АрвахIкьини МахIачкъалалив Редукторный микрорайондалий Времена года кIичIираву, Дагъусттаннал кказит-журналлу итабакьайсса идаралул территориялий, тIивтIунни цIусса сквер, цувгу цIа куну бур къуллугърал бурж биттур буллай оьрмурдацIа хьусса журналистътурал аьпалун.
Проект чулийн дурккун дур «Формирование комфортной городской среды» тIисса федерал проектрал ва «Формирование комфортной современной городской среды» тIисса муниципал программардал лагрулий.
5800 кв./м ккаккан дурну диркIун дур 2023-ку шинал чIалачIин ххуй-хъин дансса кIану личIи бан агьалинал чIурду булун. Микрорайондалий ялапар хъанахъисса агьалинал чялишну чIурду булаврийну личIи бувну бур ва кIану.
Ремонт дуллалийни бюхъайссаксса ядурну дур щюллишиву.
ХхялчIал бавкьуну бур занансса кIантту, хIасул дурну дур инсантурансса къулайшиннарду, бивхьуну бур оьрчIру бялахълансса ва спортрал площадкартту, бувцуну бур хьхьувайсса чани, бивхьуну бур ччюрк дичинсса урнардащалсса скамейкартту, беседка, бувгьуну бур цIусса мурхьру, къатIри, газон. Щюллишиву яданшиврул дурцуну дур щин.
Сквер тIитIлатIисса шадлугърай гьуртту хьунни шагьрулул мэр Юсуп Умавов, ДР-лул строительствалул, архитектуралул ва ЖКХ-лул министрнал хъиривчу Имам АьбдулмутIалимов, Печатьрал ва информациялул агентствалул каялувчи Аьбдуразакь Жамалуттинов, НТВ-лул корреспондент Оьмар МахIаммадов, Шагьрулул депутатътурал мажлисрал хъунама Марис Илиясов ва цаймигу.
Юсуп Умавовлул кIицI лавгунни цIусса парк хьушиву инсантал гьавалийн буккан ва бигьалаган къулайсса кIануну.
Ва сквер ххаллилсса бахшишну хьушиву микрорайондалий ялапар хъанахъиминнан бакъасса, шагьрулул агьалинан ва хъамаллурангу.
МахIачкъала шагьрулул администрациялул ва агьалинал цIания барчаллагь увкунни проект чулийн дуккан дан кабакьу бувсса Республикалул бакIчи Сергей Меликовлухь, Строительствалул ва ЖКХ-лул мин
Мэрнал мукунма кIицI лавгунни, сквер Дагъусттаннал кказит-журналлу итабакьайсса идаралул территориялий бухьувкун, шагьрулул администрациялул хIукмулийн бувну, къуллугърал бурж биттур буллай жанну харж дурсса Дагъусттаннал журналистътурал аьпа абад баву мурадрай цIа дирзшиву «Аллея памяти погибших журналистов» тIисса.
Имам АьбдулмутIалимовлул бувсунни скверданул чIалачIин ххуй-хъин дуллалисса манзилданий дурцири давурттая.
«Ва жула инсаншиврул буржри. Жунна ккаклай дур, цала жанну хIайп къакуну, хасъсса аьралий операция нанисса кIанттурдаясса репортажру, жула аьралитурал ккаккан дуллалисса виричувшириясса ва чумартшивриясса сюжетру. ХIайп,тайннава чIявусса оьрмурдацIа хьунни.
ХIакьину жува дакIнин бичлай буру махъсса 20-хъул шиннардил манзилданий чил канища ливтIусса дагъусттаннал журналистъталгу. Вайннаясса аьпалун ва кIанттай бугьантIиссар гьарцаннан цIа кусса мурхьру. Ва ишираву гьуртту хьунтIиссар шагьрулул агьали ва журналистътурал сообщество.
Хасъсса аьралий операция нанисса кIанттурдайн уттинин ацIийла командировкалий ивкIсса Оьмар МахIаммадовлул журналистътурал цIания барчаллагь увкунни территория ххуй-хъин даврил ххуллий ка-кумаг бувсса цума-цаннахь.
Зулайхат Тахакьаева
