Ларгсса нюжмаркьини Москавлив, Аьрасатнал Президентнал Дагъусттаннал Постпредстволий чIявусса агьлу бавтIун бия, СССР-данул летчик-космонавт, Совет Союзрал Виричу Муса Маннаровлул ва Аьрасатнал Виричу, лётчик-испытатель МахIаммад Толбоевлул юбилейрду барча дуван. Вайннан кIиннаннагу 70 шин хьуссар.
Вай барча буллалисса шадлугъгу хас дурну дия космосравун цалчинсса инсан левххун 60 шин шаврин. Юбиляртал барча буван бавтIун бия паччахIлугърал органнал вакилтал, жяматийсса ишккаккулт, машгьурсса аьлимтал, культуралул ва магьирлугърал вакилтал. Москавуллал Культуралул центрданул президент Арсен ХIусайновлул цалва ихтилатраву кIицI лавгуна Муса Маннаров ва МахIаммад Толбоев ялун нанисса никиран чувшиврул ва адаврал ккаккияну, Ватандалуха виртталну къуллугъ баврил яргсса эбратруну хъанахъишиву. Юбиляртал барча буллалими чIурчIав дуллай бия Аьрасатнал кIиягу язисса арс, дунияллул авиациягу, космонавтикагу гьаз давриву биялсса бутIа бивхьусса вакилтал бушиврий. Ккаккан дурна мероприятиялий вайннал оьрмурдая бусласисса документал журалул видеосуратругу. Ккаккиялун дирхьуну дия вирттаврал архиврдавасса суратирттал стендгу.
ЧIявуя барча буллалисса ххуй-ххуйсса барчаллагьрал махъру, бахшишру. Аьрасатнал Жяматийсса палаталул цIанияту барча уллалисса чагъар буллуна Муса Маннаровлухьхьун ва палаталул член Айгун МахIаммадовлул. Гьуртту хьуна шадлугърай Мариян Илиясовал цIанийсса «Дараччи» клубрал Москавливмур филиалданул душругу. Ва филиалданул хъунмур Мариян Кьаландаровал, мероприятиялул сиптачитурахь барчаллагь тIий, кIицI лавгунни Муса Маннаров ва МахIаммад Толбоев кунмасса къирият дусса вирттаврал цIардал багьайкунсса хIурмат буруччаву жулва цинявнналгу бурж бушиву, укунсса хьунабакьавурттал, хIакьсса вирттаврал цIарду гьаз даврил бияла цIакь буваврицIун, бавтIцириннал дакIурдиву дусшиврул, хIала-гьурттушиврул чаннасса асарду кьабитлатишиву.
