Дагъусттаннал Капитал ремонтрал фондрал кутIасса чIумуйсса план щаллу даврил лагрулий дакьин дурсса 34-ра чIяву квартирарду бусса къатри ( 180-ннива) кьамул дунни. Миннува царай къатри – пожар хьуну махъ. Вай хъанахъиссар циняв давуртту: инженер сетьру, лувчIинниялу, лажин чIиртту ва магъив чIумуяр ччяни дакьин дурну, къуртал дурсса къатри.

ЧIяву квартирарду бусса къатри гьануцIакул дакьин дуллай бур Дагъусттаннал цинявппа шагьрурдай ва шанна райондалий. Давуртту дуллай бур цIакьсса ттизаманнул стройматериаллу ишла дурну, опыт бусса ва даража лавайсса подрядный организацияртту.
2025-ку шинал Капитал ремонтрал фондрал мукунна дакьин дурссар кутIасса чIумуйсса пландалийн къадагьсса къатрал магъивгу.
МахIачкъалалив Гагариннул цIанийсса кIичIиравусса 54-ми къатрал магъив ( цIу ларчIун ччурччусса) гъараллу лачIланнин ччясса чIумул мутталий дакьин дунни.
Къатри дакьин даврийну миннул архитектурагу ядан бюхълай бур. Масала, МахIачкъалаллал дязаннивсса Р.ХIамзатовлул кучалийсса 1-ми къатрал лажин чул бакьин бунни ранг-куц, балконнал ва подъездирттал чIалачIин ядурну. МахIачкъалалив аьмну 84-райра чIяву квартирарду бусса къатри дакьин дантIий бур.
Чялишну най дур давуртту Буйнакскалий. Шикку дакьин дан ккаккан дурну бур 6-ра чIяву квартирарду бусса къатри. Хасаврай кIирайра къатри къуртал дурну дур, царай къуртал шавай дур. Шикку цIу дуккан дурну дур токрал, гъилишиврул, щинал системарду, дакьин дурну дур магъив. АцIрахъул шиннардил хьхьичI дурсса къатри цIу дуккан даврийну агьалинан ххуйсса шартIру дузал хъанай дур.
Фондрал дакIнин бутлай бур квартирардал заллухъруннан капитал ремонтрахсса гьарица зуруйсса взносру дулун аьркиншиву. Ми къадуллай буржру хьурча, судрайн булунтIишиву.

Андриана Аьбдуллаева