МахIачкъалалив хьунни республикалул ЖКХ-луцIун дархIусса паччахIлугърал программа щаллу даврил хIакъиравусса батIаву.

Мероприятие хьунни ЖКХ-лул сфералувусса Жяматийсса контрольданул региондалул центрданул хъунама Сайпуттин Давдиевлул каялувшиндаралу. Шикку гьуртту хьунни профильный ведомстварттал ва ялув бацIайсса органнал вакилтал. Дагъусттаннал Капитал ремонтрал фондрал даврил хIасиллу дунни каялувчинал хъиривчу Заур Бахмудовлул. Ванал бусласимунийн бувну, капремонтрал региондалул программалувун бухлай бур чIявусса квартирарду бусса 4322 къатта (аьмну 15, 78 млн. кВ.м.).
2026-2028 шиннардийнсса кутIасса чIумуйсса пландалул лагрулий бакьин бан ккаккан бувну бур республикалул 11 муниципал сакиншиндаравусса 152 къатта. Аьмну вай давуртту 1 млрд.ва 198,38 млн арцун дацIан най дур. Даххана дан дакIний бур 25 къатлуву 77 лифт. Дакьин дан тIий дур 77 магъи, 10 фасад ва ца лувчIинниялу, мукунна 52 къатлуву низамрайн дуцин тIий дур вивсса инженер системарду. 152-гу къатлул проектно-сметная документация хIадур дурну дур. Цалчинмур этаправун багьлагьисса 91 къатлул хIакъираву подрядчиктуращал кьутIи дурну дур, кIилчинмур этаправун багьлагьисса 61 къатлуха зунсса подрядный организацияртту ххал дуллай бур. ХIакьинусса кьини цалчинмур этапрай щаллу бан ккаккан бувсса 91 къатлува 79 къатта циняв давуртту дурну, комиссиялул кьамул бувну бур. 12 къатлувусса строительно-монтажный давуртту дурну къуртал шавай дур.