«Владимир Путиннул нава барча аву ттун оьрмулухун дакIний личIансса ишну хьунуккар», – тIий ур, уттигъанну «Хъунна перемена» тIисса щалва Аьрасатнал конкурсрай ххув хьуну, 1 миллиондалунсса сертификатращал зана хьусса Шабанов Даниял.
Ва цувагу хъуншагьрулул гьарца иширавух чялишну гьуртту шайсса волонтергу, «Орленок» тIисса оьрчIансса кказитрал чIава корреспондентгу ур. Ванал макьалартту цимиллагу рирщуссар «Илчилийгу». Дарсирдал итххявхсса ва кIулшивурттах гъира бусса Даниял ур МахIачкъалаллал 28-мур школа-гимназиялул хьхьичIунсса дуклаки оьрчI.
Конкурсрая ва жула оьрчIал ххувшаврия хьхьичIми номердайгу чивчуну буссия. Цал ттигу дакIнийн бутан, Къиримнаву, цIаларгсса оьрчIал лагерь «Артекрай» хьуссия махъсса дачIи шинал Аьрасатнал регионнай най диркIсса «Хъунна перемена» конкурсрал хIасиллу дуллалисса финал. Муний гьуртту хьуссия билаятрал циняр регионнаясса гьунарду чIявусса ва итххявхсса 1200 оьрчI. Вайннава 11-ми классирттаву дуклакисса 300 оьрчI цала-цала шаппай зана хьуссар ца-ца миллионгу бувххуну, ва 9-ми классирттаву дуклакисса микссава оьрчIру зана хьуссар мукунма кIитту-кIиттуршазарда къурушгу дурххуну. Финалданул гьурттучитуравух Дагъусттанная ивкIссар 8 дуклаки оьрчI. Вайннаягу 4 оьрчI зана хьуссар ххувшавурттащал ва арцул сертификатирттащал. Цува Президентнал барча аврия гьарта-гьарзану бусангу жу оьвкуссия Данияллуйн хъамалу . Ва цувагу жуна чIявучин кIулсса музыкант, балайчи Даниял Шабановлул арснал арс ур.
– Даниял, буси цукун пикри хьуна му конкурсрай гьуртту хьун?
– Мартрал махъва-махъсса гьантрай школалий жуйн баян бувна, «Хъунна перемена» тIисса щалва билаятрал конкурсрай гьуртту хьун ччисса ухьурчан, сайтрайн бувххун, зулла цIа-бакI чичара куну. Нагу, хъунмасса пикригу къабувну, цимурца щаллу дурссия. ЦIуминалийсса ЦIуссалакрал шяравусса ттула ттаттачIа ва амудадачIа бигьалагай гьантрай унува, баян бувуна гьар кIанай бушиву карантин.
Я МахIачкъалалия нину-ппу бучIан къахъанай , я нава шавай зана хьун къабюхълай, ххуллурду лавкьуну ливчIунав. Дайдирхьуна дистанциялийсса дарсру. Миннуха конкурсраягу хъамабивтуна. Ца ххуллух телевизорданувух баян бувуна «Хъунна перемена» конкурсрайнсса набор ттигу найнна дуссар тIисса хавар. Нава щала вихну къаивкIнугу, увххун сайтрайн, буцIин бувссия ваму-тамуния цIухлахисса тестру. Цаппара хIаллава ттучIан дуркIуна 9 журалийсса темалул цIарду. Миннува язи дугьан багьлай бия ца. Нагу язи дургьуссия «Познавай Россию» тIисса, туризмалуцIун дархIумур тема. Увххун интернетравун, личIи-личIисса регионнаясса ттула чIун архIал оьрчIал дянив цIухху-бусу бувну, язи бувгьуссия Къирим, Санкт-Петербург, Татарстан, Алтай ва жула Дагъусттан.
Вай циняр регионнайсса вакилтуращал социал сетирдайхчIин кIул хьуну, гайнначIа туристътуран ца яла ххира хьусса тарихрал ва караматсса тIабиаьтрал ххю-ххюва кIанттурдал сияхI дурну, «Развитие современного туризма в России» тIисса проект дурссия, мунин аьмсса цIагу «Жагьилтурансса маршрут» дирзун. Дагъусттаннай, жула туризмалул вакилтурахь цIухху-бусугу бувну, язи бувгьуссия туристътуран ххирасса Дарбант, Сулакьрал къуманивалу, Ххунзахъиял жюружани, Самурдал вацIа, Гъуниннал райондалийсса зунттал щархъив. Ва проектраха зузикссаксса хIаллай ттунмагу чIявусса затру кIул хьуна.
Проект щаллу дурну цаппара гьантрава нава полуфиналданийн увкшиву баян буллалисса чагъар бувкIуна электрон почталийн. Му хьуссия жулла республикалий октябрьданул дязанний, Ухссавнил Ккавкказуллал цайми регионнаясса оьрчIругу бувкIун, МахIачкъалалия арх бакъасса «Журавли» тIисса санаториялий. Микку жу командарттайх бавчIунав, гьарца командалун цанна-цаннасса проектру сакин дан дуллуна. Жулмур командалуву бия Волгоградраясса, Чачаннавасса, Къарачай-Чаргаснавасса 9 оьрчI-душ. Жу дузал дуван ккаккан дурсса темагу дия Ухссавнил Ккавкказуллайсса экологиялул тагьардануцIун дархIусса. Ца команда дунугу, баллу бихьлай бия жун гьарнан цанма-цанмалусса. На проектравун лавсъссия жула Ак-Гель бярницIун бавхIумур экологиялул масъала.
Ахиргу, хIасиллу дувайни, жул проект дия ца яла лахъми баллан лайкь хьусса, амма ттун баллу биял хьуну бакъая финалданийн уккан. На му иширал хъирив увккун, апелляциялийн буллуссия. Москавлиясса экспертътал хъирив бувккун, гьарца ятIапрайсса ттул гьурттушиндарал даражагу ккавккун, ялун 50 балл ххи бувна ва финалданийн увкшиву бувсуна. Къиримнал «Артекрайн» жу Дагъусттанная октябрьданул 30-нний бувкссияв. «Хъунна перемена» конкурс цурда Москавлив дикIан аьркинссия, эпидемиологиялул тагьар сававну му хьуна Къиримнаву.
– Владимир Путиннущалсса хьунабакьавриягу буси… Цукунсса асарду хIасул хьуна виву Президент вищала жаплийн увккукун?
–Президентнащалсса хьунабакьаву хьун хьхьичIмур кьини циняв гьурттучитал бавтIун, жухь жуятува, нитти-буттая, ттатта-бавахъая цIухху-бусу бувна. ЦIувххуна чун дуклан буххан ччай буссарив ва цаймигу укунмасса затру. Нагу ттуятува, ттула оьрмулувасса вамур-тамур бувсъссия. Сакиншинначитуралгу жуй дюъ дирхьуна, Президентнан оьрчIащал жаплийн уккан ххирассарча, сивсуну, кьянкьану хавар-махъ бусира куну.
Хъиривмур кьини циняв бавтIун, «Артекрал» хъунмур майданнив буру Президент экрандалийн укканнин ялугьлай. Цаппара хIаллава Владимир Путиннул, циняв гьурттучиталгу барча бувну, тIайлабацIурттугу чIа увкуну, «Здравствуй, Даниял ! » увкуннихха. ДакI хъя увкусса ххива ттулла. Му чIумал ттул каниву микрофонгу хьунни. Ивзун лавай, учинмур хIадур буллай унува, «Барча ина увсса кьини», – куну, ттун хъиншивуртту чIа увкуна Путиннул.
ЦичIав бакIравун бухлай бакъая му чIумал, яла, кьянкьа дурну, барчаллагьгу куну, ттуятува, ттула ттаттая, Дагъусттанная бусав. Бусав нава Москавливсса Пироговлул цIанийсса медициналул университетравун уххан хIадур хъанай ушивугу. Владимир Путиннулгу: « Ккавкказрай хъунмур никирал чулухунмайсса хIурмат лахъссар. Дунияллий ца яла аьркинмур пиша язи бугьан най ура ина», – куну, тIайлабацIу чIа увкуна. На Президентнайн цIунилгу Дагъусттаннайн хъамалугума оьвчав. Циняв, хъатру ришлай, щютI-вев тIий на барча уллан бивкIуна. Цаппара хIаллава телефондалийн ттуршрахъул сообщенияртту дукIлан диркIуна. Барча уллалисса смс дуркIуна ДР-лул информатизациялул ва связьрал министр Сергей Снегиревлуягу.
Хьунабакьаврия махъ жу, конкурсрал аьдатрайн бувну, командарттайх бавчIуну, гава куццуй проектру дуллан бивкIссияв. Ва ххуллух ттущал командалуву ия Приморскалиясса, Владивостокраясса, Хабаровскалиясса 12 оьрчI. Ккавкказнавату так на ца ияв. Жул темагу дия: «Развитие современного искусства и творчества в России» тIисса. Проект ца диркIнугу, кьиматру бишлай ва баллу буллай бия жун гьарнан, жул чялишшиврух, гьурттушиндарах бурувгун.
Мугу щаллу дурну, хIасиллах ялугьлагьисса хъиривмур кьини жу буссияв циняв ца кIанайн бавтIун. Цаппара хIаллава ттул хъирив вожатая бувкIун, на увцунав жанахIравун. Гийх ца къуршигу канихьну авцIуну ия Аьрасатнал ХIукуматрал Председательнал цалчинма хъиривчу Сергей Кириенко. «Ва вин Президентнаясса бахшиш», – куну, ганал ттул каруннаву бивхьуна къурши. Гиву Владимир Путиннул ттун бахшишран тIайла дурккун дия каний дахIай ссят, цурдагу Юрий Гагариннул космосравун левхсса ппурттуву каний дархIуну диркIсса «Штурманские» тIисса ссятрал копия. ДурчIин къашайсса ххаришиврул дакI дия дурцIуну.
Муния махъ финалданул хIасиллугу кIул хьуна.
– Даниял, ца бия вил кумагчитал ва насихIатчитал му ххувшаврийнсса ххуллий?
– Ттула шаппами бакъасса, ттул насихIатчиталну бия 28-мур школа-гимназиялул завуч Нигяр Сяидова, ттула классрал каялувчи Сияна Кьадиева, информатизациялулмур даву дачин дурсса Сияли Исяева ва географиялул учительтал.
– Яла захIматмур ци дия конкурсрай?
– Яла захIматмур дия чIун диял къахъанахъаву. Проектру дайни, жухьхьун хъуннасса чIун къадулайва. Аьркинну бикIайва 15-20 минутрал дянив щаллу хьуну, мунил презентация дуван.
– Виламур школалий цукун хьунаавкьура ина?
– МахIачкъалалив увкIун хъиривмур кьини дарсирдайн увкIсса чIумал, на хьунаакьин бувккун бия щалва школа. Хъатру ришлай, щютI тIий, на барча уллай бия циняв классру. Жул директор Гульнара Аьбдуллаевал, дартIун конференция, гикку ттухь тавакъю бувна оьрчIахь бусан проектрая ва мунийнсса хIадуршиндарая. Бусав миннахьгу хъиривмур шиналсса конкурсрай ихтияр дикIантIишиву 5-7- ми классирттахь гьуртту хьунгу ва, дуклан гъира бухьурча, хияллу щаллу шайсса бивкIшивугу.
– Буси зула кулпатраягу чан-кьансса…
– Жул бур лакрал цаппара щархъив цачIун хьуну сакин хьусса кулпат. Ттул ппу Сундар ур Гьамиящатусса, нину Раиса бур 1-мур ЦIувкIратусса, ниттил нину дур Гъумучатусса. КIивагу ттул ссу зий буссар Москавлив, ца бур оьрчIал поликлиникалий педиатрну, цагу–банкрай. Навагу, хIакин хьунсса умудрай, цIана ЕГЭ-рду дулун хIадур хъанай, унгу-унгуну дарсирдахун агьантIий ура.
– Барчаллагь, Даниял, вин тIайлабацIу чIа тIунну жугу вания гихунмайсса гьарца ишираву.
