Балики ттуйн
Хъап учирча
Нач дакъасса
БивкIулул,
Къадулунна
На ттула дакI,
ТтаркIру дакъа,
Мунихьхьун.
На ттула дакI
Кьаританна
ВирттаврачIа
Гьурттуну,
Абадлийсса,
Чанна лавхъсса
Оьрмулуву
Илкинну.
Харж буванна
На ттула гуж
ЦIу оьрмулул
Савлугъран,
Тархъан хьусса,
ТалихIрайсса
Циняв ттула
Дустуран.
Сулайман Стальский
БакIлахъия
Ранг парчри лавххун вацIри бур,
Ссутнил чIикIлилу зунтту бур.
Наврузбагну гьарайзу ур,
ТIитIлай гьарахъалттил нузру.
Нигьирттавун къама най бур,
ЖучIанма гьар талихI най бур,
Зювил щаращив личлай бур,
Ардайх най бур нехру хьуну.
Жул хъу мудан дюрхъуну дур,
Совет улча буллугъну бур.
Ссутгу багъирдавун най дур,
Мусил накьич щашлай гиву.
Хъуни ххувшавурттал гьантрий,
Зуха цIа дан ттун захIматри,
Киремлилул цIурттал чани
Халкьуннан бур нур лархъуну.
Таржума Ю. Хаппалаевлул
Атхъай Аджаматов
Дуснал АбутIалиблул аьпалун
Ина хъинсса ияв, гъинтнил кIюрх куна,
Тяхъассагу ияв, тIутIай хьхьем куна,
Яхъанайгу ияв, шаэрнан лайкьну,
Уттигу-шилагу чаннал увцIуна.
Зуннявчи, къалайчи, зунттал хъудугьу,
Ина чан къашайвав оьний, я хъинний:
Къуттакьяпун кIанай ххира суркьяпа
Къабивхьуна ина цалагу хъилий.
Канихь дия аьсав – винна лархьхьусса,
ДюрчIан къадарчагу, хъинну кьянкьасса.
Ина сан къадайва оьрчIи затругу,
Дуну тIий хасият щяйтIан бакъасса.
Зунттал аьрщи куна, буллугъ-яв ина,
Хяллу кунна, цIакь-я вил чувшивугу,
Виву бия мудан къужлул акьлугу,
ОьрчIал кунна, марцIсса аьчухшивугу.
Ина махъ бусайва, дакI ядирхьуну,
Шеъригу бачайва бюхханну, яргну,
Му бикIайва аьнтсса, дукьрахIан кунма,
КIукIлусса бикIайва урттунияргу.
Ина марцIсса ияв, гъинтнил кIюрх куна.
Яхьийча инсантал виха лавхьхьуну…
Оьрмугу бувтунни – шяирнан лайкьну,
На ттула мукъурттил заллура куну.
Таржума М.-З. Аминовлул
Юсуп Хаппалаев
Ва ттул Буттал кIанттай
Ва ттул Буттал кIанттай,
Зунттурду бакъа,
БакIурдугу буссар
Чил зунттурдуксса.
Вай зунттайх дирхьусса
Мюрщи щархъивгу
Ца-цассагу дуссар
Чил шагьрурдуксса.
Бухьурчагу чансса
Халкь жул зунттаву,
ЧийчIанияр ххисса
Буссар виртталгу.
Бунугу чIявусса
Миллатру шикку,
Дусшивумур дуссар
Чувнияр цIакьсса.
Расул ХIамзатов
Кьурукьру
Дяъвилийва ливчIми дакIнин багьувкун,
Ттул дакIнил хияллу аьжаив лагай,
Тай, аьмсса гьаттаву рахIат къабувну,
КIяла кьурукьирттайн кIура бавсса ххай.
КIайгу лехлайнма бур тания шинмай,
Бюхттулния жуйнма чIурдугу буллай.
Мукун бакъания, цанну жувагу,
Мудан пашман шайсса, ссавнийн буруглай?
ЦIанагу чIалай бур: цIан ттуруллувух
Най бур чил ссавруннайх, чIугу буллайнма,
Найгу бур кьурукьру, кьюкьа дархIуну,
Кьюкьлуй аьскарталну най бивкIсса кунма.
КIай бур щийннив оьвтIий,
щиллив цIарду тIий,
Лахъисса ххуллурдайх левххун най буна.
Лагьнийсса ттул дакIгу
хъит тIий дур хъирив,
Яру мазрай махъру бавусса кунна.
Левххун най бур, най дур
шанмурцIу чарван –
Ттул хьхьичIвасса дустал, ттул мачча-ляхъин.
БачIвасса кIану бур кIайннул кьюкьлуву,
Бюхъай кIа кIанугу ттун бивтсса лякъин!
ДучIанссар ца кьини, кьурукьирттащал
Ачинссара нагу, хъару кIутIу тIий,
Шилува аьрщарай кьабивтсса зуйнгу
Лелуххул зумуну ссавния оьвтIий.
Таржума М.-З. Аминовлул
Мирза МахIанмадов
Ник къарищунна
Никру рирщуну бивтссар
На душмантурайн ккулла,
Тти лахIан къаданшиврул
ЩилкIуй хьхьичI никру ттулла.
Ттуплил цIалцIал бувкьуссар
БакIрая муххал кьяпа,
Тти гьич къабукьаншиврул
Зурданул хьхьичI на кьяпа.
Рашид Рашидов
Амузгиричу
Амузгиричунал бур
КIяласса чIири, амма
Каруми дирисса дур,
Жагьилнал кару кунна.
Зугу хIайран хьунссияв,
Га усттарнах ялугьлай:
Чаннаннил кьалам ия
ЛухIисса ттурчIайх битлай,
Жагь ккурккисса ккюрнутIай,
Жагь кIюласса аьш дуклай.
На цIувххуссия ганахь,
ЦIа машгьурсса усттарнахь:
– Вил канихьсса му ттурчIай
Ххалаххив бурхха чIалай,
Буси жухь, буси, усттар,
Ми ххалаххал ци тIиссар?
Жаваб дуллуна ганал,
ЦIа машгьурсса усттарнал:
– Щахлу чIявуя лагма,
Ттул ччаннайн кьутIайва тай.
Тай кьуртIусри ттун хъама
ЦIанакулгу къаритай.
АьтIий лавгсса оьрчI оьрму
Хъама къабитай ттигу.
Амузгиричунал бур
КIяласса чIири, амма
Каруми дирисса дур
Жагьилнал кару кунна.
Зугу хIайран хьунссияв
Га усттарнах ялугьлай:
Чаннаннил кьалам ия
КIяласса ттурчIайх битлай.
Щюллисса аьш дурккукун,
Яругу хъян бикIайва.
ТIутIал суратру дуркун,
Балайгу бюхттул байва.
На цIувххуссия ганахь,
ЦIа машгьурсса усттарнахь:
– Вил канихьсса му ттурчIай
Ттун тIутIив дурхха чIалай,
Буси жухь, буси, усттар,
Ми тIутIал ци тIутIиссар?
Жаваб дуллуна ганал,
ЦIа машгьурсса усттарнал:
– Бурги, уртту-тIутIаву
ТIуркIу тIий бур тти оьрчIру.
Агь, гайннал ххаришиву,
Шадсса дур гайннал дакIру!
Гай ххал хьувкун, ттул оьрму
Хъиннува тяхъа буккай,
Къумасса оьрчI оьрмугу
ГацIана хъама битай.
Таржума Н. Юсуповлул
МахIаммад-Загьид Аминов
Дагъусттан
Интту вил хъачI-бакIай хъяучай тIутIив
МукьцIалла журасса.
Интту вил щаращал бищай гюнгутIив
МукьцIалва журасса.
Вил мюрщи щархъаву балайгу учай.МукьцIалва лугъатрай, —
Агь, вил ххаллилшиву, ттул буттал улчай,
Щалагу аьрщарай!
МукьцIала уссил ватан,
МукьцIала уссил балай,
Гьай-жан, бюхттул Дагъусттан,
МукьцIала уссил къалай!
Паргал лаккучунал пагьламан лахъай
МукьцIала журалий,
Лазгири душнилгу бартбису щащай
МукьцIалва журалий.
Къумукь-хъузалалгу ччатI ххяххан бувай
МукьцIалва авлахърай.
Агь, вил ххаллилшиву, ттул буттал улчай,
Щалагу аьрщарай!
МукьцIала уссил ватан,
МукьцIала уссил балай,
Гьай-жан, бюхттул Дагъусттан,
МукьцIала уссил къалай!
Байни, жу дустуран хIурматгу байссар
МукьцIалва журасса,
Иш багьний, душманнан балагу байссар
МукьцIалва журасса.
МукьцIалва цIукугу буссар ссавруннай,
Жул савлугъран лахълай, –
Агь, вил ххаллилшиву, ттул буттал улчай,
Щалагу аьрщарай!
МукьцIала уссил ватан,
МукьцIала уссил балай,
Гьай-жан, бюхттул Дагъусттан,
МукьцIала уссил къалай!
Сулайман Рабаданов
МутIалиб МитIаров
Интнил вирхху
Гъарал вирхху левххунни
Щюллисса лухччал ялтту,
Ссурулккуртлул архъангу
Ардал лагма карунни.
ЛухIи хялат ххядуклай,
Ттурулливгу лирхъунни.
Шадну ттуруллайгу хъяй,
Ссав някI – чанна лархъунни.
Бяълилул къяртри мурчал
ХIаллих сукку дурунни,
Интгу тIаннул чурххава
Къупруну хъяхъа кунни.
Гьалак щатIал тIуркIу бур
Ттул ххарисса дакIниву,
Давияв ччавугума,
ЦIуницIа жагьил хьуну.
Вай талихIсса кьинирдай
Ххуйрихха интнил вирхху,
Хъуруннай хъюлчайтIи дан
ЛачIал рангсса тирхханну.
Таржума Х. Илиясовлул
