Ларгсса нюжмардий Ккуллал райондалийгу хьунни педагогтурал август зурул совещание. Ларгсса дуккаврил шинал хIасиллу дуллалисса ва цIусса дуккаврил шинал хьхьичI бавцIусса агьамми масъалартту ххал бигьлагьисса.
Райондалул бакIчи Шамил Рамазановлул хьхьичIунми ккаккиярттавух кIицI лавгунни Вихьлив уттизаманнул журалийсса ххуйсса школа буваву. Бувсунни Ваччав гьашину мукунма ххуйсса стадион буван хIадур хъанай бушиву.
«Райондалийсса 14 школалий ларайсса квалификация дусса 162 педагог зий уссар. Шиккува кIицI лаган аьркинни, квалификация ларай даврил курсру бувккусса учительтурал аьдадгу хъун хьушиву, ва иширавагу чIалай бушиву кIулшивуртту дулаврил даву гьаз дувансса хIарачатрай зий бушиву. ЛичIинува кIицI лаганна кIива выпускницал мусил ва арцул медальлу ларсшиву, душваврал цалва хIарачатрацIун, учительтуралмур бюхъу-тяхъагу чIалай бушиву», – увкунни Шамил Рамазановлул. Ванал барчаллагь увкунни шинал лажиндарай оьрчIан куртIсса кIулшивурттугу, цIакьсса тарбиягу дуллай бивкIсса учительтурахь. Вава бюхъу-хIарачатрай уттигу зунтIишиврийнсса умуд бушиву кIицI лавгунни.
Гьанумур доклад бунни райондалул КIулшиву дулаврил управлениялул хъунаманал бурж чIумуйну бартбигьлагьисса Жамалуттин Оьмариевлул. Ванал балжину бувсунни дуккаврил шинал лажиндарай цуку-цукунсса давуртту дурссарив.
Хъювхъиял школалул директор Аьйша Исяевал бувсунни кIулшивуртту дулаврил давриву уттизаманнул технологияртту гьарза-гьартану ишла даврия ва «Движение Первых» дастталугърал проект бартдигьаврия.
ЧIяйннал школалул директор Альбина Гаммакуевал бувсунни дуклаки оьрчIан тарбия дулавриву аьралий-патриот зумунусса тарбия дулаврил биялалия, цIакьсса граждан позиция бусса ник тарбия дуваврия.
Ккуллал 2-мур школалул директор Аьбдулла Мурачуевлул доклад бия райондалий кIулшивуртту дулаврил даву сантирай ва лябуккулий хьхьичIуннай дувансса чаранная ва ххуллурдая бусласисса.
Сайки циняв шяраваллал ва школардал каялувчиталгу, вакилталгу гьуртту хьусса ва батIаврий цаймигу агьамсса масъалартту гьаз бунни.
Совещаниялул ахирданий Шамил Рамазановлул хьхьичIунми педагогтуран дуллунни Республикалул КIулшивуртту дулаврил ва элмулул министерствалул чулухасса ва райондалул администрациялул чулухасса ХIурматрал грамотартту ва цаймигу кьиматрайсса бахшишру.
ПатIимат Рамазанова
