1995 шинал апрельданий халкьуннал 121 депутат увчIуну ивкIссар цалчин бавтIсса Дагъусттаннал парламентравун. ЦIанасса ппурттуву зий бур арийлчин бавтIсса (созыв) парламент.
ЧIун ларгун махъ жунма чIалай бур му бивкIшиву жула КонституциялучIансса къабигьасса ххуллу.
Ссайну дакIний лирчIссар ми ларгсса шинну?
Цалчин бавтIсса ДР-лул парламентрал хъунмур масъалану бивкIссар властьрал представитель органдалул даву сакин дувансса, тихунмайгу демократиялул ишру лябуккан бувансса ва экономикалул реформартту дувансса законодательшиврул гьану дузал баву.
Яла, 1999 шинал Дагъусттаннайн боевиктал ххявхсса чIумал, чIалан бивкIссар та ппурттуву хьхьичI бавцIуну бивкIсса хъунмур масъала – цашиву дуруччаву ва регион парчари хьун къабитаву, мунищала архIал аьмну паччахIлугъгу.
Дагъусттаннал референдумрал, Конституциялул судрал хIакъиравусса ва мукунна паччахIлугърал жагьилтурал политикалул хIакъиравусса законну кьамул дурну диркIссар парламентрал кIилчинмур батIаврий. 2003 шинал Дагъусттаннал Конституция кьамул баву хьуссар уттигу ца агьамсса ша, та чIумал зун диркIссар ДР-лул Халкьуннал Мажлисрал шамийлчинмур батIаву.
Республикалул парламентрал мукьийлчинсса ва ххюйлчинсса батIавурттал давуртту хьуссар дунияллул экономикалул кризисрал чIумал, террористътуращал ва бандподпольелущал талатисса тагьардануву. Ми шиннардий ДР-лул Халкьуннал Мажлисрал дурну диркIссар тамансса законотворчествалул давуртту. Та чIумал кьамул дурну диркIссар паччахIлугърал къулагъас хъун дуван аьркинну диркIсса социал законну: мискинну ялапар хъанахъисса инсантуран ва кулпатирттан кумаг баврил, оьрчIал ихтиярду дуруччаврил, чIявусса оьрчI-бакI бусса кулпатирттан, жагьилтуран, пенсионертуран, мушакъатминнан кумаг баврил хIакъиравусса законну.
ДР-лул Халкьуннал Мажлисрал арийлчинсса батIаврил 40-мур сессиялий парламентрал спикер Заур Аскандаровлул каялувшиврулу увчIуссар Ветерантурал ва хасъсса дяъвилул операциялул гьурттучитурал иширттал цIусса комитетрал председатель Аьбдулла МахIаммадов. Ва хушрай гьуртту хьуссар СВО-лий. ЦIанасса ппурттуву яла агьамми масъаларттавасса ца хъанай бур ветерантуран, СВО-лул гьурттучитуран ва миннал кулпатирттан кумаг баву. Ми масъаларттаха зунтIиссар цIуну сакин бувсса комитет.
ХIакьину республикалул парламент – му бур жула халкьуннал мурадирттал вихшаласса вакил, мунил щаллу буллай бур республикалул гьарца ялапарлувнал мурадру ва бюхъурду.
