Февральданул 21-нний МахIачкъалалив А. Карповлул цIанийсса Шахматирттал школалий хьунни ДР-лул лайкь хьусса учитель Айгунов МахIаммад Ризауттиннул арснал аьпалун хас дурсса «Белая ладья» тIисса цIанилусса шахматирттал турнир.

Буттал аьпа абад буллай, ванал арснал, ДР-лул Дзюдорал федерациялул вице-президент, МахIачкъала шагьрулул 49-мур школалул директор Аьбдулкарим Айгуновлул ва ххуллухьсса турниргу лавайсса даражалий кIицI ларгунни.

Ххув хьуминнан бахшишру дуллалисса мажлис тIивтIунни «Горцы Кавказа» тIисса хореографиялул ансамбльданул къавтIаврийну.
ОьрчIру барча бан бувкIун бия Шахматирттал школалул директор Жакай Жакаев, МахIачкъала шагьрулул Спортрал, туризмалул ва жагьилтуращалсса даврил управлениялул хъунама Мурад МирзахIажиев, Ухссавнил Ккавкказуллал юстициялул институтрал ректор Багьауттин МахIаммадов, ДР-лул Халкьуннал Мажлисрал депутат Рустам Хабилов, «Россети Северный Кавказ» – «Дагэнерго» ПАО-лул каялувчи Арсен ХIажиев, Дагъусттаннайсса Аьрасатнал УФСИН-далул хъунама Аьбдулхак Аьбдулхаков, хIала-ккаласса данди буккавурттал Дунияллул кIийла чемпион МухIаммад Жабраилов, МахIачкъала шагьрулул 25-мур школалул директор Асват БакIунова, Дагъусттаннайсса Аьрасатнал Социал фондрал отделениялул каялувчинал бигарду биттур буллалисса АьбдурахIман МахIаммадов ва цаймигу.
Турнир дайдишин хьхьичI дурккунни Архмур Восток ва Арктика хьхьичIунмай бавриха зузисса министрнал цалчинма хъиривчу ХIажимахIаммад ХIусайновлул цIаниясса телеграмма.

– Барча буллай ура турнирданул гьурттучитал. Цинявннан хIисав шайхьунссар Аьбдулкарим Айгуновлул цала буттал аьпа абад буллалисса спортрал ва шахматирттал турнирду гьарица шинал кIицI лагайшиву. ОьрчIал аькьлу-кIулши итххяххан дуллалисса, тIайласса хIукму бан ва кьамул бан лахьхьин буллалисса, хъуннасса агьамшиву дусса спортран ккаллиссар шахматирттай буккаву.

Умуд бур ва ххуллухьсса турнирданий гьунар бусса оьрчIру ялун личинссар ва вайннан дакIний личIансса агьамсса ишну хьунссар тIисса. Барчаллагь ва хъуннасса даву дуллалисса Айгуновхъал кулпатран, – тIий бур телеграммалий.
Нюжмардий най бивкIсса шахматирттал бяст-ччаллай гьуртту хьунни республикалул школардаясса 120 оьрчIая хIасул дурсса 30 команда. Ххув хьусса шахматистътуран кубокру, грамотартту дакъассагу, цалчинсса кIану бувгьусса командалун буллунни телевизор, УнцIукIуллал усттартурал дурсса вазарду, Оьргърал усттартурал дурсса ххаржантру.
Турнирданийн бувкIсса бусравсса хъамаллуран дуллунни МахIаммад Айгуновлул суратру дирхьусса медальлу ва дакIний личIансса бахшишру.

Имара Саидова