Вай гьантрай МахIачкъала шагьрулул 49-мур школалий лахъа-хъунсса даражалий хьунаавкьунни Дагъусттаннал хушрайчитурал «Каспий» тIисса цалчинсса батальондалул командир, полковник Жамал Илиясов. Дуклаки оьрчIащал хьунабакьин бувкIун бия ДР-лул Халкьуннал Мажлисрал депутат, закканттай буккаврил Дунияллул чемпион Султан-АхIмад Ибрагьимов, хасъсса аьралий операциялийн цимилгу гуманитар кумаг биян бувсса, Къизлар шагьрулул Мажлисрал депутат МахIаммад Халидов, хIала-ккаласса данди буккавурттал Дунияллул кIийла чемпион, таможнялул къуллугърал майор МахIаммад Жабраилов, Аьли Аьлиевлул цIанийсса Спортрал ва жагьилтурал къатрал директор, лачIун буккаврил спортрал мастер Ибрагьим Исяев, хIала-ккаласса данди буккавурттал Дунияллул чемпион Рамазан Эмеев, аьралий медициналул къуллугърал хъунама Таймаз ХIажиев, «Россети Северный Кавказ» – «Дагэнерго» ПАО-лул профсоюзирттал идарарттал председатель АхIмад Аьбдуллаев ва цаймигу. Мероприятиялул сиптачи ва сакиншинначи хьунни МахIачкъала шагьрулул 49-мур школалул директор Аьбдулкарим Айгунов.
Мажлис байбивхьуна хасъсса аьралий операциялий Ватандалул ххуллий чувшиврий жанну дуллусса Вирттал дакIнин бичаврийну. ЛивтIуминнал аьпалун дурна минутIрайсса пахъ багьаву. Мероприятиялийн бувкIсса бусравсса хъамаллурахь ва дуклаки оьрчIахь барчаллагь увкуна ­Аьбдулкарим Айгуновлул.
– ХIакьину дуклаки оьрчIащал хьунабакьин оьвку­ссия «Каспий» батальондалул командир Жамал Илиясовлуйн, жагьилтурал дянив сийлийсса, цIанихсса спортсментурайн ва машгьурсса цаймигу инсантурайн. Барчаллагь учин ччай ура, мажал бакъашиврух къаурувгун, аьралийтурайн чагъарду чичлай бивкIсса дуклаки оьрчIащал хьунаакьинсса махъ буллусса Жамал Илиясовлухь.
ОьрчIрув, зул хьхьич|ун бувккунни оьрмулуву ва жяматийсса иширттаву хьхьичIун ливчусса, бусравсса инсантал. Эбрат ласияра оьрмулул ххуллий язи бувгьусса хияллу дузрайн буккан бувсса ххаллилсса инсантурая. Ттун хъинну ччива зуятугу халкьуннан бусрав­сса, хайр бусса инсантал хьуну. Умуд бур ва хьунабакьавугу зун мюнпатрансса хьунссар тIисса, – увкунни Аьбдулкарим ­Айгуновлул.
Хъирив ихтилат бунни ­Жамал Илиясовлул.
– ДакIнийхтуну барчаллагь учин ччай ура дуклаки оьрчIру Ватан ххирану тарбия баву мурадрайсса агьамсса давуртту дуллалисса школалул директор Аьбдулкарим Айгуновлухь ва ванал коллективрахь, хасъсса аьралий операциялий гьуртту хъанахъи­сса аьралийтурал дакI даву мурадрай чагъарду чичлай бивкIсса дуклаки оьрчIахь.
Аьбдулкарим цимилгу ув­кIунни аьралийтуран гуманитар кумаг, бахшишру ва дуклаки оьрчIал чивчусса чагъарду лавсун. Ирглийсса аьрххилий на ванахьхьун махъ буллуссия дуклаки оьрчIащал хьунаакьин учIансса. ХIакьину на шиккун лавсун увкIра ва школалий дуклакисса Зайнаблул чивчусса чагъар. Ва хьунни ттун яла асар биян бувмур чагъар. Барчаллагь укунсса оьрчIру тарбия буллалисса нитти-буттан ва школалул коллективран. Аьбдулкарим кунма чумартсса, сахаватлувсса инсантурал дуллалисса давурттан багьа бакъассар. Барчаллагьран лайкьссар къучагъну аьралий буржру бартбигьлагьисса жагьилтурал махъ бацIан хIадурсса уздансса инсантал. Зу кунмасса патриотътал жула аьралийтурал махъ буссаксса, ­ххувшаву ласунсса вихшалагу ххишала хъанай дур, – увкунни Жамал Илиясовлул.
Командирнал дуклаки оьрчIахь бувсунни Украиннал аьрщарай неонацизм духлаган даву мурадрай баян бувсса хасъсса аьралий операциялия, аьралий буржру лайкьну бартбигьлагьисса, мобилизоват бувсса, контракт чирчуну ва хушрай лавгсса аьралийтурал къучагъшивурттая.
МахIаммад Жабраиловлул ва МахIаммад Халидовлул цала чулуха дакIний личIансса бахшишру дунни батальондалул командирнан.
Ихтилатирттал лях-карах дуклаки оьрчIал ккаккан дунни ххаллилсса концертрал программа.
Дуклаки оьрчIахь насихIат буллалисса ихтилат бунни Сул­тан-АхIмад Ибрагьимовлул.
– Ххирасса оьрчIрув! Зун хъунмасса тIайлабацIу хьушиврун ккалли буллай ура даврил опытгу бусса, заманалуцIун авкьуну къуццу тIутIисса ­директор бакIрайн агьаву.
ХIакьинусса кьини ва школалий Аьбдулкаримлул каялувшиндаралу дачин дурну бур оьрчIан куртIсса кIулшивуртту дулаву ва ми тарбия баву мурадрайсса ххаллилсса давур­тту. Ва хъуннасса къулагъас дуллай ур дуклаки оьрчIру аьркин бакъасса иширттавух хIала къашаврих.
Аьбдулкарим жагьилсса никирай цIими бусса, миннан ка-кумаг бан хIадурсса каялувчи ушиву тасттикь хьунни ва ххуллухь сакин дурсса мероприятиялийгу.
ОьрчIрув, ттул зухь хъунмасса миннатри, хIурмат-кьимат буну ва вичIи дирхьуну бикIияра зула нитти-буттах ва лагма-ялттуминнах. ХIарачат бара зула хияллу дузрайн буккан бан. КIулну бикIияра, ччан бикIарчан, дан къашайсса цичIар дакъашиву, – увкунни ванал.
Цала оьрмулия ва спортраву дурсса хьхьичIуннайшивурттая бувсунни Рамазан Эмеевлул ва Таймаз ХIажиевлул.
Командирнахьхьун ва спортсментурахьхьун суаллу буллай, чялишсса гьурттушинна дурсса дуклаки оьрчIан дуллунни бахшишру.
Ахирданий цинявннал рирщунни дакIний личIансса ­су­рат­ру.