Сентябрьданул 5-нний дайдирхьуссия Дарбантлив, «Патриот» паркрал майданнив, ххюва гьантлийсса жагьилтурал форум «Каспий –2026». Ва дунияллул халкьуннал дянивсса XIII-мур форумри.

Ваний Аьрасатнал 50 региондалиясса ва 7 кьатIаллил билаятраясса жагьилтал гьуртту хьунни. Аьмну – 600 инсан.
Форум тIитIлатIисса шадлугърай бавтIцири барча бунни республикалул ХIукуматрал хъунаманал хъиривчу Муслим Телякавовлул.
«Гьар шинах ва форумрал чIалачIи бувай Дагъусттаннай итххявхсса, хайр-мюнпатранну къуццу тIитIисса жагьилтал чIявусса бушиву. ДакI дарцIуну ура миннал проектругу оьрму хьхьичIунмай хъит учин баврил ххуллийсса хъит бушиврий», – увкунни ванал. Проектруми личIи-личIисса дия. Масалдаран, «Ххувшарил варистал. Аьралуннал чувшиврул кIанттайнсса аьрххирду». Мукунма волонтертурал проектру, жагьилсса предпринимательтурал продукция. Вай сиптардал презентация дурна Проектирдал аллеялий.
Ххюва гьантлул мутталий жагьилсса предпринимательтал, волонтертал, педагогтал ва миннал насихIатчитал агьамсса масъалартту гьаз буллай, мастер-классру ккаккан буллай зий бивкIунни. Экспертътуравух бия Аьрасатнал Виртталгу, машгьурсса жяматийсса ишккаккултгу, личIи-личIисса иширттаву чувшиву ккаккан дурсса инсанталгу. Аьрасатнал Виричунахьхьун, дагьну нанисса самолет ххассал дурсса Дамир Юсуповлухьхьун, СВО-лул Вирттаврахьхьун жагьилтурал буллалисса суаллу чIявуя.
Форумрал проектирдансса завалул фонд 6 миллион бия, вайннун лайкь хьуна ххув хьусса 10 инсан.
Форум лакьлакьисса кьини ваний гьуртту хьунни Дагъусттаннал бакIчи (врио) Федор Щукингу. Ванал бувсунни, ялу-ялун ва форумрал сийгу лахъ хъанай, географиягу гьарта хъанай бушиву, ялунчIингу вара журалул форум дувансса ният душиву.
Форумрал лагрулий «ТАСС Кавказ» информационный центрданухьхьун дуллусса интервьюраву жагьилтурал иширтталсса буллалисса министр (врио) Камил Саэдовлул кIицI лавгунни, шин къуртал хьуннин Дагъусттаннайсса волонтертурал аьдад 120 азаруннайн диян дувансса мурад бушиву, дуклаки оьрчIру-активистътал патриот турдай Москавлийн ва Петербурглийн тIайла буккантIишиву. Бувсунни ва нанисса шин къуртал хьуннин Дагъусттаннай мукунна ЧС-лул центр добровольчества тIитIинтIишивугу.
ПатIимат Рамазанова