсса давуртту, вайннувух – АьФ-лул Федерал Собраниялул Федерациялул Советраву спикер Валентина Матвиенкол, Аьрасатнал Федерациялул ХIукуматрал Председательнал хъиривмур Татьяна Голиковал ва Аьрасатнал ПаччахIлугърал Думалул депутатътурал гьурттушиннарайну хьуми. Мукунма В. Матвиенкол каялувшиндаралу, Аьрасатнал 17 региондалиясса хъамалгу гьурттуну, жулла республикалий хьусса «Историко-культурное наследие России» форум. Министрнал барчаллагь увкуна шаэрнал юбилейрацIун дархIуну дуллай бивкIсса хIат-хIисав дакъасса шадлугъирттаву кумаг буллай, чIарав бацIлай бивкIминнахь.
Ва шинал дувансса агьамми давурттавух ванил кIицI ларгуна Дагъусттаннал халкьуннал шаэр Сулайман Стальскийл 155 шинал, Оьруснал театрданул 100 шинал, мукунна Дагъусттаннал Чичултрал союзрал 90 шинал, Композитортурал союзрал 70 шинал, Дагъусттаннал паччахIлугърал Т. Мурадовлул цIанийсса филармониялул 80 шинал, Апанни Къапиевлул, Барият Мурадовал, Саният Мурадовал, Рабадан Нуровлул, Аьбдулла МахIаммадовлул ва мукунма цайминналгу юбилейрду.
Гихунмай Зарема Буттаевал бувсуна национал ва федерал проектирдал лагрулий, республикалул муниципалитетиртталгу гьурттушиндарайну, капитальный ремонтру дуршиву культуралул къатрал ва оьрчIал искусствардал школардай, бувшиву цаппарасса музейрдал ва театрдал техникалул щаллушиндаралсса, тIивтIушиву 5 модельный библиотека. Мукунна иширайну щаллу дурсса проектирдая, цIусса постановкардая, музейрдал выставкардая, чIявусса цаймигу иширттая. Национал ва федерал проектирдайнусса давуртту гихуннайгу дачин дуллай, ва шинал дуванмуния. Музейрдалмур даврия тIий, министрнал бувсуна ларгсса шинал Изобразительный искусствардал А.С. Пушкиннул цIанийсса ПаччахIлугърал музейраву хьусса «Музейные маршруты России» тIисса цIанилусса проектрал стратегический сессиялул хIасиллайн бувну Дагъусттан бувхшиву проектрай 2024 шинал гьуртту хьунминнал сияхIравун. Тти ва проектрал лагрулий жучIанма бучIантIиссар федерал музейрдал (Третьяковка, Эрмитаж, Пушкиннул музей) каялувчитал, хьунтIиссар личIи-личIисса выставкарду.
Министрнал мукунма бувсуна, культуралул цаппарасса направлениярттай зузисса пишакартурал ялун цIусса къанай буну тIий, кадрарду биял къахъанахъаврил масъала щаллу баву мурадрай республикалий зузи дурсса «Творческий резерв Республики Дагестан» цIанилусса региондалул программалия ва ванил лагрулий ттинин хьусса цин лархьхьусса хъин чулийннайсса дахханашивурттая. Мукунма, махъа нанисса ник ватан ххирану тарбия хъанахъаву мурадрай, Министерствалий сакин бувсса Творчествалул жагьилтурал советрая.
Цилва ихтилат щаллу буллай, министрнал бувсуна республикалул культуралул идарарттал давриву агьамсса кIану бугьлагьисса инклюзив проектирдаягу – ляличIисса оьрчIан куну дуллалимуния. Мукунма СВО-рал гьурттучитурал кулпатирттал чIарав бацIавриягу.
Гихунмай ихтилатру бувна республикалул культуралул министрнал цалчинма хъиривчув Мухтар Кьурбановлул, Муслим Телякавовлул, Дагъусттан Республикалул Халкьуннал Мажлисрал председательнал хъиривчув Камил Давдиевлул, республикалул цаппара муниципалитетирттал Культуралул управлениярттал каялувчитурал.
Ахирданий хьхьичIунсса ккаккиярттахлу, дакI марцIну буллалисса захIматрахлу личIи-личIисса наградартту дуллунни. Ва кьини наградарттан лайкь хьуминнавух къачанъя лакгу. «Дагъусттан Республикалул Халкьуннал артист» тIисса ларайсса цIа дуллуна Дагъусттаннал опералул ва балетрал театрданул артистътал Бадрижат Адамован ва Арсен КьурбанмахIаммадовлун, Дагъусттан Республикалул ХIукуматрал ХIурматрал грамоталун лайкь хьуна МахIачкъала шагьрулул ОьрчIал художестволул школалул директор Гульнара Мамашева, Дагъусттан Республикалул Халкьуннал Мажлисрал чулухасса ХIурматрал грамота дуллуна Республикалул ОьрчIал Н. Юсуповлул цIанийсса библиотекалул отделданул хъунмур Ххадижат Агъаеван, Дагъусттан Республикалул Халкьуннал Мажлисрал Председательнал цIа кусса ссятран лайкь хьуна Республикалул Культуралул министерствалул отделданул начальник Зулайхат МухIадова, Дагъусттан Республикалул Культуралул министерствалул ХIурматрал грамоталун лайкь хьуна Дагъусттан Республикалул Информациялул ва печатьрал агентствалул хъунаманал цалчинсса хъиривчув Наида МахIаммадова, Аьрасатнал Чичултрал союзрал Дагъусттаннал отделениялул председатель Миясат Муслимова, республикалул культуралул министрнал Барчаллагьран лайкь хьуна «Дагъусттан» ГТРК-лул председательнал хъиривчув, Культуралул министерствалучIасса Жяматийсса советрал председатель Ссалам Хавчаев.
Бадрижамал Аьлиева
