Вай гьантрай 1-мур ЦIувкIуллал школалий хьунни Лакрал чичултрал секциялул каялувчи, Дагъусттаннал культуралул лайкь хьусса зузала Супиян Оьмаровлущалсса хьунабакьаву.

Супияннул бувсуна цукун­сса хIадуршинна дуллай буссарив халкьуннал шаэр Сулайман Стальскийл ва литературалул классик, шаэр, таржумачи Апанни Къапиевлул юбилейрду лайкьсса даражалий хьунадакьиншиврул, бувсуна лакралми чичултрал юбилейрдахагу зий бушиву. Цува ЦIувкIуллал школалий дуклай ивкIсса чIуннугу дакIнин дирчуну, бувккуна цалва ляхъан бувсса цIусса шеърирдугу. Оьрус мазрал ва литературалул дарсру дихьлай оьрму лавгсса, опыт бусса филолог Ххадижат Ссаламовал бувсуна литературалул хъунмасса бияла бушиву оьрчIру итххяххан бавриву, миннал рувхIанийсса культура гьаз дувавриву. Вава мяъна-мурадрайсса ихтилатру бувна учительтуралгу: Мажид Баговлул, Умамат ХIусайновал, Соня Кусаевал, Умамат Маммаевал ва Зульфия Кьурбанаьлиевал. «Аьрщи ва агьлу» передачалул автор Карина Далиевал бувсуна лакрал цума-цагу чичул оьрмулуву хъанахъисса цавагу ккалли бансса иш лях гьан къабитайшиву, чара бакъа лакку каналданий бусайшиву. Уттигъанну хIадур дуршиву Дагъусттаннал халкьуннал чичу Мирза Давыдовлул юбилейран хас дурсса передача. ЦIувкIуллал школалул директор Фируза ХIусайновал барчаллагь увкуна хъамаллурахьгу, литературалул вечерданул сиптачитурахьгу. Вара кьини хъамаллурал ва школалул учительтурал коллективрал, дуклаки оьрчIал тIутIив дирхьуна школалул хIаятравусса, аьрай ливтIуминнансса гьайкалдануцIгу, ХъунккурчIав дацIан дурсса Совет Союзрал кIийла Виричу АхIмад-Хан Султаннул гьайкалдануцIгу.

Фируза ХIусайновал бувсуна ЦIувкIрату буттал кIану буруччин лавгшиву 182 инсан, ца къатлува 3-4 лавгсса ишругу бивкIшиву, вайннаяту 94 инсан зана къавхьушиву. Вайннал цIарду чирчусса мармарчарил ула дуссар АхIмад-Хан Султаннул гьайкалдануя арх бакъасса чIирай. Бувсуна ЦIувкIуллал жяматрал ххуйсса кумаг бувну бивкIшиву «Комсомолец Дагестана» бронепоезд буван, фронтран буллалисса кумаграхлу Сталиннул барчаллагьрал телеграмма дуркIшиву ВЛКСМ-рал райкомрал секретарьну зий ивкIсса шяравучу, Бакриев НурмахIаммадлул цIаний. «Аьрая орден, медальлащал зана хьуссар гьарца цIувкIрачув, хIакьину цаягу ветеран сагъну ливчIун акъар, минналгу, дяъвилул цIарава зана къавхьуминналгу цIарду ялун нанисса никиран, наслулун хъамаритан къабучIиссар. Укунсса журалул мероприятияртту Ххувшаврил байрандалул гьантрай дакъагу, классрал кьатIувсса даву хIисаврайгу школалий дуллалаврия ххарира, ва тарбиялул даву тIайласса ххуттай душиврул барашиннар», – увкуна Супияннул. Фирузал кIицI лавгуна, АхIмад-Хан Султаннул ЦIувкIуллал шяраваллил цIа бюхттул дуршиву. Школалул дуклаки оьрчIал бувккуна аьралий темалул шеърирду.

ПатIимат Рамазанова