Вай гьантрай, Москавлив Архмур Баргъбуккавал билаят ва Арктика хьхьичIунмай бавриха зузисса министрнал цалчинма хъиривчу ХIажибуттал арс ХIажимахIаммад ХIусайнов хьунаавкьунни Дагъусттаннаясса дуккавриву итххявхсса оьрчIащал.

ХIажимахIаммадлущал дук­лаки оьрчIру хьунабакьин бан­сса сипталущал увккунни Да­гъусттаннал панкратиондалул цачIун дур командалул хъунама тренер, МахIачкъала шагьрулул 49-мур школалул директор МахIаммадлул арс Аьбдулкарим Айгунов.
Москавлийнсса аьрххилийн Аьбдулкаримлул бувцуну бия МахIачкъала шагьрулул 49-мур, 50-мур школардай ва Республикалул итххявхсса оьрчIансса физикалул ва математикалул лицей-интернатраву хьхьичIунну дуклакисса оьрчIру.
Хьунабакьаврий ХIажи­ма­хIам­мадлул дуклаки оьрчIахь бувсунни Баргъбуккавал билаятгу, Арк­тикагу хьхьичIунмай бавриха зузисса министерствалул даврия, бунни оьрчIан оьрмулуву бучIи лякъинсса насихIатру.

– ХIакьину, технологияртту анаварсса мутталий хьхьичIуннай хъанахъисса чIумал, кIулшивур­ттал чулухуннай хъунисса тIалав­шиннарду дур. Гихунмайсса оьрму лайкьну бутланшиврул чара бакъа куртсса кIулшивуртту дикIан аьркинссар. Так куртIсса кIулшивурттайнур зул хьхьичI ччимур вузравун буххансса ххуллурду тIитIинтIисса ва зуяту ххаллилсса пишакартал хьунтIисса. ХIарачат бара зула хияллу дузрайн буккан бан. Ттун хъинну ччива зуятугу халкьуннан бусравсса, хайр бу­сса инсантал хьуну. Умуд бур ва хьунабакьаву зун мюнпатран­сса хьунссар тIисса, – увкунни ХIажимахIаммадлул. Ванал дуклаки оьрчIан дунни дакIний личIансса бахшишру.
Ххюйлчинмур классрал дуклаки душ Аминат Шариповал був­ккунни «Буруччара дустал» тIисса Расул ХIамзатовлул шеъри.

Аьрххилул лагрулий дуклаки оьрчIан бунни Москавуллал нанотехнологиярттал институтравунсса экскурсия. Шикку дуклаки оьрчIащал хьунаавкьунни Аьрасатнал Федерациялул Думалул депутат ХIажимет Сапар­аьлиев. Ванал бувсунни институтравусса кIулшивуртту дулаврил даврия, элмийсса лабораториярдая ва элмийсса цIушиннардая. КIицI лавгунни электроникалул ва радиофотоникалул аралуву­сса пишакартал цIанасса ппурттуву хъинну тIалавну бушиву. Бувсунни хIакьинусса кьини выпускниктурах ялугьлай бушиву «Курчатовский институт» НИЦ, Росатом, Роскосмос, Аьрасатнал Обороналул министерство, Ростех ва цаймигу элмийсса идарартту.
Дуклаки оьрчIан ккавккунни лабораториярдавусса ляличIисса оборудование, кIул хьунни хьхьи­чIунсса элмийсса аьлимтуращал.

Вайннал бунни мукунма Москавуллал хьхьичIунсса вузир­ттал сияхIрайсса Г.В. Плехановлул цIанийсса Аьрасатнал экономикалул университетравунсса экскурсиягу.
– ТIайлабацIу хьушиврун ккалли буллай буру Аьбдулкарим МахIаммадович кунасса каялувчи жуйна тIайла ацIаву. Ва ур цалла даву лавайсса даражалий кIулсса, цаярагу, дуклаки оьрчIаягу тIалавшинна ду­сса педагог. — КутIасса чIумул мутталий ванал каялувшиндаралу жул школа республикалул хьхьичIунсса школардал сияхIрайн лавхъунни. Щаллу бантIишиву кIулну, ччимур масъалалул ялув ванайн буккан бюхъай. Аьбдулкаримлун ххуйну кIулли цала хъирив учительталгу, дуклаки оьрчIругу бачин бан, – буслай бур аьрххилия зана хьусса дуклаки оьрчIру.

Шиккува бусан, Аьбдулкаримлул ванияр хьхьичIгу хьхьичIунну дуклакисса оьрчIан Чачаннал ва Ингушетиянал республикар­ттайнсса экскурсия бувссия. Му бакъассагу, школалий ччя-ччяни дуллай ур хьхьичIунсса чемпионтал ва бусравсса инсантал дуклаки оьрчIащал хьунабакьлансса мероприятияртту. ХIасил, луглайна ур оьрчIан дуккаврих гъира-шавкь дутансса ххуллу-чараннах.
Укун, дакIний личIансса давурттайнур оьрчIаву дуккаврих­сса гъирагу ххишала хъанахъисса.

Имара Саидова