Мартрал 13-нний Ккуллал райондалул Культуралул ва досуграл центрданий хьунни Бюхттулсса Ххувшаврил 80 шинан хас дурсса «Дакьаврил къукъухьхьи» тIисса суратру дишаврил конкурс. Шикку гьуртту хьунни райондалул школардаясса 23 дуклаки оьрчI.

Художествалул конкурсрайн гьан дурсса суратру дия жура-журасса техникалий кьаланнах, акварельлах, гуашрах, фломастердах дирхьусса.
Конкурсрал хIасиллайн бувну, цалчинмур кIану бувгьунни Ваччатусса Ансария АхIмадовал ва Вихьлиясса Паризат МахIаммадаьлиевал.
КIилчинмур кIану бувгьунни Хъювхъатусса АтIа Оьмаевал, шамилчинмур – Ваччатусса Нурия Нахаевал.
ХьхьичIунсса кIанттурду бувгьусса чIава художниктуран буллунни конкурсрал спонсортурал чулухасса дипломру ва бахшишру.