Ноябрьданул 28-нний цила оьрмулул ххаллилсса юбилей кIицI ларгунни лаваймур категориялул хIакин, захIматрал ветеран, Дагъусттан Республикалул лайкь хьусса хIакин, Хъунайннал шяравасса Буттаева Маричат Нуруллагьлул душнил.
Бувну бур Маричат ноябрьданул 28-нний 1945-ку шинал Барнаул шагьрулий Хъунайннал шяравасса Нуруллагь ва ПатIимат ХIусайновхъал хъунмасса кулпатраву. Шиккува кIицI лаган, Буттал кIанттул цIанийсса Хъунмасса дяъвилий виричувну жан дуллусса летчик Исмяил Шахшаев Маричатлул ниттиуссур.
Га чIумул лакрал чIявуми чиваркI куна, Маричатлул ппу Нуруллагь хIалтIилухун лагайсса ивкIун ур Аьрасатнал шагьрурдайн. Маричатлул оьрчIшивугу ларгун дур Барнаул ва Тула шагьрурдай. Школалийн лавгун бур Тулалий. 1957-ку шинал вайннал кулпат бивзун бур МахIачкъалалив, Маричатлулгу гихуннайсса дуккаву дачин дурну дур шагьрулул 7-мур школалий.
1964-ку шинал МахIачкъалаллал медициналул училищегу къуртал бувну, Маричат зун бивкIун бур шагьрулул 2-мур азарханалий хирургиялул медсестрану. 1967-ку шинал дуклан бувххун бур Дагъусттаннал паччахIлугърал медициналул институтравун, шикку дугу-дуклай, дуккаврищал архIал зийгу бивкIун бур. Вара шинал Маричатлул ташу бувну бур цила шяравасса ххаллилсса жагьил Закирдущал. Москавуллал авиациялул институтгу къуртал бувну, Закир ва шинал зана хьуну ивкIун ур Дагъусттаннайн.
Медициналул институт къуртал бувну махъ Маричат кIава 2-мур азарханалий хIакин-педиатрну зун бивкIун бур, хIатта ванин цинма хъинну ччай бивкIнугу хирургну зун. Амма, хирургнал пиша му хъаннил пиша бакъар тIий, душнин ххуллу къабуллуну, му мурад щаллу къавхьунува ливчIун бур.
Шиннардивун Маричат бивтун бур цIуну тIивтIусса поликлиникалул заведующаяну. ЦIусса поликлиника учирчангу, цIуну дурну дацIан дурсса дачIрасса къатри дакъа, цичIар къадиркIун дур. Ванил каялувшиндаралу лащу-щаллу бувну бур поликлиника. Махъ, 1999-ку шинал, Маричат бивтун бур УФСИН-далул 4-мур колониялул ЛИУ-лул (Лечебно-исправительное учреждение) лабораториялул хъунмурну. Шиккугу ванил цуппа бусса кIану ххуй бувну бур, даву лавайсса даражалийн лахъан дурну, ххаллилсса коллективгу сакин бувну. Зузисса шиннардий Маричат цимилвагу лавгун бур Москавлив хасъсса курсру буккин. Жаваблувшинна ларайсса, агьамсса даврий зий, лабораториялул диагностикалуву цIу-цIусса кьяйдардугу ишла буллай чIярусса шиннардий захIмат буллай бивкIссар Маричат Буттаева.
Лабораториялул хъунмурну зий бивкIссар 2017-ку шинайннин. Ва шинал, цилла каялувшиву дуллалисса коллективран ччай бакъанува, итабакьлайгу бакъанува, Маричат цила хушрай лавгун бур даврия, бусрав-сийлий бунува лавгун хъинни тIисса ниятрай. Пенсиялийн бувккун махъгу Маричат, цилламур цIуллу-сагъшиврух къабурувгун, къашавайнал чIарав бур, чIаххув бикIу, гъан-маччаминначIа бикIу, шайсса ка-кумаг буллай, консультацияртту дуллай. ЗахIмат ххирашиву, инсаннан кумаг буван анавар буккаву, хъамал ххирашиву дур Маричатлул хасиятрал язими лишаннавух.
Республикалул цIуллу-сагъшиву дуруччаврил системалуву зий 50-нния лирчусса шиннардийсса захIматрал ххуллу бивтун бур Маричат Нуруллагьовнал, хIалал дурну дур «Дагъусттан Республикалул лайкь хьусса хIакин» ва «ЗахIматрал ветеран» цIарду, личIи-личIисса министерстварттал ва ведомстварттал чулухасса ХIурматрал грамотартту ва Барчаллагьру.
Ва бур ласнан личIлулсса, аякьалийсса кулпатгу. Закирдул ва Маричатлул дянив хьуну бур кIива душ. Вай, ларайсса кIулшивурттугу ларсун, зий бур цалла-цалла давурттай, бусравсса цIардугу лайкь дуллай. Тти Закир ва Маричат шаймур буллай бур душварал оьрчIру хъуни бавривугу, вайннан тарбия дулавривугу.
Барча тIий Маричатлухь оьрмулул юбилейгу, чIа тIий буру цIакьсса цIуллу-сагъшиву, кулпатравуминная, гъан-маччаминная ххарисса чIярусса шинну.
Бадрижамал Аьлиева
