Дайдирхьунни дуккаврил цIусса шин. Щалва билаятрай кунна, ваницIунсса шадлугърайсса линейкартту хьунни жулла республикалул школардайгу, вайннувух МахIачкъалаллал шагьрулул чIяру профиллу дусса 3-мур лицейравугу.
Шикку гьашину цалчинмур классравун лавгунни 81 чIивитIу. ЦIусса дуккаврил шинал шадлугърай яла хъуннамур къулагъасгу вайннах дия. Вайннал оьрмулуву ва кьинисса сайки цимурца цIусса дия: цалчинсса шадлугърайсса линейка, учительтал, чIунархIалсса ва оьрмулул хъунисса лагма-ялттусса кIул бакъасса чIяву инсантал, авара, аьлагъужа, гьартасса чаннасса классру, портфельлу, игрушкарттан, ссихьран ва машинарттан кIанттай ручкарду, кьалантру, тетрадьру ва луттирду…
Школардал выпускрал классирттан ва дуккаврил шин махъра-махъсса духьурча, цалчинмур классравун бувкIсса мюрщултрал ва кьини кIулшивуртту ласаврил лахъисса ххуллийхсса цалчинсса шаттирду ласаву хъанай дия. Вай барачатсса хьуннав тIисса, гихунмайсса оьрмулуву вайннан тIайлабацIу чIа тIисса бия шадлугърайсса ихтилатругу. Ихтилатру бувминнавух бия ва лицейрал директор Жанна Селиванова, Дагъусттан Республикалул КIулшиву дулаврил ва элмулул министерствалул хъунмур пишакар Лейла Арсланбекова, МахIачкъалаллал шагьрулул мажлисрал депутат Рашидбек Оздемиров ва цаймигу.
Лавайми классирттал дуклаки оьрчIал дурккунни школалийн цалчин бувкIсса мюрщултран тIайлабацIу чIа тIисса назмурду, мюрщултрал тIурчаннив – цайнна дирхьусса вихшала цIакь дуванну къуццу тIунсса махъ буллалисса назмурду.
Бадрижамал Аьлиева
