[dropcap]Н[/dropcap]иттил мазрал кьинилун хасну МахIачкъалалив, Миллатирттал культуралул центрданий хьусса ккуркки столданийсса ца парча видеолийн лавсун, Фейсбукрайсса «Илчи» кказитрал дустурал кьюкьлул машай бивхьуссия Ниттил мазру лахьхьин бувай центрданул хъунмур Марина ХIасановал гъалгъалул фрагмент. Му видео ххал дурминнал комментариярттавасса цаппара кказитрайгу дуллай буру.
Мудуев Шагьимардан:
– Ккуркки столлал бикIу, бювчIу столлал бикIу, ягу цамур журалул столлал бикIу, ниттил мазру якъабувайссар, я лахьхьин къабувайссар. ХъунмурчIин кулпатралли маз ябувайсса ва лахьхьин бувайсса. Гъалгъа тIутIияра шаппа оьрчIащал ниттил мазрай. Ягу зана бикIияра зунттавунмай. ЦIанакул дукия ялу-ялун ххира хъанай най дур, аьрщив та зузи дулланссарив щин кIулссар. Дур миллатирттал мазурдийсса телепередачартту, радиопередачартту, бур литературалул журнал, хъаннинсса ва оьрчIансса журналлу, республикалул ва районнал кказитру, цивппагу 14 мазрайсса, миллатрал театрду, миллатирттал мазурдил учительтал , касмукартал хIадур буллалисса факультетру, миллатирттал мазурдийсса луттирду итабакьлакьисса басмаханарду. Амма театрданувун гуж-балагь кIункIу буван багьлай бур, кказит, журналлу ккалай бакъар, передачарттах вичIи дихьлай бакъар. Ябан аьркиншиврул хавардая ябаврийн бучIан аьркинну жува.
Халилов АьбдурахIман:
– ЧIалай бурхха ниттил мазурдил бакIрачIан бучIантIимур, аьркинссарив му оьгь-ччап?
Эльдарова Роза:
– Отчёт дулуншиврул дуллалисса мероприятиярттур ми. БатIай, бувай ниттил мазурдил агьамшивриятусса ихтилатру, ппив шай, итабакьай щилчIав къабуккайсса луттирду, лайкру, арцу… хIасиллу мири. Цими шинни шяраваллал кIанттай агьалинал оьрму къулай буван, маэшат гьаз буван аьркиншиврия гъалгъа тIий? Нитти-буттан оьрчIащал ниттил мазрай гъалгъа тIун аьркиншиву лаласурчагума, ххуйри, гьай-гьай. Цанма къакIулну бухьурчарив, нитти-буттахъал цукунни оьрчIан лахьхьин буван? Цал цанма лахьхьин аьркинни. Яла хIаз бизаймургу мури, ихтилатругу буссар оьрус мазрай. Инсантал ниттил мазурдий гъалгъа тIутIисса, цуку-цукунсса масъалартту буссарив цала мазрай бусласисса секциярду батIин къабучIиссарив?
Оьмаров Сулайман:
– Буниялттунгу, нитти-буттахъал бакъар цанмавагу ниттил маз лахьхьинсса пикри. Гьай-гьай, оьрус маз къакIулну Дагъусттаннайгу, Аьрасатнавугу пайда бакъар. Амма оьрус маз кIулшиву ниттил маз лахьхьаврихун дахчилай дакъархха, ялунгума кабакьу бикIанссар.