Республикалул БакIчи Сергей Меликовлул баян бунни Дагъус­ттаннал кьамул ан тIий ушиву Донецкаллал ва Луганскаллал республикарттаясса 1268 лихъачув.

– Националистътурал чулухасса хIусутшиврийн бувну, Донбассрал агьулданун багьунни, ду-думур ду-дуний кьариртун, лихъа буккан. Ихтилат цахлува цивппа бацIан къабюхъайминнаятур – хъанния, оьрчIая ва къари-къужлуя. Аьрасатнаща къабюхъайссия тай балаллуву кьабитан. Жува ца агьлуру ва хIакьину жунма багьлай бур, циняв цачIун хьуну, жула гьалмахтурал чIарав бацIан.
Ва ишираву Дагъусттангу чулий къабацIантIиссар, захIматсса тагьардануву жущава бюхъайссаксса чIарав бацIантIиссару.
Аьрасатнал ХIукуматрал хIукмулийн бувну, Дагъусттаннал кьамул антIиссар Донецкаллал ва Луганскаллал халкьуннал республикарттаясса 1268 ли­хъачув, – увкунни Сергей Меликовлул.
– Дагъусттаннай кьини дуркнал чIарав бацIаву муданмагу хьхьичIунсса ххуллу-ххуттай буссар, цума-цагу дагъусттанчувнал цала буржну ккаклакиссар кумаграх мюхтажнал чIарав ацIаву, хъамал ххирашиву тIурча, ччянияцIава хьуссар жула миллатрал магьирлугърал агьамсса бутIану.
«Ча увкIсса уссарив цIувагу къацIувххуну, буххьуллуву хьунаавкьуну, жува хъамаличув, цIарачIанай увцуну, щяитай­ссар кIараллай», – укун чивчуну бур жула хъунасса Расул ХIамзатовлул. Тания шиннай цичIар даххана къархьуссар, – увкунни Сергей Меликовлул.
Баян бунни Дагъусттаннал ХIукуматрайн цала тапшур бувну бушиву республикалийн бучIантIисса хъамаллуран къулайсса шартIру дузал дан. «Жува хIарачат банну хъамал ххуйну кьамул бан, цала шаппа кунма».
«Хасъсса операция къуртал хьувкун ДНР-данул ва ЛНР-данул агьали зана хьунтIиссар нацизмалия мурахас дурсса цала ватандалийнмай», – ххи бунни Республикалул БакIчинал ва умуд кьувкьунни Дагъус­ттанная ва дагъусттанлувтурая хъамаллурал дакIурдиву хъинсса ва тIааьнсса асарду личIантIишиврийн.